Johana 12:1-50
12 Kane odong’ ndalo auchiel to Pasaka chakore, Yesu nochopo Bethania, kama ne nitiere Lazaro ma Yesu nosechiero a kuom joma otho.
2 Omiyo, ne giloso ne Yesu nyasi moro kuno, kendo Maritha ne tiyonegi, to Lazaro ne en achiel kuom joma nobet piny e mesa kode.
3 Eka Maria nokawo mo ma nigi suya mamit, mor nad madier, ma en mo ma nengone tek gilala, kendo noolo morno e tiende Yesu mi notwoyogi gi yie wiye. Such morno nosaso odno.
4 To achiel kuom jopuonjrene ma nyinge Judas Iskariot, ma ne chiegni ndhoge, nowacho kama:
5 “Donge mo ma nigi suya mamitni dine ous dinari 300 mondo omi joma odhier?”
6 Kata kamano, nowacho mano ok nikech nodewo joma odhier, to nikech ne en jakuo kendo en e ma norito sandug pesa, to ne ojakwalo pesa moket ei sandugno.
7 Eka Yesu nowachonegi niya: “Wereuru kode mondo otim mano ka oika ne chieng’ yikna.
8 Nimar kinde duto un gi joma odhier, an to ok ubi bedo koda kinde duto.”
9 Gie kindeno, oganda mang’ongo mar Jo-Yahudi nofwenyo ni ne en kanyo, kendo ne gibiro kanyo, ok mana nikech Yesu kende, to bende mondo gine Lazaro ma nosechiero koa kuom joma otho.
10 Koro jodong-jodolo noriwo paro kanyachiel mondo gineg Lazaro bende
11 nikech en e ma ne omiyo Jo-Yahudi mang’eny ne dhi kuno kendo keto yie kuom Yesu.
12 Eka kinyne oganda mang’ongo ma nosebiro e sawono nowinjo ni Yesu ne biro Jerusalem.
13 Omiyo, ne gikawo bede othidhe kendo wuok oko mondo giromne, mi ne gichako kok niya: “Rese, wakwayi! Ng’at moguedh en ng’atno ma biro e nying Jehova Ruodh Israel!”
14 Kane Yesu oyudo nyathi punda moro, nobet kuome mana kaka ondik niya:
15 “Kik ibed maluor, in Nya-Sayun. Ne! Ruodhi biro ka oidho nyathi punda.”
16 Kar chakruok, jopuonjrene ok nong’eyo tiend wechego, to bang’ ka nosemi Yesu duong’, ne giparo ni gigo nondik kiwuoyo kuome kendo ni ne otimne gigo.
17 Koro oganda ma ne ni kode sama noluongo Lazaro mondo owuog oko e liel kochiere a kuom joma otho, ne siko ka chiwo neno.
18 Mani bende e gimomiyo ogandano nodhi romone, nikech ne gisewinjo ni notimo ranyisi maduong’no.
19 Omiyo, Jo-Farisai nowacho e kindgi niya: “Wachandore nono. Neuru! piny duto oseluwo bang’e.”
20 Koro ne nitie Jo-Grik moko e kind joma nobiro lemo e sawono.
21 Omiyo, jogo nodhi ir Filipo ma ne a Bethsaida mar Galili, kendo ne gichako kwaye niya: “Jaduong’, wadwaro neno Yesu.”
22 Filipo nodhi mowacho ne Andrea. Andrea gi Filipo nobiro mi giwacho ne Yesu.
23 Yesu nodwokogi kama: “Sa osechopo ma Wuod dhano onego omi duong’.
24 Adier, adier, awachonu ni, ka koth ngano ok olwar e lowo mi otho, osiko mana kodhi achiel; to ka otho, bang’e onyago olemo mang’eny.
25 Ng’ato ang’ata mohero ngimane ahinya, okethe, to ng’at mosin gi ngimane e pinyni, norit ngimaneno nyaka chop oyud ngima ma nyaka chieng’.
