Johana 17:1-26
17 Bang’ ka Yesu nosewacho wechego, noting’o wang’e e polo mowacho kama: “Wuora, sa osechopo. Mi wuodi duong’ mondo wuodi omiyi duong’
2 mana kaka isemiye teko e wi ji duto, eka mondo ochiw ngima ma nyaka chieng’ ne jogo duto ma isemiye.
3 Ma e ngima ma nyaka chieng’, ni ging’eyi in Nyasaye makende mar adier kod jal ma ne ioro, Yesu Kristo.
4 Asemiyi duong’ e piny, nimar asetieko tich ma nimiya mondo atim.
5 Omiyo, koro Wuora, miya duong’ e bathi, duong’ ma chal gi ma ne an-go e bathi kane piny pok obetie.
6 “Asemiyo nyingi ong’ere ne joma ne imiya koa e piny. Ne gin meki, to ne imiyagi, kendo giserito wachni.
7 Koro giseng’eyo ni gik moko duto ma ne imiya noa kuomi;
8 nikech asechiwonegi weche ma ne imiya, mi ne girwakogi, kendo kuom adier giseng’eyo ni ne abiro e loyi kendo giseyie ni niora.
9 Akwayo nikech gin; ok akwa ne piny, to akwayo nikech jogo misemiya, nimar gin jogi;
10 kendo giga duto gin magi to meki gin maga; bende, aseyudo duong’ e diergi.
11 “Koro ok an e piny, to gin, gin e piny, an to abiro iri. Wuora Maler, ritgi nikech nyingi iwuon misemiya, mondo gibed achiel mana kaka wan kodi wan achiel.
12 Kane an kodgi, ne ajaritogi nikech nyingi iwuon ma isemiya; kendo aseritogi maber, mi onge kata achiel kuomgi mosekethore mak mana wuod kethruok, mondo weche manie Ndiko ochop.
13 To koro abiro iri, kendo awacho wechegi e piny mondo mor mara obed kuomgi moromo chuth.
14 Asemiyogi wachni, to piny osin kodgi, nikech ok gin mag piny, mana kaka an ok an mar piny.
15 “Ok akwayi ni mondo igolgi e piny, to mondo iritgi nikech Ng’at Marach.
16 Ok gin mag piny, mana kaka an ok an mar piny.
17 Pwodhgi gibed maler kokalo kuom adiera; wachni en adiera.
18 Mana kaka niora e piny, an bende aorogi e piny.
19 Asiko ka apwodhora mondo abed maler nikech gin, mondo gin bende opwodhgi gibed maler kokalo kuom adiera.
20 “Ok akwa ne jogi kende, to bende ne joma keto yie kuoma kokalo kuom wachgi,
21 mondo eka giduto gibed achiel, mana kaka in, Wuora, in e winjruok achiel koda, kendo an e winjruok achiel kodi, mondo gin bende gibed e winjruok achiel kodwa, eka piny oyie ni niora.
22 Asemiyogi duong’ ma isemiya mondo eka gibed achiel mana kaka wan kodi wan achiel.
23 Mondo abed e winjruok achiel kodgi, kendo ibed e winjruok achiel koda, eka mondo gibed achiel e okang’ malong’o chuth, mondo piny ong’e ni niora kendo ni ne iherogi mana kaka ne ihera.
24 Wuora, adwaro ni joma isemiya obed kama antieree, mondo gine duong’ misemiya, nimar ne ihera ka chakruok mar piny ne podi.
25 Wuora makare, kuom adier, piny pok ong’eyi, to aseng’eyi kendo jogi oseng’eyo ni niora.
26 Asemiyo nyingi ong’erenegi kendo abiro miyo omed ng’ere, mondo eka hera ma ne iherago obed kuomgi, kendo abed e winjruok achiel kodgi.”
