Johana 13:1-38
13 Koro, Yesu nong’eyo ka sawo mar Pasaka pok nochopo ni sane mar a e pinyni kodok ir Wuoro nosetundo. Nikech nosebedo kohero joge owuon ma ne ni e piny, noherogi nyaka giko.
2 Chiemo modhiambo ne pod dhi nyime, kendo Jachien nosedonjo e chuny Judas Iskariot wuod Simon mondo ondhoge.
3 Kuom mano, nikech Yesu nong’eyo ni Wuoro nosechiwo gik moko duto e lwete, to ni noa ir Nyasaye kendo ne odhi dok ir Nyasaye,
4 noa malo ka pod chiemo modhiambono ne dhi nyime, kae to noketo lepe ma oko tenge. Eka nokawo taulo mi otueyo e nungone.
5 Bang’ mano, noketo pi e besen mi ochako lwoko tiende jopuonjrene kendo twoyogi gi taulo ma notueyo kuome.
6 Eka ka nochopo ir Simon Petro, Petro ne openje niya: “Ruoth, ilwoko tiendena adier?”
7 Yesu nodwoke kama: “Ok ing’eyo tiend gima atimo sani, to ibiro ng’eyo tiende bang’ gigi.”
8 Petro nowachone niya: “Ok ibi lwoko tiendena ngang’.” Yesu nodwoke kama: “Ka ok alwoko tiendeni, to ionge gi pok kanyachiel koda.”
9 Simon Petro nowachone niya: “Ruoth, kik ilwok mana tiendena kende, to lwok lwetena kod wiya bende.”
10 Yesu nokone niya: “Dwarore ni ng’ato ang’ata moselwokore olwokne mana tiendene kende, nimar dende duto ler. Un uler, to ok uduto.”
11 Nimar nong’eyo jal ma ne ndhoge. Mano e momiyo nowacho ni: “Ok ni uduto uler.”
12 Ka koro noselwoko tiendegi mi orwako lepe ma oko, nochako obet kendo e mesa, mowachonegi niya: “Be ung’eyo tiend gima asetimonu?
13 Un uluonga ni, ‘Japuonj,’ kendo ni, ‘Ruoth,’ to un kare nikech an kamano.
14 Kuom mano, ka an Ruodhu kendo Japuonju aselwoko tiendeu, un bende ng’ato ka ng’ato kuomu onego olwok tiende nyawadgi.
15 Nimar aketonu ranyisi, mondo mana kaka asetimonu, un bende onego utim kamano.
16 Adier, adier, awachonu ni, misumba ok duong’ moloyo ruodhe, kata ng’at moor ok duong’ moloyo ng’at moore.
17 Kung’eyo wechegi, un joma mor ka utimogi.
18 Ok awuo kuomu uduto; ang’eyo joma aseyiero. To en kamano mondo Ndiko ochop ma wacho niya: ‘Ng’at ma ne jachamo makatena oseting’o ofunj tiende kuoma.’
19 Chakre sani ka dhi nyime, awachonu wachno ka pok otimore mondo ka otimore to uyie ni an e en.
20 Adier, adier, awachonu ni, ng’ato ang’ata ma rwako ng’at ma aoro, orwaka an bende, kendo ng’at ma rwakano, orwako bende Jal ma ne oora.”
21 Bang’ wacho wechegi, chuny Yesu nochandore, kendo nochiwo neno niya: “Adier, adier, awachonu ni, ng’at achiel kuomu biro ndhoga.”
22 Jopuonjrene nochako ng’iyore ka giwuoro ni en ng’a ma nowuoyo kuome.
23 Achiel kuom jopuonjre, ma en japuonjre ma Yesu nohero nobet but Yesu.
24 Omiyo, Simon Petro notimo ranyisi gi wiye kogwelo japuonjreno kendo kone niya: “Wachnwae ni owuoyo kuom ng’a.”
25 Kuom mano, japuonjreno noyiengore e kor Yesu kendo penje kama: “Ruoth, en ng’a?”
26 Yesu nodwoko kama: “En ng’atno ma abiro miyo bath makate ma aseluto e bakul.” Eka ka noseluto makate, nokawo mi omiyo Judas, wuod Simon Iskariot.
27 Bang’ ka Judas nosekawo bath makateno, Satan nodonjo kuome. Omiyo, Yesu nowachone kama: “Gima itimo, time mapiyo moloyo.”
28 Kata kamano, onge ng’ato kuom joma nobet piny e mesa ma nong’eyo gimomiyo nowachone kamano.
29 Kuom adier, nikech Judas ne jating’o sandug pesa, moko kuomgi ne paro ni Yesu ne wachone ni, “Ng’iew gik ma dwarore ni watigo e sawo,” kata ni onego omi joma odhier gimoro.
30 Bang’ kawo bath makateno, nowuok oko gikanyono. To ne en otieno.
31 Ka koro Yesu nosewuok oko, nowachonegi niya: “Koro Wuod dhano osemi duong’, kendo Nyasaye yudo duong’ kokalo kuome.
32 Nyasaye owuon biro miye duong’, kendo obiro miye duong’ gikanyono.
33 Nyithindo matindo, pod an kodu mana kuom kinde matin. Ubiro manya; to mana kaka nawacho ne Jo-Yahudi ni, ‘Kama adhiyoe ok unyal biroe,’ koro awachonu un bende.
34 Amiyou chik manyien, ni ubed gi hera e kindu; mana kaka aseherou, un bende herreuru e kindu.
35 Ma e ma nomi ji duto ong’e ni un jopuonjrena—ka un gi hera e kindu uwegi.”
36 Simon Petro nopenje kama: “Ruoth, idwaro dhi kanye?” Yesu nodwoko niya: “Kama adhiyoe ok unyal luwae sani, to ubiro luwa bang’e.”
37 Petro nokone kama: “Ruoth, ang’o momiyo ok anyal luwi sani? Abiro chiwo ngimana nikech in.”
38 Yesu nodwoko niya: “Be ibiro chiwo ngimani nikech an? Adier, adier, awachoni ni, thwon-gweno ok bi kok ngang’ nyaka chop ikwer nyadidek ni ok ing’eya.”