26 Ka ng’ato dwaro tiyona, to mondo oluwa, kendo kama antieree, kanyo bende ng’at ma tiyona nobedie. Ka ng’ato dwaro tiyona, Wuora biro miye duong’.
27 Sani chunya chandore, to awach ang’o? Wuora, resa kuom sa mosechoponi. Kata kamano, mano e momiyo asechopo e sa nogo.
28 Wuora, mi nyingi duong’.” Eka dwol moro nowuok e polo ka wacho niya: “Asemiye duong’, kendo abiro miye duong’.”
29 Oganda ma ne ochung’ kanyo nowinjo mano, mi ne gichako wacho ni polo oa mor. Jomoko ne wacho niya: “Malaika moro owuoyo kode.”
30 Yesu nodwoko kama: “Dwolno osewinjore, ok nikech an, to nikech un.
31 Koro nitie bura ming’ado ne pinyni, kendo jaloch mar pinyni ibiro wit oko.
32 To e ma bang’ koseng’awa malo aa e piny, abiro ywayo kit ji duto ira.”
33 Kuom adier, nowacho mano mondo onyisgo kit tho ma nochiegni thogo.
34 Eka oganda nodwoke kama: “Ne wawinjo koa e Chik ni Kristo siko nyaka chieng’. Ere kaka inyalo wacho ni Wuod dhano nyaka ng’aw malo? Wuod dhanono to e ng’a?”
35 To Yesu nokonegi niya: “Ler biro dhi nyime bedo e kindu kuom ndalo matin. Wuothuru sama pod un gi ler, mondo mudho kik lou; ng’ato ang’ata ma wuotho e mudho ok ong’eyo kama odhiye.
36 Ka pod un gi ler, nyisuru yie kuom ler, mondo eka ubed nyithind ler.”
Yesu nowacho wechego kae to nowuok modhi pondonegi.
37 Kata obedo ni nosetimo ranyisi madongo mang’eny ahinya e nyimgi, ne ok giket yie kuome,
38 mondo eka wach janabi Isaya ochop ma nokoro niya: “Jehova, en ng’a moseketo yie kuom gima ne giwinjo koa kuomwa? To kuom wach bad Jehova, oseele ne ng’a?”
39 Gimomiyo ne ok ginyal keto yie en ni, Isaya nokoro bende kama:
40 “Osedino wengegi kendo osemiyo chunygi obedo matek, mondo kik ginen gi wengegi mi chunygi winj tiend wach, kendo kik gilokre mi achanggi.”
41 Isaya nokoro wechego nimar noneno duong’ mar Kristo, kendo nowuoyo kuome.
42 To adier, kata mana jotelo mang’eny noketo yie kuome, to ne ok ginyal hulo mano ayanga nikech ne giluoro Jo-Farisai mondo kik riembgi a e sunagogi;
43 nimar ne gihero duong’ moa kuom dhano moloyo kata mana duong’ mar Nyasaye.
44 Kata kamano, Yesu nokok niya: “Ng’ato ang’ata ma keto yie kuoma, ok oket yie kuoma kende, to oketo yie bende kuom Ng’at ma ne oora;
45 kendo ng’at ma nena, oneno bende Ng’atno ma noora.
46 Asebiro ka an ler e piny, mondo ng’ato ka ng’ato ma keto yie kuoma kik sik e mudho.
47 To ka ng’ato winjo wechenagi to ok oritgi, ok ang’adne bura; nimar nabiro, ok ni mondo ang’ad ne piny bura, to mondo ares piny.
48 Ng’ato ang’ata ma chaya kendo ma ok rwak wechenagi, en gi gima ng’adone bura. Wach ma asewacho e ma biro ng’adone bura e chieng’ giko.
49 Nimar pok awuoyo kuom dwacha awuon, to Wuora ma ne oora e ma osemiya chik owuon kuom gima onego awach kod gima onego apuonj.
50 Kendo ang’eyo ni chikne en ngima ma nyaka chieng’. Kuom mano, weche ma awacho, awachogi mana kaka Wuora osewachona.”
