Johana 10:1-42
10 “Adier, adier, awachonu ni, ng’at ma ok luw dhoot sama odonjo e kund rombe, to oidho kodonjo gi yo machielo, ng’atno en jakuo kendo en jayeko.
2 To ng’at ma luwo dhoot sama odonjo en jakwadh rombe.
3 Jarit-dhoot yawone kendo rombe winjo dwonde. Kae to oluongo rombene owuon gi nyingegi, eka otayogi kogologi oko.
4 Ka osegolo rombe duto ma mage owuon oko, otelo e nyimgi kae to rombego luwo bang’e, nikech ging’eyo dwonde.
5 Ok gibi luwo ng’at ma gikia ngang’, to gibiro ringo ng’atno nikech ok ging’eyo dwond joma gikia.”
6 Yesu nomiyogi ranyisino, to ne ok ging’eyo tiend gik ma nowachonegi.
7 Omiyo, Yesu nochako wachonegi kendo niya: “Adier, adier, awachonu ni, an e dhoot mar rombe.
8 Ji duto mosebiro kara, gin jokuo kendo joyeko; to rombe osetamore winjogi.
9 An e dhoot; ng’at ma donjo kokalo kuoma, ibiro rese, kendo obiro donjo iye mi owuog oko kendo onwang’ chiemo.
10 Jakuo ok bi ka ok mana ni mondo okwel, onek, kendo oketh gik moko. Asebiro mondo eka giyud ngima kendo mondo giyude mogundho.
11 An e jakwath maber; jakwath maber chiwo ngimane ne rombe.
12 Ng’at mondik tich ma ok en jakwath kendo ma rombe ok gin mage, ringo sama oneno ka ondiek biro mojwang’ rombe—eka ondiek makogi kendo keyogi—
13 nikech en ng’at mondik tich kendo ok odew rombe.
14 An e jakwath maber. Ang’eyo rombena kendo rombena bende ong’eya,
15 mana kaka Wuora ong’eya to an bende ang’eyo Wuora; kendo achiwo ngimana ne rombe.
16 “To an gi rombe mamoko ma ok gin mag kundni; gin bende nyaka akelgi iye, kendo giniwinj dwonda, mi ginibed kueth achiel e bwo jakwath achiel.
17 Mano e momiyo Wuora ohera, nikech achiwo ngimana, mondo eka achak ayude kendo.
18 Onge ng’at ma mayago, to achiwe kuom dwacha awuon. An gi teko mar chiwe, kendo an gi teko mar yude kendo. Chikni nayudo koa kuom Wuora.”
19 Wechego nomiyo Jo-Yahudi obedo gi ywaruok kendo.
20 Thothgi ne wacho niya: “En gi jachien kendo neko omake. Ang’o momiyo uwinje?”
21 Jomoko ne wacho kama: “Magi ok gin weche mag ng’at ma nigi jachien. Be jachien nyalo yawo wenge muofni?”
22 Gie kindeno, Sawo mar Walo Hekalu ne timore e Jerusalem. Ne en ndalo koyo,
23 to noyudo ka Yesu wuotho e hekalu e agola* miluongo ni agoch Solomon.
24 Eka Jo-Yahudi nolwore mi gichako wachone niya: “Ibiro miyo wasik gi kiawa nyaka karang’o? Ka in e Kristo, wachnwa ayanga.”
25 Yesu nodwokogi kama: “Ne asewachonu, to e ma ok uyie. Tije ma atimo e nying Wuora chiwo neno kuoma.
26 To ok uyie nikech ok un rombena.
27 Rombena winjo dwonda, to ang’eyogi kendo giluwa.
28 Amiyogi ngima ma nyaka chieng’, kendo ok nokethgi ngang’, bende onge ng’at ma nomayagi e lweta.
29 Gima Wuora osemiya en gima duong’ moloyo gik mamoko duto, kendo onge ng’at ma nyalo gologi e lwet Wuora.
30 An kod Wuora wan achiel.”
31 Jo-Yahudi nokwanyo kite mondo gichielego kendo.
32 Yesu nowachonegi kama: “Ne anyisou tije mabeyo mang’eny moa kuom Wuora. Kuom tijego, en tich mane momiyo uchiela gi kite?”
33 Jo-Yahudi nodwoke niya: “Wachieli gi kite, ok nikech tich moro maber, to nikech ichayo Nyasaye; nimar kata obedo ni in dhano, itimori iwuon ni in nyasaye.”
34 Yesu nopenjogi kama: “Donge ondik e Chiku ni, ‘Ne awacho ni: “Un nyiseche”’?
35 Ka Nyasaye noluongo joma wach Nyasaye oseketo bura kuomgi ni “nyiseche”—to ok nyal lok Ndiko—
36 an ng’at ma Wuora nopwodho mi ooro e piny, be duwachna ni, ‘Ichayo Nyasaye,’ mana nikech ne awachonu ni, ‘An Wuod Nyasaye’?
37 Ka ok atim tije mag Wuora, kik uyie kuoma.
38 To ka atimogi, kata obedo ni ok uyie kuoma, yieuru kuom tijego, eka ung’e kendo udhi nyime ng’eyo ni Wuora ni e winjruok achiel koda, kendo an e winjruok achiel kod Wuora.”
39 Omiyo, ne gitemo make kendo, to ne odhi kama ne ok ginyal yudee.
40 Eka nowuok modhi loka Jordan kendo, kama Johana ne batisoe ji kinde motelo, mi nobet kuno.
41 Kendo ji mang’eny nobiro ire mi gichako wacho niya: “Johana ok notimo kata ranyisi achiel, to gik moko duto ma Johana nowacho kuom ng’atni, osebet adier.”
42 Kendo ji mang’eny ma ne ni kanyo noketo yie kuome.
Weche Moler Piny
^ Magi gin kuonde miluwo ma nigi sirni molworogi kod tado e wigi.
