Johana 11:1-57
11 Koro ng’at moro ma nyinge Lazaro ne tuo; ne en Ja-Bethania ma en gweng’ gi Maria kod Maritha nyamin-gi.
2 Ma e Maria ma noolo mo ma nigi suya e tiende Ruoth mi notwoyogi gi yie wiye; Lazaro ma ne tuoni ne en owadgi.
3 Omiyo, nyiminenego ne ooro ne Yesu wach niya: “Ruoth, ne! osiepni mihero tuo.”
4 To ka Yesu nowinjo mano, nowacho kama: “Tuoni ok bi kelo tho, to en mar nyiso duong’ ma Nyasaye nigo mondo eka Wuod Nyasaye oyud duong’ kokalo kuom tuono.”
5 Koro Yesu nohero Maritha gi Maria nyamin mare kod Lazaro.
6 Kata kamano, ka nowinjo ni Lazaro ne tuo, nomedo bet kama ne entiere kuom ndalo ariyo.
7 Eka bang’ mano nowacho ne jopuonjrene niya: “Wadhiuru Judea kendo.”
8 Jopuonjrene nopenje kama: “Rabi, nyocha eka Jo-Judea dwaro chieli gi kite, to idok kuno kendo?”
9 Yesu nodwoko niya: “Donge odiechieng’ nigi seche 12 mag ler, koso? Ka ng’ato wuotho e ler mar odiechieng’ ok ochwanyre e gimoro amora, nikech oneno ler mar pinyni.
10 To ka ng’ato wuotho gotieno, ochwanyore nikech ler onge kuome.”
11 Bang’ ka nosewacho wechegi, nomedo kama: “Lazaro osiepwa nindo, to adhi kuno mondo achiewe.”
12 Eka jopuonjrene nowachone niya: “Ruoth, kare ka onindo to obiro winjo maber.”
13 Kata kamano, Yesu ne wuoyo kuom tho mar Lazaro. To gin ne giparo ni nowuoyo e wi nindo mar yueyo.
14 Eka gikanyono Yesu nowachonegi ayanga kama: “Lazaro otho,
15 kendo ail nikech un ni ne aonge kuno mondo ubed gi yie. To wadhiuru ire.”
16 Eka Thoma ma niluongo ni Rude, nowacho ne jopuonjre wetene kama: “Wan bende wadhiuru mondo watho kode.”
17 Ka Yesu nochopo, noyudo ka Lazaro osebedo ei liel kuom ndalo ang’wen.
18 To Bethania ne chiegni gi Jerusalem, bor ma dirom kilomita adek kama.
19 Kendo Jo-Yahudi mang’eny noyudo osebiro ir Maritha gi Maria mondo gihogi nikech owadgi.
20 Ka Maritha nowinjo ni Yesu ne biro, nodhi romone; to Maria nodong’ kobet pacho.
21 Eka Maritha nowacho ne Yesu niya: “Ruoth, ka dine bed ni in kae, owadwa dine ok otho.
22 To kata mana gie sani, ang’eyo ni gimoro amora mikwayo Nyasaye, Nyasaye biro miyi.”
23 Yesu nowachone kama: “Owadu biro chier.”
24 Maritha nodwoke niya: “Ang’eyo ni obiro chier e kinde chier chieng’ giko.”
25 Yesu nowachone kama: “An e chier kendo an e ngima. Ng’at ma nyiso yie kuoma, kata ka otho, obiro bet mangima kendo;
26 bende, ng’ato ang’ata mangima kendo ma nyiso yie kuoma ok bi tho ngang’. Be iyie gi mano?”
27 Nodwoke niya: “Ee, Ruoth, aseyie ni in e Kristo Wuod Nyasaye, jal ma ne onego obi e piny.”
28 Ka nosewacho mano, nowuok modhi luongo Maria nyamin-gi mowachone ka gin kar kendgi niya: “Japuonj ni kacha, kendo oluongi.”
29 Maria ka nowinjo mano, noa malo mapiyo modhi ir Yesu.
30 Yesu ne pok ochopo dala, pod ne en kama Maritha ne oromonee.
31 Ka Jo-Yahudi ma ne nigi Maria ei ot ka hoye noneno Maria kochung’ mapiyo mowuok oko, ne giluwe ka giparo ni nodhi e liel mondo oywag kuno.
