Jo-Hibrania 11:1-40
11 Yie en bedo gadier chuth kuom gik migeno, en neno gik migenogo kata obedo ni ok negi gi wang’.
2 Nikech joma chon ne nigi yie ma kamano, Nyasaye nochiwo neno ni oyie kodgi.
3 Kuom yie wanyalo neno ni ndalogo ne ochan kare kokalo kuom wach Nyasaye, mondo gik mineno obed gik ma nitie koa kuom gik ma ok ne.
4 Kuom yie, Abel nochiwo misango ma nigi ber moloyo mar Kain, kendo kokalo kuom yie nogono, ne ochiw neno ni en ng’at makare, nimar Nyasaye nochiwo neno kuom rwako michne, kendo kata obedo ni ne otho, pod owuoyo kokalo kuom yie.
5 Kuom yie, ne odar Enok mondo kik one tho, kendo ne ok nyal yude nikech Nyasaye nosedare; nimar ka pok ne odare, ne ochiw neno kuome ni ne osemoro Nyasaye e yo malong’o.
6 E wi mano, ka ng’ato onge gi yie, ok onyal moro Nyasaye e yo malong’o, nimar ng’at ma sudo ir Nyasaye nyaka bed gi yie ni entiere, kendo ni en jachiw-mich ne joma manye gi kinda.
7 Kuom yie, bang’ ka Noa noseyudo siem moa kuom Nyasaye e wi gik ma ne pok one gi wang’, nonyiso ni noluoro Nyasaye kuom gero yie mondo oresgo joode; kendo kokalo kuom yieneno, nonyiso ni bura oloyo piny, kendo ne okwane kaka ng’at makare nikech yie.
8 Kuom yie, kane oluong Ibrahim, noluwo kaka ne owachne mi nowuok modhi kama ne idhi miye kaka pokne; nowuok mi odhi kata obedo ni ne ok ong’eyo kama ne odhiyoe.
9 Kuom yie, ne obedo jadak ma wendo e piny ma ne osing mana kaka e piny ma wendo, ka odak e hembe kanyachiel gi Isaka kod Jakobo, ma bende ne dhi bedo jayud pok mar singo achielno.
10 Nimar noyudo orito dala ma nigi mise madier ma Nyasaye owuon e ma ne ochano kendo ogero.
11 Kuom yie, Sara noyudo teko mar mako ich kata obedo ni nosekalo hike mag nyuol, nimar ne okwano jachiw-singono kaka Ng’at migeno.
12 Nikech mano, koa kuom dichwo achiel ma ne chal ka ng’at ma nosetho, ne onyuol nyithindo ma kwan-gi ng’eny ka sulwe mag polo, kendo ma ok kwanre kaka kuoyo manie dho nam.
13 Jogo duto ne otho ka gin gi yie kata obedo ni singogo ne ok ochoponegi; to ne ginenogi gi kama bor mi girwakogi gi mor, kendo ne ginyiso ayanga ni ne gin mana welo kendo jodak ma kadho e pinyno.
14 Nimar joma wuoyo e yo ma kamano, nyiso maler ni gimanyo gi kinda kamoro ma en kargi giwegi.
15 To e ma ka dine bed ni gisiko ka giparo kama ne giwuokie, pod dine gibedo gi thuolo mar dok.
16 To koro gidwaro mondo giyud kama ber moloyo, tiende ni kama en mar polo. Kuom mano, Nyasaye ok bed gi wich-kuot kodgi sama iluonge ni Nyasachgi, nimar oseikonegi dala moro.
17 Kuom yie, kane itemo Ibrahim, ne ochalo ka gima nochiwo Isaka kaka misango—ng’at ma noserwako singogo gi mor notemo chiwo wuode ma miderma—
18 kata obedo ni ne osesingne niya: “Mano mibiro luong ni kothi nobi kokalo kuom Isaka.”
19 To nong’ado ei chunye ni Nyasaye ne nigi nyalo mar chiero Isaka kata mana kuom joma otho, kendo nochako oyudo Isaka koa e tho e yor ranyisi.
