Luka 12:1-59
-
Thowi mar Jo-Farisai (1-3)
-
Luoruru Nyasaye, to ok dhano (4-7)
-
Ng’at ma hulo ni oyie kuom Kristo (8-12)
-
Ngero mar jamwandu mofuwo (13-21)
-
Weuru bedo gi parruok (22-34)
-
Kueth matin (32)
-
-
Beduru kurito (35-40)
-
Jarit mogen kod jarit ma ok ogen (41-48)
-
Ok kuwe, to pogruok (49-53)
-
Dwarore ni wanon kinde (54-56)
-
Loso ywaruok (57-59)
12 Gie kindeno, sama oganda mar ji gana mang’eny nosechokore kanyachiel ma koro ne ginyonore giwegi, nochako wuoyo kowacho ne jopuonjrene niya: “Beduru motang’ ne thowi mar Jo-Farisai, ma en wuondruok.
2 To onge gimoro mopand ahinya ma ok bi fwenyore, kendo onge wach maling’ling’ ma ok bi ng’ere.
3 Omiyo, gimoro amora muwacho e mudho ibiro winj e ler, to gima ukuodho e uteu kar kendu ibiro yal e tat udi.
4 E wi mano, un osiepena awachonu ni, kik uluor joma nego ringruok to bang’ mano ok ginyal timo gimoro mokalo kanyo.
5 To abiro nyisou ng’at monego uluor: Luoruru Ng’atno ma bang’ nego ng’ato, en gi nyalo mar wite e Gehena.* Ee, awachonu ni, luoruru Ng’atno.
6 Donge oyundi* abich ing’iewo mana gi nengo matin mar pesa ma mingli ariyo, koso? To e ma pod onge achiel kuomgi ma wi Nyasaye wilgo.
7 To un, kata mana yie wiu duto osekwan. Kik uluor; un nengou duong’ ahinya moloyo oyundi mang’eny.
8 “Awachonu ni, ng’ato ang’ata ma hulo e nyim ji ni oyie kuoma, Wuod dhano bende nohul e nyim malaike mag Nyasaye ni oyie kode.
9 To ng’at ma kwer e nyim ji ni ok ong’eya, abiro kwer e nyim malaike mag Nyasaye ni ok ang’eye.
10 Kendo ng’at ma nyiso achaya ne Wuod dhano, ibiro wene, to ng’ato ang’ata ma chayo roho maler ok nowene.
11 Ka giterou e nyim chokruok mar ji mang’eny, kata ir jo sirkal kata e nyim joloch, kik uparru kuom kaka ubiro dwoko weche modonjnugo, kata kuom gima ubiro wacho
12 nimar roho maler biro puonjou e sanogono gik monego uwach.”
13 Eka ng’at moro ei oganda nowacho niya: “Japuonj, nyis owadwa mondo opog koda gik ma wuonwa ne oweyo.”
14 Nopenje kama: “Omera, en ng’a moseketa jang’ad-bura kata jathek e kindu ji ariyo?”
15 Kae to nowachonegi niya: “Yawuru wang’u kendo utang’ gi yore duto mag ich-lach, nimar kata ka ng’ato nigi gik mogundho, ngimane ok otenore kuom gik ma en-go.”
16 Eka nogoyonegi ngero moro niya: “Puoth ng’at moro ma jamwandu ne onyak maber.
17 Omiyo, nochako parore ei chunye kama, ‘Nikech koro aonge gi kama dachokie chamba, ang’o ma abiro timo?’
18 Eka nong’ado niya, ‘Ma e gima abiro timo: Abiro muko utega mag keno kae to agero madongo moloyo, kendo kanyo anachokie chamba duto kod giga duto,
19 eka abiro wacho ne chunya kama: “Chunya, in gi gik mabeyo mang’eny misekano ne higni mang’eny ma biro; koro yue mos, chiem, imeth, kendo ibed mamor.”’
20 To Nyasaye nowachone kama, ‘In ng’at ma pache ok ni kare, e otieno ma kawuononi gidwaro ngimani. Kare gik misekanogo biro doko mag ng’a?’
21 Mano e kaka bedo gi ng’at ma kano mwandu ne en owuon, to ok en jamwandu e wang’ Nyasaye.”
22 Eka nowacho ne jopuonjrene niya: “Mano e momiyo awachonu ni, weuru bedo gi parruok kuom ngimau, e wi gima ubiro chamo, kata kuom dendu e wi gima ubiro rwako.
23 Nimar ngima oloyo ahinya chiemo kendo del oloyo lewni.
24 Nonuru winj agak: Ok gichuo kodhi kata keyo; gionge gi deche kata ute keno; to pod Nyasaye pidhogi. Donge un uber ahinya moloyo winy?
25 En ng’a kuomu ma kuom parruok onyalo medo bor mar ngimane kata mana gi bat achiel?
26 Omiyo, ka ok unyal timo gima tin kamano, ang’o momiyo uparoru e wi gik mamoko modong’go?
27 Nonuru kaka maua dongo: Ok gichandre gi tich kendo ok gitwang’ lewni; to akonu ni, kata mana Solomon e ber mar duong’ne duto, ok norwakore kaka achiel kuomgi.
