Jo-Efeso 5:1-33
5 Kuom mano, nikech un nyithindo moher, beduru kutimo kaka Nyasaye timo,
2 kendo udhi nyime wuotho e hera, mana kaka Kristo bende noherowa mi nochiwore owuon nikech wan, kobedo kaka chiwo kod misango mang’ue mamit ne Nyasaye.
3 Terruok,* gi kit timbe duto ma ok ler, kod ich-lach, kik hulie kata matin e kindu, mana kaka onego obed kuom joma ler;
4 kata tim wich-kuot, kata mbaka mofuwo, kata angera modwanyore—ma gin gik ma ok owinjore—to kar mano, beduru joma goyo erokamano ne Nyasaye.
5 Nimar ung’eyo wachni, kendo un uwegi useyango malong’o ni onge jaterruok, kata ng’at ma ok ler, kata ng’at ma iye lach, ma tiende en bedo ng’at ma lamo sanamu, ma noyud pok moro amora e Pinyruodh Kristo kod mar Nyasaye.
6 Kik ng’ato wuondu gi weche manono, nimar kuom gik ma kamago e ma mirimb Nyasaye nobie kuom nyithind tamruok winjo wach.
7 Kuom mano, kik utim kaka gin;
8 nimar nitie kinde ma ne un e mudho, to nikech un mag Ruodhwa, koro un e ler. Dhiuru nyime wuotho kaka nyithind ler,
9 nikech nyak mar ler oting’o kit timbe mabeyo duto gi tim makare kod adiera.
10 Dhiuru nyime ng’eyo gadier gima long’o e wang’ Ruodhwa;
11 kendo weuru timo timbe mag mudho ma onge ohala; to kar mano, elgiuru mondo ging’ere ratiro.
12 Nikech gik ma gitimo ling’ling’ gin mag wich-kuot ma ok nyal kata mana hul.
13 Koro ler e ma elo gik moko duto, omiyo, gik moko duto ma oseel, doko ler.
14 Mano e momiyo ne owach kama: “Yaye, in jal ma nindo, chiew, kendo chung’ ia malo kuom joma otho, eka Kristo norieny kuomi.”
15 Omiyo, beduru motang’ ahinya mondo kik uwuoth ka joma onge rieko, to uwuoth ka joma riek,
16 ka utiyo maber gi kinde ma un-go, nikech ndalogi gin ndalo maricho.
17 Kuom mano, weuru bedo joma ok ti gi pachgi kare, to dhiuru nyime yango dwach Jehova.
18 Bende, kik ubed ka umer gi divai, ma en gima kelo tim anjawo, to beduru ka ipong’ou gi roho maler.
19 Wuouru e kindu kutiyo gi zaburi gi wende pak ne Nyasaye kod wende mag lemo, kuwer ne Jehova gi thum ei chunyu,
20 ka kinde duto ugoyo erokamano kuom gik moko duto ne Nyasachwa kendo Wuonwa, e nying Ruodhwa Yesu Kristo.
21 Bolreuru e kindu nikech umiyo Kristo luor.
22 Mon mondo oyie bolore e bwo chwogi kaka gitimo ne Ruodhwa,
23 nimar dichwo en wi chiege mana kaka Kristo en wi kanyakla, ma en ringrene kendo en e jawarne.
24 Kuom adier, mana kaka kanyakla bolore e bwo Kristo, mon bende onego obolre e bwo chwogi e weche duto.
25 Un chwo, dhiuru nyime hero mondeu, mana kaka Kristo bende nohero kanyakla mi nochiworene en owuon
26 mondo opwodhe, komiye odoko maler kuom lwoke gi pi kotiyo gi wach Nyasaye,
27 mondo ochiw kanyakla ne en owuon gi berne duto, ka oonge chilo, kata kama ojowore e dende, kata gimoro amora ma kamano, to kar mano, obed maler kendo ma onge mbala.
28 E yo ma kamano, chwo onego oher mondegi kaka gihero ringregi giwegi. Ng’at mohero chiege oherore owuon,
29 nikech onge ng’at ma osin gi dende owuon, to opidhe kendo ogene ahinya, mana kaka Kristo timo ne kanyakla,
30 nimar wan fuonni mag ringrene.
31 “Nikech mano, dichwo nowe wuon mare gi min mare, mi nopadre* gi chiege, kendo ji ariyogo nobed ringruok achiel.”
32 Wach maler moumno en wach maduong’. Koro awuoyo e wi Kristo kod kanyakla.
33 Kata kamano, ng’ato ka ng’ato kuomu nyaka her chiege kaka oherore owuon; to dhako bende onego omi chwore luor matut.
Weche Moler Piny
^ Wach molok kae ni “terruok,” e dho Grik en porneia, ma tiende en kit nindruok duto ma ok kare.
^ Tiende ni, nosik.