32 Ka Maria nochopo kama Yesu ne nitie kendo nene, nopodho e tiendene mowachone niya: “Ruoth, ka dine bed ni in ka, owadwa dine ok otho.”
33 Ka Yesu ne onene koywak kendo Jo-Yahudi ma nobiro kode bende ne ywak, nowinjo malit mi chunye nochandore.
34 Nopenjo kama: “Ukete kanye?” Ne gidwoke niya: “Ruoth, bi mondo ine.”
35 Pi wang’ Yesu ne ochuer.
36 Eka Jo-Yahudi nochako wacho kama: “Neuru kaka nohere ahinya!”
37 To moko kuomgi nowacho niya: “Jali e ma noyawo wenge ng’at ma muofucha, donge nonyalo geng’o ng’atni kik tho?”
38 To nikech lit nomako Yesu kendo, ne odhi e liel. To adier, liendno ne en rogo moum dhoge gi kidi.
39 Yesu nowacho kama: “Ng’ieluru kidino oko.” Maritha, nyamin ng’at ma ne othono, nodwoke kama: “Ruoth, sani nyaka bed ni koro ong’ue marach, nimar koro ndalo ang’wen osekadho.”
40 Yesu nopenje niya: “Donge asewachoni ni ka iyie to inine duong’ mar Nyasaye?”
41 Omiyo, ne gigolo kidi oko. Eka Yesu noting’o wang’e malo e polo mowacho kama: “Wuora, agoyoni erokamano nikech isewinja.
42 Adier, ang’eyo ni iwinja kinde duto; to awuoyo nikech oganda ma sani ochung’ kolworo kae mondo eka giyie ni ne iora.”
43 To ka nosewacho wechego, nokok gi dwol maduong’ niya: “Lazaro, wuog oko!”
44 Ng’at ma noyudo osethono nowuok oko ka onal tiendene kod lwetene gi lewni, kendo wang’e ne obo gi nanga. Yesu nowachonegi kama: “Gonyeuru kendo uweye odhi.”
45 Kuom mano, thoth Jo-Yahudi ma nosebiro ir Maria kendo neno gima Yesu notimo, noketo yie kuome,
46 to moko kuomgi ne odhi ir Jo-Farisai mi ne giwachonegi gik ma Yesu notimo.
47 Omiyo, jodong-jodolo kod Jo-Farisai nochoko buch Sanhedrin kanyachiel mi ne giwacho niya: “Watim nang’o, nimar ng’atni timo ranyisi madongo mang’eny?
48 Ka waweye kamae, to ji duto biro keto yie kuome, kendo Jo-Rumi nobi mi ginikaw karwa kod ogandawa.”
49 Eka achiel kuomgi ma nyinge Kayafa, ma ne en jadolo maduong’ e higano, nowachonegi kama: “Ok ung’eyo gimoro amora kata matin,
50 kendo pok ufwenyo ni ber ka ng’at achiel otho ne ji kar mondo oketh oganda duto.”
51 Kata kamano, ok nowacho mano kuom dwache owuon, to nikech ne en jadolo maduong’ e higano, ne okoro ni Yesu ne dhi tho ne oganda,
52 to ok mana ne ogandano kende, to bende mondo ochok e achiel nyithind Nyasaye mosekere kuonde mopogore opogore.
53 Omiyo chakre chieng’no, ne giriwo paro kanyachiel mondo ginege.
54 Kuom mano, Yesu koro ne ok wuoth e lela e kind Jo-Yahudi, to noa kanyo modhi e alwora machiegni gi thim, e taon miluongo ni Efraim, kendo nobet kuno gi jopuonjrene.
55 To Pasaka mar Jo-Yahudi ne chiegni, kendo ji mang’eny ma noa e gwenge mokiewo gi kanyo noidho Jerusalem ka Pasaka pok ne ochopo mondo gipwodhre giwegi ka luwore gi chik.
56 Ne gimanyo Yesu kendo ne gipenjore e kindgi ka gichung’ koni gi koni e hekalu niya: “In ineno nade? Ni ok obi biro e sawo kata matin, koso?”
57 To jodong-jodolo kod Jo-Farisai nosechiko ni ng’ato ang’ata mong’eyo kama Yesu ne nitie ne onego oter wach mondo gimake.
