Luka 11:1-54
11 Koro noyudo en kamoro kolemo, to ka notieko, achiel kuom jopuonjrene nowachone niya: “Ruoth, puonjwae kaka dwalem, mana kaka Johana bende nopuonjo jopuonjrene.”
2 Omiyo, nowachonegi kama: “Ka ulemo, wachuru niya: ‘Wuonwa, nyingi mondo obed maler. Pinyruodhi mondo obi.
3 Miwa chiembwa modiechieng’ kodiechieng’ ka luwore gi dwarowa mapile.
4 Kendo iwenwa richowa, nimar wan bende waweyo ne ji duto ma nigi gopewa; kendo kik iterwa e tem.’”
5 Eka nokonegi niya: “Wawach ni achiel kuomu nigi osiepne moro, to odhi ire e dier otieno kendo kwaye ni, ‘Osiepna, holae makate adek
6 nimar osiepna moro oa mana biro koa wuoth, to aonge gima anyalo miye.’
7 Eka osiepneno dwoke gi ei ot kama: ‘We chanda. Oselor dhoot kendo nyithinda matindo ni koda e otanda, ok anyal chung’ mondo amiyi gimoro.’
8 Awachonu ni, kata ka ok obi chung’ kendo miye gimoro kaka osiepne, kuom adier, nikech jalo siko ka kwaye gi kinda, obiro chung’ kendo miye gik modwaro.
9 Omiyo, awachonu ni, sikuru ka ukwayo to ibiro miu; sikuru ka umanyo to unuyud; sikuru ka udwong’o to ibiro yawnu.
10 Nimar ng’ato ang’ata ma kwayo, imiyo, kendo ng’at ma manyo, yudo, kendo ng’ato ang’ata ma dwong’o, ibiro yawne.
11 Kuom adier, en wuoro mane e kindu ma ka wuode okwaye rech to obiro miye thuol kar miye rech?
12 Kata en ng’a ma ka wuode okwaye tong’ to obiro miye thomoni?
13 Kuom mano, ka un, kata obedo ni un joma richo ung’eyo chiwo mich mabeyo ne nyithindu, donge Wuonu manie polo to biro chiwo roho maler e okang’ malach moloyo ne joma kwaye?”
14 Bang’e, nogolo jachien moro ma miyo ng’ato bedo momo. Ka jachiendno nosewuok, momono nowuoyo kendo oganda nohum nono.
15 To jomoko kuomgi nowacho niya: “Jali golo jochiende kotiyo gi teko Belzebub, jatelo mar jochiende.”
16 To mondo giteme, jomoko nochako ramo ni mondo omigi ane ranyisi moa e polo.
17 Nikech noseng’eyo gima ne giparo, nokonegi niya: “Pinyruoth ma nigi ywaruok e kinde owuon, kethore, kendo ot ma nigi ywaruok e kinde owuon, podho.
18 Kamano bende, ka Satan bende nigi ywaruok e kinde owuon, ere kaka pinyruodhe biro chung’? Nimar uwacho ni agolo jochiende ka atiyo gi teko mar Belzebub.
19 Ka agolo jochiende ka atiyo gi teko mar Belzebub, un to jou gologi gi teko mar ng’a? Mano e momiyo gining’adnu bura.
20 To ka agolo jochiende ka atiyo gi lith lwet Nyasaye, adier, Pinyruodh Nyasaye osebironu kukia.
21 Ka ng’at ma ratego momanore adimba gi gige lweny rito ode, gige siko korit maber.
22 To ka ng’at machielo ma ratego moloye obiro mi omonje kendo loye, ng’atno maye gige duto mag lweny ma nyocha oketoe geno, kae to opogo gik mosekawo kuome.
23 Ng’ato ang’ata ma ok ni kora, okedo koda, to ng’at ma ok chok ji koda, en ng’at ma keyogi.
24 “Ka jachien owuok kuom ng’ato, okalo kuonde ma onge pi komanyo kar yueyo, to ka ok oyudo, owacho ni, ‘Abiro dok e oda kama nawuokie.’
25 To bang’ chopo, oyudo ka oseyweye maler mobidhe.
26 Kae to odhi mokaw jochiende mamoko abiriyo maricho moloye, to bang’ donjo ei odno, gidak kanyo. Omiyo, gik ma timore mogik ne ng’atno bedo marachie moloyo mokwongo.”
27 Koro sama nowacho wechegi, dhako moro ma ne ni ei oganda noting’o dwonde ka wachone niya: “Mano kaka ich ma ne oting’i kod thunde ma ne idhodho mor ndi!”
28 To nodwoko kama: “Ooyo, kar mano, joma mor gin jogo ma winjo wach Nyasaye kendo timo!”
29 Ka oganda ne chokore kanyachiel, nochako wacho niya: “Tieng’ni en tieng’ marach kendo omanyo ranyisi, to onge ranyisi ma ibiro miye mak mana mar Jona.
