Jo-Hibrania 9:1-28
9 To singruok ma chonno ne nigi chike miluwo motudore gi tij Nyasaye, kendo ne en gi kama ler mar lemo e piny ka.
2 Nimar ne oger hema mopog iye, kae to kama ne opog mokwongo ne nitie gir chungo taya, kod mesa, gi makate michiwo e nyim Nyasaye; to iluongo kanyo ni Kama Ler.
3 To e tok pasia mar ariyo, ne nitie kama opog e hemano miluongo ni Kama Ler Moloyo.
4 Kanyo ne nitie gir ting’o ubani molos gi dhahabu kod sandug singruok ma omwon gi dhahabu kuonde duto, ma iye ne nitie agulu molos gi dhahabu. Aguluno ne oting’o manna, ludh Arun ma ne oloth, kod kite mopa mag singruok;
5 to gi ka wiye malo ne nitie jokerubi ma nigi duong’ ka giumo raum mar loso winjruok. To sani ok e sa mar wuoyo e wi wechego e yo matut.
6 Ka noseger gigo e yo ma kamano, pile jodolo donjo kama opog mokwongo e hemano mondo giti tijegi mowal;
7 to jadolo maduong’ kende e ma donjo dichiel e higa e kama opog mar ariyono, to ok odonj ma onge remo mochiwo ne en owuon kendo nikech richo ma oganda osetimo nikech kia margi.
8 Kuom mano, roho maler nyiso ratiro ni yo ma dhi ei kama ler ne pok ofwenyore e kinde ma hema mokwongono ne pod nitie.
9 Hemano en mana ranyisi mar ndalo ma sani, kendo ka luwore gi chenrono, ichiwo mich kanyachiel gi misengni bende. Kata kamano, mago ok mi ng’at ma timo tij Nyasaye obed malong’o chuth mi koro obed gi chuny ma onge bura.
10 Gin mana gik motudore gi chiemo gi gik mimadho kod batiso* mopogore opogore. Ne gin mana gik ma chik ne dwaro ni otim motudore gi ringruok, kendo ne oketgi mondo giti nyaka chop ndalo ma noseket mar rieyo gik moko.
11 Kata kamano, ka Kristo nobiro kaka jadolo maduong’ mar gik mabeyo mosetimore, nodonjo e hema maber moloyo kendo malong’o chuth. Ok en hema molos gi lwedo, tiende ni ok oa e chuech mar pinyni.
12 Ne odonjo iye nyaka e kama lerno, ok gi remb diek kod mag nyiruedhi, to nodonjo gi rembe owuon, kotimo kamano dichiel ma ok bi nwo kendo, mi nokelonwa resruok ma nyaka chieng’.
13 Nimar ka remb diek gi mag ruedhi kod buch nyaroya* ma ne ikiro kuom joma nosebedo ma ok ler ne pwodhogi mi gibed maler e ringruok,
14 mano kaka remb Kristo biro timo kamano e okang’ maduong’ moloyo! Nimar ne ochiwore owuon kokalo kuom roho maler ma siko nyaka chieng’, ka oonge ketho e nyim Nyasaye. Donge rembeno biro pwodhowa ka ogolowa e timbe ma kelo tho mi wabed gi chuny ma ok ketnwa bura, mondo wati ne Nyasachwa mangima?
15 Mano e momiyo en jagach mar singruok manyien mondo kokalo kuom thone, rawar ma nochiwo ogony ji oa e ketho ma ne gitimo e bwo singruok machon, mondo joma oseluong obi oyud singo mar pok ma nyaka chieng’.
16 Nimar sama itimo singruok moro gi Nyasaye, chuno ni dhano ma timo singruogno nyaka tho,
17 nimar singruok tiyo mana ka gimoro otho, nikech ok onyal tiyo e kinde moro amora ka ng’at ma ne otimo singruogno pod ngima.
18 Nikech mano, singruok machon bende ne ok ochako tiyo ma onge remo ma ne ochuer.
19 Nimar ka Musa nosewuoyo gi ji duto e wi weche duto manie Chik, nokawo remb nyiruedhi, gi mag diek, gi pi, kae to ne okirogi e bug singruok kendo kuom ji duto, kotiyo gi yie rombo makwar ma rieny motue e yadh hisobu
20 kowacho niya: “Ma e remo mar singruok ma Nyasaye osechikou ni umakrugo.”
21 Kamano bende, ne okiro remo e hema kendo e gik moko duto mitiyogo e tich maler.
22 Ee, ka luwore gi Chik, chiegni ni gik moko duto ipwodho mana gi remo, kendo onge richo minyalo we ne ng’ato mak mana ka remo ochuer.
23 Kuom mano, ne dwarore ni gigo ma ne gin kaka ranyisi mag gik manie polo opwodh kitiyo gi yorego, to gik manie polo dwaro ni ochiw misengni malong’o moloyo.
24 Nimar Kristo ne ok odonjo ei kama ler molos gi lwedo, ma en mana kaka tipo mar gima sie, to ne odonjo ei polo mondo koro ochung’ e nyim Nyasaye e lowa.
25 Mano ne ok tim ni mondo ochiwre owuon nyading’eny kaka jadolo maduong’ jadonjo ei kama ler higa ka higa kotiyo gi remo ma ok mare owuon.
26 Nono to dine odwarore ni osandre nyading’eny nyaka a chakruok mar piny. To koro sani ma en giko mar ndalogo, osebiro owuon dichiel ma ok bi nwo kendo, mondo otiek richo kokalo kuom chiwo ngimane owuon kaka misango.
27 Kendo mana kaka tho orito dhano dichiel ma ok bi nwo kendo, eka bang’ mano bura,
28 e kaka Kristo bende ne ochiw dichiel ma ok bi nwo kendo, mondo oting’ richo mag ji mang’eny; kendo e kinde mar ariyo ma obiro fwenyoree, ok obi timo kamano mondo ogol richo, to mondo joma manye gi kinda ka gigeno yudo warruok obi onene.
Weche Moler Piny
^ Tiende ni, luoko ji kod gik moko ka luwore gi kaka Chik Musa ne dwaro.
^ Tiende ni, “dhiang’ ma dhako ma pok onyuol.”
