Johana 7:1-52
7 Bang’ mano, Yesu nodhi nyime wuotho ei Galili nikech ne ok odwar wuotho e Judea, nimar Jo-Yahudi ne dwaro nege.
2 Kata kamano, Sawo mar Kiche mar Jo-Yahudi ne chiegni.
3 Omiyo, owetene nowachone kama: “Wuog kae idhi Judea eka jopuonjreni bende one gik mitimo.
4 Nimar ng’at ma dwaro ni ji ong’eye ok tim gik moko ling’ling’. Ka itimo gigi, nyisri iwuon ne piny.”
5 To adier, owetene ne ok nyis yie kuome.
6 Omiyo, Yesu nodwokogi niya: “Sana pok ochopo, to un sau nitie kinde duto.
7 Onge tiende mondo piny osin kodu, an to piny osin koda, nimar achiwo neno kuome ni timbene richo.
8 Un idhuru udhi e sawono; an pod ok adhi e sawono, nimar sana pok ochopo e wang’e.”
9 Omiyo, bang’ wachonegi wechego, ne odong’ Galili.
10 To ka owetene noseidho mi gidhi e sawo, en bende noidho modhi, ok ayanga, to ling’ling’.
11 Omiyo, Jo-Yahudi nochako manye e sawono ka gipenjo niya: “Ng’atcha ni kanye?”
12 Kendo ne nitiere weche moko ma ji ne kuodho kuome e kind oganda. Jomoko ne wacho niya: “En ng’at maber.” To moko ne wacho kama: “Ok en ng’at maber. Olalo oganda.”
13 To adier, onge ng’at ma ne wuoyo kuome e lela nikech ne giluoro Jo-Yahudi.
14 Ka sawo nosechopo e diere, Yesu noidho mi odhi e hekalu kendo nochako puonjo.
15 To Jo-Yahudi nowuoro mi gipenjore niya: “Ere kaka ng’atni ong’eyo Ndiko kama to pok opuonjore e skunde?”
16 Yesu to nodwokogi niya: “Weche ma apuonjo ok gin maga, to gin mag ng’at ma ne oora.
17 Ka ng’ato gombo timo dwach Ng’atno, obiro ng’eyo kabe puonjgo oa kuom Nyasaye kata ka gik ma awacho gin moa kuoma awuon.
18 Ng’ato ang’ata ma wacho weche moa kuome owuon dwaro duong’ mare owuon; to ng’at ma dwaro ni ng’atno ma oore oyud duong’, jali en ja adier kendo onge tim ma ok kare kuome.
19 Donge Musa nomiyou Chik, koso? To onge ng’ato kuomu ma timo kaka Chik dwaro. Ang’o momiyo udwaro nega?”
20 Oganda nodwoko kama: “In gi jachien. En ng’a ma dwaro negi?”
21 Yesu nodwokogi kama: “Nitie gimoro achiel ma natimo, to uduto uwuoro.
22 Nikech mano, Musa osemiyou tim tero nyangu—ok ni en tim mowuok kuom Musa, to owuok kuom kwere—kendo un utero ng’ato nyangu chieng’ sabato.
23 Ka ng’ato itero nyangu chieng’ sabato mondo eka kik keth Chik Musa, ubedo nade gi mirima mager koda nikech asemiyo ng’ato ochango chuth chieng’ sabato?
24 Weuru ng’ado bura gi kaka uneno ng’ato gi oko, to ng’aduru bura makare.”
25 Eka moko kuom joma nodak Jerusalem nochako wacho kama: “Donge ng’atni e jal ma gidwaro nego, koso?
26 To e ma pod neuru! owuoyo e lela, to onge gima giwachone. Dibed ni jotelo pok ong’eyo ni kuom adier ng’atni e Kristo, koso?
