Johana 18:1-40
18 Bang’ ka Yesu nosewacho wechegi, nowuok gi jopuonjrene mi ging’ado Hoho mar Kidron, kendo ne gidhi kama ne nitie puodho moro, eka en kaachiel gi jopuonjrene ne gidonjo ei puodhono.
2 Koro Judas ma ne en jandhokne bende nong’eyo kanyo, nikech kinde mang’eny Yesu ne jadhi kanyo gi jopuonjrene.
3 Omiyo, Judas nokawo kidieny mar jolweny kod askeche mag jodong-jodolo gi mag Jo-Farisai, mi ne gidhi kanyo ka giting’o rameny, gi teyni, kod gige lweny.
4 Nikech Yesu nong’eyo gik moko duto ma ne dhi timorene, nowuok e lela mopenjogi niya: “En ng’a ma umanyo?”
5 Ne gidwoke ni, “Yesu ma Ja-Nazareth.” Nokonegi kama: “An e en.” Judas ma ne en jandhokne bende ne ochung’ kodgi.
6 To ka Yesu nowachonegi ni, “An e en,” ne gisudo chien mi gipodho piny.
7 Omiyo, nopenjogi kendo niya: “En ng’a ma umanyo?” Ne gidwoke ni, “Yesu ma Ja-Nazareth.”
8 Yesu nowachonegi niya: “Asenyisou ni an e en. Omiyo, ka an e ma umanya, weuru jogi mondo odhi.”
9 Mano ne dhi chopo gima nosewacho kama: “Kuom jogo duto ma isemiya, pok alalo kata achiel.”
10 Eka Simon Petro ma ne nigi ligangla, nowuodho mi ne ochadhogo misumba mar jadolo maduong’ kendo nong’ado ite ma korachwich oko. Nying misumbano ne en Malko.
11 To Yesu nowacho ne Petro kama: “Duok liganglano e kirope. Donge owinjore amadh okombe ma Wuora osemiya?”
12 Eka askeche kod jatend-jolweny* gi askeche mag Jo-Yahudi, nomako Yesu mi gitueye.
13 Ne gitere mokwongo ir Anas, nikech ne en wuon chi Kayafa, ma ne en jadolo maduong’ e higano.
14 Kuom adier, Kayafa e ma noseng’ado ne Jo-Yahudi rieko ni, ne gidhi yudo ber ka ng’at achiel otho e lo oganda.
15 Koro Simon Petro kaachiel gi japuonjre moro machielo ne luwo Yesu. Jadolo maduong’ nong’eyo japuonjreno, kendo japuonjreno nodonjo gi Yesu nyaka e laru mar jadolo maduong’,
16 to Petro ne ochung’ oko e dhoot. Omiyo, japuonjre machielo ma jadolo maduong’ nong’eyono, nowuok oko mi owuoyo gi jarit-dhoot kendo norwako Petro iye.
17 Eka jatich ma nyako, ma e ma ne rito dhoot, nopenje niya: “In bende in achiel kuom jopuonjre ng’atni, koso?” Nodwoko kama: “Ooyo, ok an.”
18 Koro wasumbnigo kod askeche ne ochung’ ka gioyo mach mar makaa ma ne gisemoko nikech piny ne ng’ich. Petro bende ne ochung’ kodgi ka ooyo majno.
19 Omiyo, jaduong’-jodolo nopenjo Yesu wach jopuonjrene kod wach puonjne.
20 Yesu nodwoko kama: “Asewuoyo gi piny e lela. Kinde duto, ne apuonjo e sunagogi kendo e hekalu kama Jo-Yahudi duto ne chokoree, kendo onge gima ne ajawacho ling’ling’.
21 Ang’o momiyo ipenja? Penj joma osewinjo gik ma ne awachonegi. Ne! Jogo ong’eyo gik ma nawacho.”
22 Bang’ wacho wechego, achiel kuom askeche ma ne ochung’ machiegni gi Yesu nothalo wang’e kendo wacho niya: “Mano e kaka inyalo dwoko jaduong’-jodolo adier!”
23 Yesu nodwoko kama: “Kapo ni awacho gimoro marach, chiw ane neno kuom gima rachno; to ka gima asewacho ni kare, ang’o momiyo igoya?”
24 Eka Anas nochiko ni oter Yesu ir Kayafa jadolo maduong’ kotueye.
25 Koro Simon Petro noyudo ochung’ kanyo ka ooyo mach. Eka ne giwachone niya: “In bende in achiel kuom jopuonjrene, koso?” Nokwer kama: “Ooyo, ok an.”
26 Achiel kuom wasumbni mag jadolo maduong’ ma ne en wat jal ma Petro noseng’ado ite okocha, nowacho niya: “Donge nende aneni e puodho kode?”
27 To Petro nokwer kendo, eka gikanyono thwon-gweno nokok.
28 Eka ne gigolo Yesu ir Kayafa mi gitere e od Pilato gavana mar Judea. Koro ne en okinyi mang’ich. To gin giwegi ne ok gidonjo e od gavana, mondo kik gibed ma ok ler, mondo gibed mowinjore chamo Pasaka.
29 Omiyo, Pilato nowuok oko irgi mopenjogi niya: “En wach mane ma udonjonego ng’atni?”
30 Ne gidwoke kama: “Ka da bed ni ng’atni ok en jaketho, dine ok wakele iri.”
31 Kuom mano, Pilato nowachonegi kama: “Un uwegi kaweuru kendo ung’adne bura ka luwore gi chiku.” Jo-Yahudigo nowachone niya: “Chik ok oyienwa nego ng’ato.”
32 Mano ne en mondo wach ochop ma Yesu nosewacho konyisogo kit tho ma nodhi thogo.
33 Eka Pilato nodonjo kendo e ode kae to noluongo Yesu mopenje niya: “In e Ruodh Jo-Yahudi, koso?”
34 Yesu nodwoko kama: “Be ipenja kamano kuom dwachi iwuon, koso en nikech jomoko osewachoni weche kuoma?”
35 Pilato nodwoko kama: “An ok an Ja-Yahudi, donge? Ogandani iwuon kod jodong-jodolo osechiwi e lweta. En ang’o misetimo?”
36 Yesu nodwoko niya: “Pinyruodha ok en mar pinyni. Ka da bed ni Pinyruodha en mar pinyni, joga dine okedo mondo kik chiwa e lwet Jo-Yahudi. To adier Pinyruodha ok en moa kae.”
37 Omiyo, Pilato nopenje niya: “Kuom mano, kare in ruoth?” Yesu nodwoko kama: “In iwuon isewacho ni an ruoth. Mano e momiyo nonyuola, kendo mano e momiyo ne abiro e piny, ni mondo achiw neno e wi adiera. Ng’ato ka ng’ato man kor adiera winjo dwonda.”
38 Pilato nopenje niya: “Adiera en ang’o?”
Bang’ wacho mano, nowuok oko modhi ir Jo-Yahudi mokonegi niya: “Ok ayudo ketho moro amora kuome.
39 E wi mano, en timu ni onego agonynu ng’ato e Pasaka. Kuom mano, be udwaro ni agonynu Ruodh Jo-Yahudi?”
40 Eka ne gikok kendo niya: “Ok ng’atni, gonynwa mana Baraba!” Baraba ne en jamecho.
Weche Moler Piny
^ Jatelo achiel ne bedo gi askeche lweny 1,000 e bwoye.
