Jo-Hibrania 8:1-13
8 Koro wach maduong’ kuom gima watemo wacho e ma: Wan gi jadolo maduong’ ma kamano, kendo osebet piny e bat korachwich mar kom-loch mar Nyasaye e polo,
2 en jatich mar kama ler kendo mar hema madier ma Jehova e ma ne ogero, to ok dhano.
3 Nimar jodolo madongo duto iketo e tijno mondo gichiw mich kod misengni bende; omiyo ne dwarore ni jali bende obedie gi gima nonyalo chiwo.
4 Ka dine bed ni ne en e piny, ok dine obedo jadolo, nimar nitiere joma osebedo ka chiwo mich mag misengni ka luwore gi Chik.
5 Jogo tiyo tij Nyasaye e hekalu ma sie ma en kaka ranyisi kendo kaka tipo mar gik manie polo; mana kaka kane Musa chiegni gero hema, Nyasaye ne omiye chik: Nimar owacho niya: “Ine ni itimo gik moko duto ka luwore gi kaka dwarore ni otimgi mana kaka ne osenyisi kane in e got.”
6 To koro Yesu oseyudo migawo mar tich maberie moloyo, nimar en bende e ma en jagach mar singruok maberie moloyo, kendo ma luwore gi chik motenore kuom singo mabeyo moloyo.
7 Ka dine bed ni singruok mokwongono ne ok orem, dine ok ochuno ni mar ariyo obedie.
8 Nimar Nyasaye nyiso ni ji gin joketho sama owacho kamoro ei Ndiko kama: “‘Neuru! Ndalo biro,’ Jehova owacho, ‘ma anatimie singruok manyien gi od Israel kod od Juda.
9 Ok nobed singruok ma chal gi ma ne atimo gi kweregi e chieng’ ma ne amako lwetgi mondo atagi ka agologi e piny Misri, nimar ne ok gidhi nyime makore gi singruokna, omiyo ne aweyo ritogi,’ Jehova owacho.
10 “‘Nimar ma e singruok ma anatim gi od Israel bang’ ndalogo,’ Jehova owacho. ‘Abiro keto chikena e pachgi, kendo anandikgi e chunygi. Mi anabed Nyasachgi, to gin ginibed joga.
11 “‘Kendo ng’ato ok nochak opuonj nyawadgi kata puonjo owadgi kowachone ni: “Ng’e Jehova!” Nimar giduto gining’eya, chakre ng’at matinie mogik nyaka ng’at maduong’ moloyo.
12 Nikech abiro kechogi kuom weyonegi timbegi ma ok kare, bende ok anapar richogi kendo ngang’.’”
13 Nikech owacho ni “singruok manyien,” mano nyiso ni ma choncha koro obedo ma onge tich. Omiyo, gima onge tich kendo ma medo bedo moti chiegni lal nono.
