Luka 17:1-37
17 Eka nowacho ne jopuonjrene niya: “Gik ma kelo chwanyruok nyaka bi. To yaye nobed malit ne ng’at ma gigo nobi kokalo kuome!
2 Dibed maber moloyo ka otue kidi mar pong’ e ng’ute kendo wite e nam, kar mondo ochwany achiel kuom joma tindogi.
3 Beduru motang’. Ka owadu otimo richo, kwere matek, to ka oloko chunye oa e richono, wene.
4 Kata ka otimoni richo nyadibiriyo e odiechieng’ achiel mi oduogo iri nyadibiriyo kowacho ni, ‘Aloko chunya a e richo,’ nyaka to iwene.”
5 Koro joote nokwayo Ruoth kama: “Miwae yie momedore.”
6 Eka Ruoth nodwokogi niya: “Ka da bed ni un gi yie kata mana ma rom gi koth karadali, da uwacho ne yadh onungani kama, ‘Pudhri ia kae idhi ipidhri e nam!’ to obiro winjou.
7 “En ng’a kuomu ma ka nigi misumba ma purone kata ma ritone kueth, to onyalo wacho ne misumbano koduogo oa e puodho ni, ‘Bi kae mapiyo kendo ibed piny e mesa mondo ichiem’?
8 Kar mano, donge obiro wachone ni, ‘Ikna chiemba modhiambo kendo rwak law apron mondo itina nyaka chop atiek chiemo gi metho, eka bang’ mano inyalo chiemo kendo metho’?
9 Ok obi pwoyo misumbano nikech timo tije ma noketne ni otim, donge?
10 Kamano bende, ka usetimo duto moketnu mondo utim, wachuru ni: ‘Wan mana wasumbni ma kayiem nono. Gik ma wasetimo e gik ma nonego watim.’”
11 Sama noyudo odhi Jerusalem, nokalo e kind Samaria gi Galili.
12 To sama nodonjo e gweng’ moro, jodhoho apar noromo kode, to ne gichung’ mabor matin.
13 Eka ne giting’o dwondgi malo ka giwacho niya: “Yesu, Japuonj, kechwa!”
14 Ka nonenogi, nokonegi niya: “Dhiuru mondo unyisru e nyim jodolo.” Eka sama ne gin e yo ka gidhi, ne gidoko maler.
15 Ka achiel kuomgi noneno ni nosechange, noduogo kopako Nyasaye gi dwol maduong’.
16 Mi nopodho auma e tiend Yesu kogoyone erokamano. To gima iwuoro en ni jalo ne en Ja-Samaria.
17 Nikech mano, Yesu nopenjo niya: “Donge ji apar duto nodoko maler, koso? To kare jomamoko ochikoka ni kanye?
18 Onge kata ng’ato achiel kuomgi moseduogo mondo omi Nyasaye duong’, mak mana jal moa e oganda machieloni?”
19 Eka nowacho ne jalo niya: “A malo mondo idhi; yieni osemiyo ichango.”
20 Ka Jo-Farisai nopenje kinde ma Pinyruodh Nyasaye ne dhi biroe, nodwokogi kama: “Pinyruodh Nyasaye ok bi e yo ma nenore malich miwuoro;
21 kata ji ok bi wacho ni, ‘Neuru en ka!’ kata ni, ‘En kacha!’ Nikech neuru! Pinyruodh Nyasaye ni e dieru.”
22 Eka nowacho ne jopuonjrene kama: “Kinde biro ma unugomb nenoe chieng’ achiel kuom ndalo mag Wuod dhano, to ok ununene.
23 Kendo ji nowachnu ni, ‘Neuru, en kacha!’ kata ni, ‘En ka!’ kik uwuog oko kata lawo bang’gi.
24 Nikech mana kaka mil polo rieny koa konchiel e polo nyaka komachielo, kamano e kaka odiechieng Wuod dhano nobed.
25 Kata kamano, nyaka okadh e sand mang’eny mokwongo, kendo tieng’ni nokwede.
26 E wi mano, mana kaka notimore e ndalo Noa, e kaka nobed e ndalo mag Wuod dhano:
27 ji ne chiemo, ne gimetho, chwo ne kendo, mon ne ikendo, nyaka e chieng’ono ma Noa nodonjo e yie, mi Ataro nobiro mokethogi giduto.
28 Kamano bende e kaka ne otimore e ndalo Lut: ji ne chiemo, ne gimetho, ne ging’iepo, ne giuso, ne gichuoyo, kendo ne gigedo.
29 To chieng’ ma Lut nowuok e Sodom, mach gi salfa* ne ochue koa e polo mokethogi giduto.
30 Kamano e kaka nobed e chieng’ono ma Wuod dhano nofwenyree.
31 “E chieng’no, ng’at manie wi tat ot to gige ni ei ot, kik olor piny mondo okawgi. Kamano bende, ng’at man oko e puodho kik dog ne gik man chien ngang’.
32 Paruru chi Lut.
33 Ng’ato ang’ata ma dwaro rito ngimane nolale, to ng’at molalo ngimane, biro reso ngimane.
34 Awachonu ni, e otienono ji ariyo nobed e otanda achiel; achiel nokaw to machielo nowe.
35 Mon ariyo nobed ka rego e pong’ achiel; moro nokaw to machielo nowe.”
36 ——
37 Nikech mano, ne gipenje kama: “Ruoth, mano notimre kanye?” Nodwokogi niya: “Kama ringre gima otho nitie, kanyo bende e kama achudhe biro chokoree kanyachiel.”
Weche Moler Piny
^ Ma en kit poda moro ma mako mach mapiyo ahinya, kendo sama oliel ogolo tik mager kendo marach.
