Jo-Hibrania 1:1-14
1 Chon ahinya, Nyasaye ne wuoyo gi kwerewa kotiyo gi jonabi, to nojatimo kamano kinde mang’eny kendo e yore mathoth.
2 To koro e giko mar ndalogi, osebedo kowuoyo kodwa kokalo kuom Wuode, ma en jal ma noketo mondo obed jayud pok mar gik moko duto, kendo ma kokalo kuome e ma ne olosoe ndalogo.
3 En e ma duong’ mar Nyasaye nenore kuome kendo en e ma en e kido ma chal gi Nyasaye chuth; bende, en e ma omiyo gik moko duto dhi nyime betie kokalo kuom teko mar wachne. Kendo ka nosepwodhowa waa e richo, nobet piny e bad Nyasaye korachwich e kuonde man malo.
4 Omiyo, oseyudo duong’ moloyo malaike, e okang’ ma miyo koro oseyudo nying maber ahinya moloyo margi.
5 Kuom ranyisi, en malaika mane ma Nyasaye osegawachonee kama: “In e Wuoda; kawuononi, asebedo wuoru”? Kendo niya: “Anabed wuon mare, to en nobed wuoda”?
6 To ka kendo ooro Wuode makayo e piny, owacho kama: “Malaike duto mag Nyasaye mondo okulrene ka gimiye luor.”
7 Bende, Nyasaye wacho e wi malaike kama: “Otimo malaikene doko chuech ma nigi teko,* to jotichne* otimo bedo ligek mach ma liel.”
8 To e wi Wuode owacho kama: “Nyasaye en kom-lochni mochwere nyaka chieng’, kendo ludh-loch mar Pinyruodhi en luth mar tim matir.
9 Ne ihero tim makare, to ne isin gi tim ketho chik. Mano e momiyo Nyasaye, ma en Nyasachi, ne owiri gi mo ma keloni mor maduong’ moloyo joweteni.”
10 Kendo niya: “A Ruodhwa, e kar chakruok ne iketo mise mar pinyni, kendo polo en tich mar lweteni.
11 Ginilal nono, to in ibiro siko; to mana kaka nanga, giduto gibiro yuyore mi girum,
12 kendo ibiro ban-gi mana kaka kandho, kaka nanga, kendo nolokgi kaka iloko nanga. To in isiko ma ok ilokri, kendo hiki ok nochop e giko ngang’.”
13 To en malaika mane ma osegawachonee kama: “Bed e bada korachwich nyaka chop aket wasiki obed kaka raten mar tiendi”?
14 Donge malaike duto gin chuech ma nigi teko* moket ne tich maler, kendo oseorgi mondo giti ne joma biro yudo warruok?
Weche Moler Piny
^ Tiende sie en “chuech mag roho” ma en pneuʹma e dho Grik.
^ Tiende ni, jotich Nyasaye ma tiyo ne oganda.
^ Tiende sie en “chuech mag roho” ma en pneuʹma e dho Grik.
