Jakobo 2:1-26
2 Owetena, umakoru gi yie mar Ruodhwa ma nigi duong’, ma en Yesu Kristo, to gie kindeno bende udewo wang’ jomoko ahinya moloyo jowetegi, donge en kamano, koso?
2 Ka ng’at ma nigi tere mar dhahabu e lith lwete kendo morwakore gi lewni ma pichni odonjo e chokruogeu, to ng’at modhier morwako lewni molil bende odonjo,
3 be dibed ni udewo ahinya wang’ jalo morwakore gi lewni ma pichni ka uwachone ni, “In bi ibed kama ber kae,” to jal modhier uwachone ni, “In dong’ kichung’ ka,” kata ni, “Dhi ibed kacha e bwo raten mar tiendena”?
4 Ka en kamano, donge mano nyiso ni un gi kidienje e kindu uwegi ma keto ji e rang’iny mopogore opogore, kendo donge mano nyiso ni usebedo joma ng’ado bura e yo marach?
5 Owetena ma ahero, winjuru. Donge Nyasaye noyiero joma odhier ka luwore gi wang’ pinyni mondo gibed momewo e yie, kendo gibed joma noyud pok mar Pinyruoth ma nosingo ne joma ohere?
6 To usechayo joma odhier. Donge jomwandu e ma sandou kendo giterou e nyim ute yalo bura?
7 Donge gichayo nying ma jaber ma ne oluongune?
8 Koro, ka uchopo chik ma ka ruoth ma luwore gi wach manie Ndiko ma wacho ni, “Nyaka iher wadu kaka iherori iwuon,” mano utimo maber ahinya.
9 To ka udhi nyime dewo wang’ jomoko ahinya moloyo jowetegi, utimo richo kendo chik kwedou ka chikno nyiso ni un joketho.
10 Nimar ka ng’ato luwo weche duto manie Chik to oketho e wach moro achiel, osebedo jaketho kuom wechego duto.
11 Nimar jalo ma nowacho ni, “Kik ichod,” bende e jal ma nowacho ni, “Kik inek.” Omiyo, kata ka ineko to ok ichodo isebedo jaketh-chik.
12 Dhiuru nyime wuoyo kendo timo gik moko kaka joma ibiro ng’adnegi bura gi chik mar oganda man thuolo.
13 Nikech ng’at ma ok kech jomamoko, en bende ok nokeche e bura. Ng’at ma kecho jomamoko, obiro locho e bura ming’adone.
14 Owetena, ere ohala ma ng’ato yudo kowacho ni en gi yie to oonge gi tim? Donge yieneno ok nyal rese, koso?
15 Kapo ni owadwa kata nyaminwa moro ochando gima onyalo rwako kod chiemo moromo mar odiechieng moro,
16 to ng’ato kuomu wachonegi ni, “Dhi gi kuwe; iyud gima inyalo rwako kod gima inyalo chamo ma yieng’i,” to ok umigi gik ma ringregi ochando, mano kelo ohala mane?
17 Kamano bende, yie kende ma onge tim en yie motho.
18 Kata kamano, ng’ato nyalo wacho kama: “In, in gi yie, an to an gi tim. Nyisa ane yieni ma onge gi tim, to an abiro nyisi yiena ma nigi tim.”
19 Donge in gi yie ni nitie Nyasaye achiel, koso? Itimo maber ahinya. To kata jochiende bende oyie kamano kendo gikirni nikech luoro.
20 Yaye, in ng’at ma kia, be diher ng’eyo ni yie ma onge gi tim en kayiem nono?
21 Donge ne okwan Ibrahim wuonwa kaka ng’at makare kokalo kuom gik ma notimo, nikech nochiwo Isaka wuode e kendo mar misango?
22 Inyalo neno kaka yiene ne otiyo kanyachiel gi timne, kendo timne nomiyo yieneno obedo malong’o chuth,
23 to mano nochopo wach manie Ndiko ma wacho niya: “Ibrahim noketo yie kuom Jehova, mi mano nomiyo okwane ni en ng’at makare,” kendo ne oluonge ni osiep Jehova.
24 Koro unyalo neno ni ikwano ng’ato kaka ng’at makare kokalo kuom timbene, to ok mana kuom yie kende.
25 E yo ma chal kamano, donge Rahab ma ne en dhako ma ndhaga* ne okwan kaka ng’at makare kokalo kuom tim, nikech norwako joma ne oor kotimo kamano e yo maber mi ne okowogi gi yo machielo?
26 Kuom adier, mana kaka ringruok ma onge gi much ngima otho, e kaka yie ma onge gi tim bende otho.
Weche Moler Piny
^ Tiende ni, dhako ma tiyo tij terruok mondo oyudgo pesa.
