Luka 14:1-35
14 Kinde moro nodhi chiemo e od achiel kuom jotend Jo-Farisai chieng’ Sabato, to gin ne ginono ahinya kaka notimo.
2 Kendo ne! e nyime ne nitie ng’at moro ma ne nigi tuo ma miyo del kuodo pi.
3 Omiyo, Yesu nopenjo joma ne olony e Chik kod Jo-Farisai niya: “Be chango ng’ato chieng’ Sabato en gima owinjore gi chik, koso ok owinjore?”
4 To ne giling’ thi. Kae to nokawo ng’atno, mi nochange eka noweye mondo odhi.
5 Mi nokonegi niya: “En ng’a kuomu ma ka wuode kata ruadhe olwar e soko chieng’ Sabato, to ok obi ywaye oko gikanyono?”
6 To ne ok ginyal dwoke wachno.
7 Eka nogoyo ngero moro ne welo ma nogwel, bang’ neno kaka ne giyiero kuonde moyiedh mogik. Nowachonegi niya:
8 “Ka ng’ato ogweli e nyasi mar kend, kik idhi ibed e kama oyiedh ahinya. Dipo ka ng’atno osegwelo jal machielo bende, modhial moloyi.
9 Eka ng’at ma ogwelouno nobi kendo wachoni ni, ‘We mondo jali e ma obed kanyo.’ Eka iniwuog kanyo gi wich-kuot kidhi bet kama ni piny mogik.
10 To ka ogweli kamoro, dhi ibed kama ni piny mogik mondo ka ng’at mogweli obiro, enowachni ni, ‘Osiepa, dhi ane malo kacha.’ Eka iniyud duong’ e nyim welo weteni duto.
11 Nimar ng’ato ka ng’ato ma ng’awore malo, noduoke piny, to ng’at ma duokore owuon piny, nong’awe malo.”
12 Kae to nowacho bende ne ng’at ma ne ogweleno kama: “Ka iloso chiemb odiechieng’ kata modhiambo, kik iluong osiepeni, kata oweteni, kata wedeni, kata joweteni momew. Dipo ka kinde moro gin bende gigweli, kae to mano bedo ka gima gichuli.
13 To ka iloso nyasi, gwel joma odhier, gi joma ong’ol, gi pudhe, kod muofni;
14 kendo inibed mamor nimar gionge gima ginyalo chuligo. Nikech ibiro chuli e kinde chier mar joma kare.”
15 Bang’ winjo wechego, achiel kuom welo wetene nowachone niya: “Ng’at mamor en ng’atno ma chiemo e nyasi mar Pinyruodh Nyasaye.”
16 Yesu nokone kama: “Ng’at moro noloso nyasi maduong’ mar chiemo modhiambo, mi nogwelo ji mang’eny.
17 Nooro misumbane e sa mar chiemo modhiambo mondo odhi owach ne joma nogwel ni, ‘Biuru, nikech koro gik moko duto oseikore.’
18 To giduto ne gitiyo gi weche mag rendruok. Ng’at mokwongo nowachone ni, ‘Eka aa ng’iewo puodho moro, to adwaro ni adhi anene; akwayi, ng’wonna.’
19 Machielo nowacho ni, ‘Eka aa mana ng’iewo dhok moromo tiyo gi jok abich, kendo adwaro ni adhi ang’igi ane; akwayi, ng’wonna.’
20 To pod machielo nowacho ni, ‘Eka aa mana kendo, to nikech mano ok anyal biro.’
21 Omiyo, misumbano noduogo mowacho wechego ne ruodhe. Eka wuon ot nobedo gi mirima mi nowacho ne misumbane ni, ‘Wuog idhi mapiyo e wang’ yore madongo kaachiel gi ndeche mag taon, kendo ikel kae joma odhier, gi joma ong’ol, gi muofni, kod pudhe.’
22 Bang’ kinde, misumbano nowacho kama, ‘Ruodha, gima ne ichiko osetimore, to thuolo pod nitie.’
23 Omiyo, ruoth nowacho ne misumbano ni, ‘Wuog idhi e nderni gi yore mag tielo, kendo ichun-gi gibi eka mondo oda opong’.
24 Nimar awachonu ni, onge ng’ato kuom joma ne ogwel ma biro bilo chiemba modhiambo.’”
25 Koro, oganda mang’ongo ne wuotho kode kendo nolokore mowachonegi kama:
26 “Ka ng’ato biro ira to ok osin gi wuon-gi, gi min-gi, gi chiege, gi nyithinde, gi owetene, kod nyiminene, ee, to kata mana gi ngimane owuon, ok onyal bedo japuonjrena.
27 Ng’at ma ok ting’ yadh-sandne kendo luwa, ok onyal bedo japuonjrena.
28 Kuom ranyisi, en ng’a kuomu ma ka dwaro gero ot ma rabora ok obi bet piny mondi kendo kwano nengo mondo one ka en-gi gima orome tieko odno?
29 Nono to onyalo keto mise mar odno kae to tieke tame, eka ji duto ma neno mano chako jare
30 niya: ‘Ng’atni nochako gedo to ok onyal tiekogo.’
31 Kata, ere ruoth ma ka dhi kedo e lweny gi ruoth machielo, ok obi bet piny mondi mi ong’ad paro kabe onyalo tiyo gi jolweny 10,000 ma en-go e kedo gi jal ma birone gi jolweny 20,000?
32 Ka kuom adier ok onyal kedo kode, obiro oro joote mondo gidhi gilos kuwe gi ng’atno ka pod ng’atno ni mabor.
33 E yo ma kamano, ng’euru ni onge ng’ato kuomu ma nyalo bedo japuonjrena ka ok owere gi gik moko duto ma en-go.
34 “Kuom adier, chumbi ber. To ka chumbi olalo ndhadhu, ibiro ti kode e twono ang’o?
35 Obedo gima ok owinjore ne lowo kata manyiwa. Ji wite oko. Ng’at ma nigi it ma winjo mondo owinj.”
