Juda 1:1-25
1 An Juda, misumba mar Yesu Kristo, kendo an owadgi Jakobo. Andikonu un jogo moyier ma Nyasaye Wuonwa ohero, un ma oritu ne Yesu Kristo, ka awacho kama:
2 Kech gi kuwe kod hera mondo omedrenu.
3 Un joma ahero, kata obedo ni ne atimo kinda ahinya mondo andiknu kuom wach warruok moriwowa kanyachiel, ne aneno ni ber mondo andiknu ka asayou, ni uked matek ne yie ma ne omi joma ler dichiel ma siko nyaka chieng’.
4 Gimomiyo atimo kamano en nikech nitie jomoko moseluchore mi gidonjo e kindu, kendo Ndiko noseyango chon ni ibiro ng’adnegi bura; gin joma ok oluoro Nyasaye, ma tiyo gi ng’wono mogundho mar Nyasachwa kaka gima girendorego mondo gitim timbe mag wang’-teko, kendo ok gimakre gi Yesu Kristo ma en Ruodhwa achiel kende ma wan joge.
5 Kata obedo ni ung’eyo malong’o wechegi duto, adwaro paronu ni nitiere oganda moro ma Jehova noreso kogologi e piny Misri, to bang’e noketho jogo ma ok nonyiso yie.
6 Bende, malaike ma ok nomakore gi migawo ma ne gin-go chon, kendo ma nojwang’o kar dakgi mowinjore kodgi, oseketo e mudho mandiwa kendo otueyogi gi nyoroche mochwere ka girito bura mar odiechieng’ maduong’no.
7 E yo ma kamano, Sodom gi Gomora kod taonde ma nolworogi bende nodonjore chuth gi timbe madongo mag terruok, kendo ne giluwo gombo mag ringruok mopogore gi gombo ma ne ochuego dhano; nikech giyudo kum mar bura mar mach ma nyaka chieng’, oseketgi e nyimwa mondo gibednwa kaka ranyisi ma miyowa siem.
8 Kata kamano, jogi bende donjore gi paro manono,* ka gitimo timbe ma chido ringruok, gichayo joma nigi teko mar telo e wigi kendo giwuoyo e yor achaya e wi joma Nyasaye osemiyo duong’.
9 To ka Mikael, ma en malaika maduong’ nobedo gi pogruok gi Jachien kane gin gi ywaruok kuom ringre Musa, ne ok ohedhore ng’ado ne Jachien bura kowuoyo kode e yor achaya, kar mano nowacho niya: “Jehova mondo okweri matek.”
10 To jogi wuoyo e yor achaya kuom gik moko duto ma kuom adier ok ging’eyo. Kendo gichal mana kaka le ma ok ti gi paro, nimar gik moko duto ma jogi ong’eyo, ging’eyogi mana gi rieko monyuolgo dhano duto, to mago e gik ma gidhi nyime timo kendo gigo kethogi.
11 Yaye nobednegi malit nikech giseluwo yor Kain, kendo giserikni donjo e yo marach mar dwaro pok kaka Balam, kendo giseyudo kethruok nikech donjo e weche mag ng’anjo kaka Kora!
12 Gin lwendni mopondo piny e bwo pi sama gichiemo kodu e nyasiu mag hera, gin jokwath ma chiemo ka gionge luoro; gin boche polo ma ok kel koth, ma yamo riembo ka tero koni gi koni; gin yien ma onge gi olemo e kinde ma yien duto nyagoe olemo, gin joma osetho nyadiriyo,* joma osepudh oko gi tiendegi;
13 gin apaka mager ma thuogo buoyo mar wich-kuot margi giwegi; gin sulwe ma onge gi yorgi moketnegi, kendo mudho mandiwa oritogi nyaka chieng’.
14 Ee, Enok ma en ng’at mar abiriyo koa kuom Adam, bende, nokoro wach kuomgi ka nowacho niya: “Neuru! Jehova nobiro gi ogandane maler tara gi tara
15 mondo ong’ad bura ne ji duto kendo mondo onyis ni bura oseloyo jogo duto ma ok oluoro Nyasaye nikech timbegi duto ma ok nyis luoro Nyasaye, ma ne gitimo e yo ma ok nyis luoro Nyasaye, kendo nikech gik ma kelo bwok ahinya ma joma richo ma ok oluoro Nyasaye nowacho marach kuome.”
16 Jogi gin jong’ur, ma ywagore kuom kaka ngimagi chal, ma luwo gombogi giwegi, kendo dhogi opong’ gi weche madongo mag pakruok, ka giwuondo ji gi weche mamit mondo gin e ma giyud gik ma gidwaro.
17 To un joma ahero, paruru weche ma joote mag Ruodhwa Yesu Kristo nosewacho motelo,
18 kaka ne gijowachonu niya: “Jojaro nobedie e kinde mag giko ka giluwo gombogi giwegi ma ok nyis luoro Nyasaye.”
19 Mago e joma kelo pogruok, gin gi kido kaka mag le, gin joma roho mar Nyasaye ok ta.
20 To un joma ahero, gerreuru uwegi e yieu maler chuth, kendo uwuo gi Nyasaye e lamo ka roho maler tayou
21 eka mondo uritru e hera mar Nyasaye, sama ukiyo yudo kech mar Ruodhwa Yesu Kristo ka un gi geno mar ngima ma nyaka chieng’.
22 Bende, dhiuru nyime kecho jomoko ma nigi kiawa;
23 resgiuru kugologi e mach. To udhi nyime kecho jomamoko, kutimo kamano gi luoro, ka bende usin kata mana gi nanga moro amora ma ringruok osemienoe chilo.
24 Koro kuom jal ma nigi nyalo mar ritou mondo kik uchwanyru kendo ma nyalo miyo uchung’ kuonge ketho moro amora e nyim duong’ mare, ka un gi mor maduong’,
25 ma en Nyasaye achiel kende ma Jawarwa kokalo kuom Yesu Kristo Ruodhwa, duong’ mondo obedne gi loch, gi nyalo, gi teko, kuom ndalo duto nyaka nene kod sani, kendo ndalo duto nyaka chieng’. Amin.