30 Nimar mana kaka Jona nobedo ranyisi ne Jo-Nineve, e kaka Wuod dhano nobed ranyisi ne tieng’ni.
31 Ruoth ma dhako ma noa yo milambo ibiro chier e kinde bura gi jo tieng’ni, mi enonyis ni gin joma bura oloyo, nikech nobiro koa e tung’ piny mondo owinj rieko mar Solomon. To neuru! ng’at maduong’ moloyo Solomon ni kae.
32 Jo-Nineve biro chier e kinde bura gi tieng’ni, mi gininyis ni tieng’ni bura oloyo, nikech Jo-Nineve noloko chunygi a e richo ka Jona noyalonegi. To neuru! ng’at maduong’ moloyo Jona ni kae.
33 Bang’ moko taya, ng’ato kete, ok kama opondo kata e bwo okapu, to okete e wi gir chungo taya mondo joma donjo ei ot one ler.
34 Taya mar del en wang’. Ka wang’i ochomo kamoro achiel, dendi duto bende bet gi ler, to ka wang’i nigi ich-lit, dendi bende bet mudho.
35 Kuom mano, neuru ni ler man kuomu ok en mudho.
36 Omiyo, ka dendi duto ler ma onge kamoro amora ma nigi mudho, obiro bet maler mana kaka taya ma rieny ka chiwoni ler.”
37 Ka nosewacho mano, Ja-Farisai moro nokwaye mondo odhi ochiem kode. Omiyo, nodonjo e ode mobedo kode piny e mesa.
38 Kata kamano, Ja-Farisaino nowuoro bang’ neno ni ok nologo* mondi ka pok ochiemo.
39 To Ruoth nokone niya: “Koro un Jo-Farisai, ulwoko ng’e okombe kod san to e iu upong’ gi ich-lach kod gik maricho.
40 Un joma pachgi ok ni kare! Ng’at ma noloso ng’eye, donge noloso iye bende, koso?
41 To chiwuru mich mag konyo jochan kowuok e chunyu, kendo neuru! ubiro bet maler e gik mamoko duto.
42 Yaye nobednu malit un Jo-Farisai, nimar uchiwo achiel kuom apar mar mint,* kod rue,* gi kit alode mamoko duto, to usejwang’o tim makare kod hero Nyasaye! Nonego utim gigo, to ok ni koro ujwang’ gik mamokogo.
43 Yaye nobednu malit un Jo-Farisai nikech uhero kombe ma nyime e sunagoke kod mos e chirni!
44 Yaye nobednu malit nikech uchal gi liete ma wang’ ok ne malong’o ma ji wuothoe ka ok ging’eyo!”
45 Achiel kuom joma olony e Chik nodwoke niya: “Japuonj, sama iwacho wechego, wan bende iyanyowa.”
46 Eka nowacho kama: “Yaye nobednu malit un bende ma ulony e Chik nikech uketo ne ji ting’ ma ting’o tek, to un uwegi ok umul ting’go kata gi achiel kuom lith lweteu!
47 “Yaye nobednu malit nikech ugero liete jonabi, to kwereu e ma nonegogi!
48 Kuom adier, un joneno mag timbe kwereu, to e ma pod uyie kodgi, nimar ne ginego jonabi to un ugero lietegi.
49 Mano e momiyo rieko mar Nyasaye bende nowacho kama: ‘Abiro oronegi jonabi kod joote, mi ginineggi kendo ginisand moko kuomgi
50 mondo eka remb jonabi duto ma ne ochuer nyaka a chakruok piny obed e wi tieng’ni,
51 chakre gi remb Abel nyaka remb Zakaria, ma ne oneg e kind kendo mar misango kod ot.’* Ee, awachonu ni, ibiro ket rembgi e wi tieng’ni.
52 “Yaye nobednu malit un ma ulony e Chik nikech ne umayo ji ofungu mar ng’eyo Nyasaye. Un uwegi ne ok udonjo, to joma dwaro donjo bende ugeng’onegi!”
53 Koro ka noa kanyo, jondiko gi Jo-Farisai nochako chande ahinya kendo thung’e gi penjo momedore mang’eny
54 ka gikiye mondo gimake kuom gima nonyalo wacho.
Weche Moler Piny
^ Tiende ni, lwedo ma ok opwodh ka luwore gi tim Jo-Yahudi.
^ Mint, dil, kod kumin gin kit yien moko ma chalo alode ma ji pidho e puothe matindo kae to itiyo kodgi e medo ndhadhu e chiemo.
^ ‘Rue’ en ‘pega·non’ e dho Grik. En kit yath moro ma chalo alot, to itiyo kode e thieth kod medo ndhadhu e chiemo.
^ Tiende ni, hekalu.
