Jo-Kolosai 1:1-29
1 An Paulo, jaote Kristo Yesu kokalo kuom dwaro mar Nyasaye, ka an gi Timotheo owadwa,
2 andikonu un joma ler duto man Kolosai kod owete mochung’ motegno e yie kendo manie winjruok achiel gi Kristo, ka awacho niya:
Ng’wono mogundho kod kuwe moa kuom Nyasaye Wuonwa mondo obed kodu.
3 Kinde duto wagoyo erokamano ne Nyasaye ma Wuon Ruodhwa Yesu Kristo sama walamonu
4 kane wawinjo wach yie ma un-go kuom Kristo Yesu kod kaka uhero joma ler duto
5 nikech geno mosekannu e polo. Ne uwinjo wach genono kokalo kuom adiera mar wach maber
6 mosechoponu. Mana kaka wach maber yudo nyak kendo omedore e piny duto, kamano bende e kaka timore e kindu, chakre chieng’ ma ne uwinje mi ung’eyo e yo malong’o wach ng’wono mogundho mar Nyasaye gadier.
7 Mano e gima usepuonjoru kuom Epafra ma en misumba wadwa ma wahero, kendo jatich mogen mar Kristo e lowa.
8 Ne onyisowa bende wach herau munyago kuom roho maler.
9 Mano bende e momiyo nyaka a chieng’ ma ne wawinjo wachno, pok ne waweyo lamonu ka wakwayo mondo opong’u chuth gi ng’eyo malong’o kuom dwarone e rieko duto, kod winjo tiend weche kokalo kuom roho maler,
10 eka uwuoth e yo mowinjore e wang’ Jehova mondo ubed malong’one chuth sama udhi nyime nyago olemo e tije mabeyo duto, kendo umed bedo gi ng’eyo malong’o chuth kuom Nyasaye;
11 bende, ubed gi nyalo gi teko duto ka luwore gi duong’ mar nyalone eka mondo unan chutho kuom horuok, kendo gi mor,
12 ka ugoyo ne Nyasaye Wuonwa erokamano ma nomiyo un bende ubedo joma owinjore yudo pok kanyachiel gi joma ler manie ler.
13 Ne oresowa waa e bwo teko loch mar mudho mi ne orwakowa ei pinyruodh Wuode mohero,
14 ma kuome, osegonywa kokalo kuom rawar ma miyo iweyonwa richowa.
15 En e ma en kido mineno mar Nyasaye ma ok ne, en e jal makayo kuom chuech duto;
16 nikech kokalo kuome, ne ochue gik mamoko duto manie polo gi manie piny, gik mineno gi ma ok ne, gibed kombe ruodhi, kata migepe mag telo, kata pinjeruodhi, kata teko mag loch. Gik mamoko duto osechue kokalo kuome, kendo ne en.
17 Bende, en e ma ne okwongo ne gik mamoko duto, kendo kokalo kuome ne omi gik mamoko duto obetie,
18 kendo en e ma en wi ringruok, tiende ni kanyakla. En e ma en chakruok, jal makayo koa kuom joma otho, mondo obed jal mokwongo e gik moko duto;
19 nimar Nyasaye ne dwaro ni gik moko duto odag kuome e okang’ mopong’ chuth,
20 kendo kokalo kuome, Nyasaye okel winjruok e kinde owuon gi gik mamoko duto, gibed gik manie piny kata gik manie polo, koloso kodgi kuwe kokalo kuom remo ma Kristo nochuero kane en e yadh-sand.
21 Kuom adier, un ma chon ne un mabor kendo ne un wasigu nikech pachu ne ni kuom timbe maricho,
22 koro sani oseloso winjruok e kindu kode kokalo kuom thone e del mar ring’o gi remo, mondo ochiwu ka uler ma onge ketho kendo ma onge gima ng’ato donjonugo e nyime—
23 to mana ka udhi nyime bedo e yie, ka uguroru matek e miseno, kendo ka uchung’ motegno ma ok golu e geno mar wach maber ma ne uwinjo kendo ma oseyal ne chuech duto manie bwo polo. An Paulo, ne abedo jatich mar yalo wach maberno.
24 Sani koro amor kuom sandruokna nikech un, kendo ayudo masiche mag Kristo ma ringrena pok okaloe, ka atimo kamano e lo ringrene ma en kanyakla.
25 Ne abedo jatich mar kanyaklani ka luwore gi ting’ moa kuom Nyasaye ma nomiya nikech un, mondo ayal wach Nyasaye chuth,
26 ma en wach maler moum ma ne opand chakre e ndalo machon kendo chakre e tienge machon. To koro sani oseele ne joge maler
27 ma Nyasaye oseyiero mondo omi ging’e duong’ mogundho mar wach maler moumno e kind ogendni, tiende ni Kristo manie winjruok achiel kodu ma ugeno yudogo duong’ kanyachiel.
28 En e jal ma wayalo wachne ka wasayo kendo puonjo ng’ato ka ng’ato e rieko duto, mondo wachiw ng’ato ka ng’ato koromo chuth e winjruok achiel gi Kristo.
29 Mano e momiyo atiyo matek, ka akedo ka luwore gi teko ma omiya, ma tiyo kuoma e yo maduong’ ahinya.