27 Mopogore gi mano, wang’eyo kama ng’atni owuokie; to ka Kristo obiro, onge ng’at ma biro ng’eyo kama owuokie.”
28 Eka sama Yesu ne puonjo e hekalu, nokok niya: “Ung’eya kendo ung’eyo kama awuokie. Kendo ok asebiro kuom dwacha awuon, to Ng’atno ma ne oora en ng’at ma nitie adier, to ok ung’eye.
29 An ang’eye, nimar asebiro e loye, kendo Ng’atno ne oora.”
30 Omiyo, ne gichako manyo kaka ne ginyalo make, to onge ng’at ma noketo lwete kuome nikech sane pok nochopo.
31 To pod thoth ji e oganda noketo yie kuome kendo ne giwacho niya: “Ka Kristo obiro, ok obi timo ranyisi madongo momedore moloyo ma ng’atni osetimo, koso?”
32 Jo-Farisai nowinjo ka oganda ng’ur e wi wechego nikech en, omiyo jodong-jodolo kod Jo-Farisai nooro askeche mondo omake.
33 Eka Yesu nowacho niya: “Abiro bet kodu kuom kinde matin ka pok adhi ir Ng’at ma ne oora.
34 Ubiro manya, to ok ununwang’a, kendo kama antie ok unyal biroe.”
35 Omiyo, Jo-Yahudi nopenjore e kindgi giwegi kama: “Ng’atni chano dhi kanye ma ok wabi nwang’ee? Dibed ni ochano dhi ir Jo-Yahudi mosekere e kind Jo-Grik mondo opuonj Jo-Grik, koso?
36 Wach ma owacho ni, ‘Ubiro manya, to ok ununwang’a, kendo kama antie ok unyal biroe,’ tiende en ang’o?”
37 E odiechieng’ mogik ma ne en chieng’ maduong’ mar sawo, Yesu ne ochung’ mokok niya: “Ka ng’ato nigi riyo, to obi ira mondo omodhi.
38 Ng’ato ang’ata ma keto yie kuoma, notimrene mana kaka Ndiko osewacho ni, ‘Aoche mag pi mangima biro mol koa e chunye ma iye.’”
39 Kata kamano, nowacho mano kowuoyo kuom roho maler ma joma noketo yie kuome ne chiegni yudo; nikech nyaka chop kanyo ne pok giyudo roho maler, nimar ne pok omi Yesu duong’.
40 Jomoko ma ne ni ei oganda ma nowinjo wechego nochako wacho niya: “Adier, jali e Janabi.”
41 Moko ne wacho kama: “Mani e Kristo.” To moko ne penjore niya: “Be Kristo onego obi koa e Galili, koso?
42 Donge kamoro ei Ndiko nowacho ni Kristo biro wuok e koth Daudi kendo wuok Bethlehem, ma en gweng’ ma Daudi ne nitie?”
43 Omiyo, ywaruok nobetie e kind oganda nikech en.
44 Kata kamano, moko kuomgi ne dwaro make, to onge ng’at ma noketo lwete kuome.
45 Eka askeche nodok ir jodong-jodolo gi Jo-Farisai, mi ne gipenjo askechego kama: “Ang’o momiyo ok ukele?”
46 Askechego nodwoko niya: “Onge ng’at ma osegawuoyo kamano ngang’.”
47 Kae to Jo-Farisai nopenjogi kama: “Dipo ni un bende osewuondu, koso?
48 Onge jatelo moro kata Ja-Farisai moseketo yie kuome, koso?
49 To ogandani ma ok ong’eyo Chik gin joma osekuong’.”
50 Nikodemo ma noyudo osebiro ire motelo kendo ma ne en achiel kuomgi, nowachonegi niya:
51 “Chikwa ok ng’ad ne ng’ato bura ka pok owinj kuome mondi mi ng’e gima osetimo, koso?”
52 Gin ne gidwoke kama: “Mit ka in bende ia Galili? Non ane, to ibiro neno ni onge janabi ma ne dhi betie koa Galili.”*
Weche Moler Piny
^ Gocho moko mogwaro machon kendo migeno ahinya onge gi wes 53 nyaka sula 8 wes 11.
