Johana 21:1-25
21 Bang’ mano, Yesu nofwenyore kendo ayanga ne jopuonjrene e Nam mar Tiberia. Nofwenyore e yo ma kama:
2 Simon Petro noyudo ochokore kanyachiel gi Thoma (ma bende ne iluongo ni Rude), gi Nathaniel moa Kana mar Galili, gi yawuot Zebedi, kod jopuonjrene mamoko ariyo.
3 Simon Petro nowacho kama: “Adwaro dhi lupo.” Ne gidwoke niya: “Wabiro dhi kodi.” Ne giwuok mi giidho yie, to e otienono ne ok gimako gimoro.
4 To ka piny koro ne chiegni ru, Yesu ne ochung’ e dho wath, to jopuonjrene ok nofwenyo ni en Yesu.
5 Eka Yesu nopenjogi niya: “Nyithindo, be un gi gima ducham?” Ne gidwoke niya: “Ooyo!”
6 Nowachonegi kama: “Boluru gogo e bath yie korachwich to ubiro yudo rech.” Eka ne gibolo, kendo koro ne ok ginyal ywaye mi girwake e yie, nikech rech ne ng’eny ahinya.
7 Omiyo, japuonjre ma Yesu nohero nowacho ne Petro kama: “En Ruoth!” Koro ka Simon Petro nowinjo ni en Ruoth, norwako nangane ma oko nikech ne en duk, kae to nochikore e nam.
8 To jopuonjre mamokogo ne odhi ka gin e yie matin ka giywayo gogo mopong’ gi rech, nimar ne ok gin mabor gi wath, chiegni ni ne en mita 90 kama.
9 Kane gisegowo e dho wath, ne gineno kanyo mach moro mar makaa, kendo rech kod makate ne ni e wi majno.
10 Yesu nokonegi kama: “Keluru moko kuom rech ma ua mako.”
11 Eka Simon Petro noidho yie, mi noywayo gogo mopong’ gi rech madongo 153 nyaka e dho wath. To kata obedo ni ne ging’eny kamano, gogo ok ne oyiech.
12 Yesu nowachonegi niya: “Biuru uchiem.” To onge kata japuonjre achiel ma nobedo gi chir mar penje ni: “In ng’a?” nikech ne ging’eyo ni ne en Ruoth.
13 Yesu nobiro mokawo makate mi omiyogi, bende notimo kamano gi rech.
14 Mani koro ne en nyadidek ma Yesu nofwenyore ne jopuonjre bang’ ka nosechiere a kuom joma otho.
15 Kane gisetieko chiemo, Yesu nopenjo Simon Petro niya: “Simon wuod Johana, be ihera moloyo magi?” Nodwoke kama: “Ee, Ruoth, ing’eyo ni aheri.” Yesu nowachone niya: “Pidh nyirombena.”
16 Nopenje kendo mar ariyo niya: “Simon wuod Johana, be ihera?” Nodwoke kama: “Ee, Ruoth ing’eyo ni aheri.” Yesu nowachone niya: “Kwa rombena matindo.”
17 Nopenje kendo mar adek kama: “Simon wuod Johana, be ihera?” Petro nokuyo nikech nopenje mar adek ni: “Be ihera?” Eka nodwoke niya: “Ruoth, ing’eyo weche duto; ing’eyo ni aheri.” Yesu nowachone kama: “Pidh rombena matindo.
18 Adier, adier, awachoni ni, kane hiki pod tin, ne ijarwakori kae to ibayo kuonde mihero. To ka iti, ibiro rieyo lweteni kendo ng’at machielo e ma biro rwakoni nanga kae to oting’i kendo oteri kama ok idwar.”
19 Nowacho mano mondo onyisgo kit tho ma nodhi miyogo Nyasaye duong’. Bang’ wacho mano, nokone niya: “Dhi nyime luwa.”
20 Petro nolokore, mi noneno japuonjre ma yande Yesu ohero ka luwogi, en e ma ne obet but Yesu e sa chiemo modhiambo mopenjo niya: “Ruoth, en ng’a ma dwaro ndhogi?”
21 Omiyo, ka nonene, Petro nopenjo Yesu kama: “Ruoth, to nade ng’atni?”
22 Yesu nodwoke kama: “Ka en dwacha ni mondo osik nyaka chop aduog, mano obadhi nade? In dhi nyime luwa.”
23 Omiyo, wachno nolandore e kind owete ni japuonjreno ne ok dhi tho. Kata kamano, Yesu ok nowacho ne japuonjreno ni jalo ne ok dhi tho, to nowacho niya: “Ka en dwarona ni mondo osik nyaka chop aduog, mano obadhi nade?”
24 Ma e japuonjre ma chiwo neno kuom gigi kendo nondiko wechegi, kendo wang’eyo ni neno mochiwo en madier.
25 Kuom adier, nitie bende gik mamoko mang’eny ma Yesu notimo ma ka dine bed ni ondikgi duto te, aparo ni piny dine ok onyalo ting’o buge* mondik.
Weche Moler Piny
^ Buge ma kamago ne gin midolo e kede, to ne ilosogi gi pien kata gi gik mamoko.