28 Koro ka Nyasaye rwako yien ayiena manie papgo kamano, ma gin gik ma betie kawuono to kiny iwitogi e mach, mano kaka obiro rwakou moloyo, un joma nigi yie matin-gi!
29 Omiyo, weuru manyo gima ducham kod gima dumadh kendo weuru bedo gi parruok ahinya;
30 nikech mago duto e gik ma ogendni mag piny laworego gi kinda, to Wuonu ong’eyo ni uchando gigo.
31 Kar mano, sikuru ka udwaro Pinyruodhe kendo gigo duto ibiro mednu.
32 “Un kueth matin, kik ubed maluor nimar Wuonu oseyie miyou Pinyruoth.
33 Usuru giu kendo uchiw mich mag konyo jochan. Losuru ofuke ma ok kethre mag pesa, ma gin mwandu ma ok rum e polo, kama jakuo ok sudie machiegni kendo kudni ok chamgie.
34 Nimar kama mwandu magu nitie, kanyo bende e kama chunyu nobedie.
35 “Rwakreuru kendo beduru moikore, bende teyni magu obed ka liel,
36 kendo onego ubed kaka joma rito ruodhgi monego oduog koa e nyasi mar kend, mondo sama obiro mi odwong’o, giyawone mapiyo.
37 Wasumbni mamor gin mago ma ka ruodhgi obiro to oyudogi ka gineno! Adier awachonu ni, obiro rwakore owuon ne tich kendo miyo gibed piny e mesa kae to odhi irgi mondo otinegi.
38 To ka obiro e arita mar ariyo, kata mana e mar adek, moyudogi ka giikore, gin joma mor!
39 To ng’euru wachni, ni ka wuon ot nyalo ng’eyo ni jakuo dhi biro e sa mane, ok dowe mondo otur ode mi donjie.
40 Un bende beduru moikore, nikech e sa ma ok upar ni nyalore, e ma Wuod dhano biroe.”
41 Eka Petro nopenjo kama: “Ruoth, be wan e ma igoyonwa ngeroni kendwa, koso ne ji duto bende?”
42 To Ruoth nowacho niya: “En ng’a ma kuom adier e jarit mogen, kendo mariek, mochung’ ne mwandu mag ruodhe, ma ruodhe biro keto e wi jotije duto mondo odhi nyime miyogi chiembgi e kinde mowinjore?
43 Misumba mamor en mano ma ruodhe kobiro to yude kotimo kamano!
44 Adier awachonu ni, obiro kete e wi gige duto.
45 To ka misumbano nyalo wacho e chunye ni, ‘Ruodha odeko chopo,’ mi ochako goyo jotich ma chwo kod ma mon, kae to ochiemo, kendo ometho, kendo omer,
46 ruodh misumbano biro chopo e chieng’ ma ok opar kendo e sa ma ok ong’eyo, kendo obiro miye kum magerie moloyo, kae to omiye pok gi joma ok oyie.
47 Eka misumba ma nong’eyo maber dwaro mar ruodhe to ok nobedo moikore kata timo gima ruodhe nowachone, ibiro chwade del mang’eny.
48 To mano ma ne ok ong’eyo maber to notimo gik mowinjore gi chwat, ibiro chwade del manok. Kuom adier, ng’at momi mang’eny, nodwar kuome mang’eny, kendo ng’at ma oket e wi gik mang’eny, nodwar kuome mang’eny mokadho mapile.
49 “Ne abiro moko mach e piny, to an gang’o machielo ma dadwar ka osemoke?
50 Kuom adier, an gi batiso ma ibiro batisago, to mano kaka chunya chandore nyaka chop otimre!
51 Be uparo ni ne abiro kelo kuwe e piny? Ooyo, awachonu ni, kar mano, ne abiro kelo pogruok.
52 Nikech kochakore sani ka dhi nyime, ji abich manie ot achiel nobed gi pogruok, ji adek gi ji ariyo, kendo ji ariyo gi ji adek.
53 Ginipogre, wuoro gi wuode, kendo wuowi gi wuon-gi, miyo gi nyare, kendo nyako gi min-gi, min wuowi kod chi wuode, kendo chi wuowi gi min chwore.”
54 Eka nowacho bende ne oganda kama: “Ka uneno bor polo koting’ore yo imbo, gie sano uwacho ni, ‘Kodh yamo mager biro,’ to timore kamano.
55 To ka uneno ka yamb milambo kudho, uwacho ni, ‘Piny biro bedo maliet ahinya,’ to timore.
56 Un joma wuondore, ung’eyo nono kaka kit piny gi polo chal, to obet nade ni ok ung’eyo nono kinde ma sani?
57 Ang’o momiyo un uwegi ok upog bende gik makare?
58 Kuom ranyisi, sama udhi ir jatelo gi ng’at modonjoni e bura, chak loso ywaruok manie kindu ka pod un e yo mondo kik oteri e nyim jang’ad-bura kae to jang’ad-bura keti e lwet jatij od bura, to bang’e jatij od burano witi e jela.
59 Awachonu ni, adier, ok ibi wuok kanyo nyaka chop ichul pesa ma mingli matinie mogik.”
Weche Moler Piny
^ Ne en kar wang’o yugi oko mar Jerusalem. Ne Glosari.
^ E dho Grik, winyono e matinie ahinya.
