Johana 16:1-33
16 “Asewachonu wechegi mondo kik uchwanyru.
2 Ji biro riembou ua e sunagogi. Kuom adier, ndalo biro ma ng’ato ang’ata monegou biro paro ni otiyo ne Nyasaye.
3 To gibiro timo mago duto nikech pok ging’eyo Wuora, kata an.
4 Kata kamano, asewachonu gigo mondo ka sa ma gibiro timoree ochopo, unupar ni ne awachonugi.
“Ok ne awachonugi e kar chakruok nimar ne an kodu.
5 To sani awuok adhi ir Jal ma noora; to e ma pod onge kata ng’ato kuomu ma penja ni, ‘Idwaro dhi kanye?’
6 To nikech asewachonu wechegi, lit osepong’o chunyu.
7 Kata kamano, awachonu adier ni, awuok adhi mondo un e ma uyud ber. Nikech ka ok adhi, jakonyno ok bi bironu; to ka adhi, abiro ore iru.
8 Kendo ka jakonyno obiro, enonyis piny ayanga tiend richo, gi tiend tim makare, kod tiend bura mar Nyasaye:
9 mokwongo, enonyis gima tiend richo en, nikech ji ok nyis yie kuoma;
10 eka enonyis gima tiend tim makare en, nimar awuok adhi ir Wuora to un ok ubi nena kendo;
11 eka gima enonyis tiend bura mar Nyasaye, nimar oseng’ad bura ne jaloch mar pinyni.
12 “Pod an gi gik mang’eny monego awachnu, to ok unyal winjo tiendgi gie sani.
13 Kata kamano, ka jakonyno obiro, ma en roho mar adiera, obiro tayou ei adiera duto, nimar ok obi wuoyo kuom dwache owuon, to gik mowinjo e ma obiro wacho, kendo obiro landonu gik ma biro.
14 Jakonyno biro miya duong’, nikech gik ma obiro yudo gin maga, kendo obiro landonugi.
15 Gik moko duto ma Wuora nigo, gin maga. Mano e momiyo awachonu ni, gik ma jakonyno yudo gin maga, kendo olandonugi.
16 Pod odong’ kinde matin to ok ubi nena kendo, to bende, bang’ kinde matin ubiro nena.”
17 Eka moko kuom jopuonjrene nopenjore e kindgi niya: “Sama owachonwa ni, ‘Pod odong’ kinde matin to ok ubi nena kendo, to bende, bang’ kinde matin ubiro nena,’ kendo ni, ‘nikech awuok adhi ir Wuora,’ mago tiendgi ang’o?”
18 Omiyo, ne gipenjore kama: “Sama owacho ni, ‘pod odong’ kinde matin,’ mano tiende en ang’o? Ok wang’eyo gima owuoyoe.”
19 Yesu nong’eyo ni ne gidwaro penje, omiyo nokonegi kama: “Usepenjoru e kindu kuom wachni nikech asewachonu ni: ‘Pod odong’ kinde matin to ok ubi nena kendo, to bende, bang’ kinde matin ubiro nena?’
20 Adier, adier, awachonu ni, ubiro ywak kendo goyo nduru, to piny biro mor; unuwinj lit, to lit maru biro lokore mor.
21 Sama dhako nyuol, owinjo rem malit nikech sane osechopo, to ka osenyuolo nyathi, ok opar litno kendo nikech mor ma en-go ni osenyuolo ng’ato e piny.
22 Omiyo, sani un bende uwinjo lit; to abiro nenou kendo. Bende, chunyu nobed mamor kendo onge ng’ato ma biro mayou moru.
23 E chieng’no, ok unupenja wach moro kata matin. Adier, adier, awachonu ni, kukwayo Wuora gimoro amora, obiro miyougo e nyinga.
24 Nyaka chop sani pok ukwayo kata gimoro achiel e nyinga. Kwauru to ubiro yudo kendo mor maru nobed moromo chuth.
25 “Asewachonu wechegi ka atiyo gi ngeche. Sa biro ma ok abi wuoyo kodu gi ngeche, to abiro wuoyonu maler e wi Wuora.
26 E chieng’no, ubiro kwayo Wuora e nyinga; kuom wacho mano, ok anyis ni abiro kwayonu.
27 Nimar Wuora owuon oherou, nikech usehera kendo useyie ni ne abiro tiyo e lo Nyasaye.
28 Ne abiro e piny e lo Wuora. Koro awuok e piny kendo adok ir Wuora.”
29 Jopuonjrene nowacho niya: “Ne! Koro to iwacho maler, kendo ok iti gi ngero.
30 Koro wang’eyo ni ing’eyo weche duto kendo ok ochuno ni irit ng’ato openji nikech ing’eyo gima ng’ato paro. Mano miyo wang’eyo ni ne ia ir Nyasaye.”
31 Yesu nodwokogi kama: “Be koro uyie?
32 Neuru! Sa biro kendo adier osechopo, ma ubiro ke ng’ato ka ng’ato nyaka e ode owuon, kendo unuweya kenda. To ok an kenda nimar Wuora ni koda.
33 Asewachonu wechegi ni mondo kokalo kuoma ubed gi kuwe. E piny ubiro yudo masira, kata kamano beduru gi chir! Aseloyo piny.”