20 Kuom yie, Isaka bende noguedho Jakobo gi Esau ka onyisogi gik ma ne dhi biro bang’e.
21 Kuom yie, kane Jakobo chiegni tho, noguedho moro ka moro kuom yawuot Josef kendo nolamo Nyasaye ka oyiengore e wi ludhe.
22 Kuom yie, kane Josef chiegni tho, nowuoyo konyiso ni nyithind Israel ne dhi wuok e piny Misri; kendo nochikogi kuom wach motudore gi chokene.*
23 Kuom yie, jonyuol Musa ne opande kuom dweche adek kane osenyuole, nikech ne gineno kaka nyathino ne jaber, kendo ne ok giluoro chik ruoth.
24 Kuom yie, ka Musa nosebedo ng’at maduong’, ne otamore ni kik luonge ni wuod nyar Farao,
25 koyiero mondo ji otimne marach kanyachiel gi oganda Nyasaye, kar mondo oyud mor mar ndalo manok ma richo kelo,
26 nimar nokwano achaya mar Kristo kaka mewo ma nigi duong’ moloyo mwandu mag Misri, nikech nochomo wang’e tir kuom mich ma ne idhi miye.
27 Kuom yie, nowuok Misri, to ne ok oluoro mirimb ruoth, nimar nomedo dhi nyime chung’ motegno kaka jalno ma neno Ng’atno ma ok ne gi wang’.
28 Kuom yie, notimo sawo mar Pasaka kod kiro remo mondo jakel-kethruok kik kel hinyruok ne nyithindgi makayo.
29 Kuom yie, ne gikalo e Nam Makwar mana ka gima ne gin e lowo motwo, to ka Jo-Misri notemo ng’ade, nam ne omuonyogi.
30 Kuom yie, ohinga mag Jeriko ne olwar piny bang’ ka Jo-Israel ne osewuotho ka gilworogi kuom ndalo abiriyo.
31 Kuom yie, Rahab ma ne en dhako ma ndhaga* ne ok otho kanyachiel gi joma ne otamore winjo Nyasaye, nimar ne orwako joma ne oor dhi nono pinyno kotimo mano e yor kuwe.
32 To kare damed wacho ang’o? Nimar thuolo ok bi roma ka adhi nyime wuoyo e wi Gidion, gi Barak, gi Samson, gi Jeftha, gi Daudi, kaachiel gi Samuel kod jonabi mamoko.
33 Kokalo kuom yie, ne giloyo pinjeruodhi, ne gimiyo gik makare obetie, ne omigi singo, ne gigeng’o dho sibuoche,
34 ne gikueyo teko mar mach, ne gitony a e dho ligangla, nyawogi ne olok mobedo teko, ne gibedo gi teko maduong’ e lweny, kendo ne giloyo chuth ogendni mag lweny ma ne omonjogi.
35 Kokalo kuom chier, mon ne orwako joggi ma ne osetho, to jomamoko ne osand nikech ne ok ginyal yie mondo ogonygi ka iwarogi e yo moro amora, mondo gibi giyud chier maber moloyo.
36 Ee, jomoko noyudo sand kane ijarogi kendo kane ichwadogi, to adier mokalo kata kanyo, jomoko ne otue gi nyoroche to moko ne oter e jela.
37 Ne ochielgi gi kite, ne otem yiegi, ne ong’adgi gi msumeno mi opoggi ariyo, ne oneggi gi ligangla, ne giwuotho koni gi koni ka girwako piende rombe gi piende diek, ne gin joma ochando, ne giyudo masiche, kendo ne itimonegi marach;
38 bende, piny ne ok owinjore kodgi. Ne giwuotho koni gi koni e thimbe, e gode, e rogni, kendo ei buche manie lowo.
39 To e ma jogo duto, kata obedo ni ne ochiw neno maber kuomgi nikech yiegi, singono ne ok ochoponegi,
40 nimar Nyasaye noseneno chon ni omiwae gimoro maber moloyo, mondo oketwa wabed malong’o chuth mana ka wan kanyachiel kodgi.
