Luka 2:1-52
2 Koro e ndalogo, Kaisar Agusto nogolo chik mondo ondik nying ji e piny mangima.
2 (Okang’ mar ndiko nying ji mokwongono notimore ka Kwirinio e ma ne en gavana e Siria.)
3 Kendo ji duto nodhi mondo ondik nyingegi, ng’ato ka ng’ato e taon ma thurgi.
4 Josef bende nowuok Galili e taon mar Nazareth modhi Judea nyaka e taon mar Daudi kama iluongo ni Bethlehem, nikech ne en ja libamba kendo ja dhood Daudi.
5 Nodhi mondo ondik nyinggi kaachiel gi Maria ma noyudo osekendo kaka ne gisesingore, to koro ne ochiegni nyuol.
6 Ka noyudo gin kuro, kindene mar nyuol nochopo.
7 Mi nonyuolo wuode makayo, kendo noboye gi nanga mi nopiele e sanduk mimiyoe dhok chiemo nikech ne onge od bworo ma ne ginyalo betie.
8 E alworano, ne nitie bende jokwath ma ne dak oko e lege, kendo ne girito kwethgi gotieno.
9 Apoya nono, malaika mar Jehova ne ochung’ e nyimgi, kendo duong’ mar Jehova norienynegi koni gi koni mi ne gibedo maluor ahinya.
10 Kata kamano, malaikano nokonegi kama: “Kik uluor, nimar neuru! ahulonu wach maber mar ilo maduong’ ma ji duto biro bedogo.
11 Nikech kawuono osenyuolnu jawar ma en Kristo Ruoth e taon mar Daudi.
12 Kendo ma e ma nobednu ranyisi: Ubiro yudo nyathi mayom ma obo gi nanga ka onindo e sanduk mimiyoe dhok chiemo.”
13 Apoya nono, oganda maduong’ mar malaike mag polo ne ni kod malaikano ka gipako Nyasaye kama:
14 “Duong’ obed ne Nyasaye man malo kendo kuwe obed e wi piny e kind joma oyiego.”
15 Omiyo, ka malaikego nosedok e polo, jokwath nochako wacho e kindgi giwegi niya: “Wadhiuru Bethlehem mondo wane gima osetimore, ma Jehova osemiyo wang’eyo.”
16 Eka ne gidhi mapiyo kendo ne giyudo Maria kanyachiel gi Josef kod nyathi mayomno ka opiele e sanduk mimiyoe dhok chiemo.
17 Kane gineno mano, ne giwacho wach ma nosewachnegi e wi nyathi matinno.
18 Kendo jogo duto ma nowinjo nowuoro gik ma jokwathgo nowachonegi,
19 to Maria nochako kano wechego duto, koparo tiendgi e chunye.
20 Eka jokwath nodok, ka gimiyo Nyasaye duong’ kendo pake nikech duto ma ne gisewinjo kendo neno mana kaka nosewachnegi.
21 Bang’ odiechienge aboro, ka kinde nochopo mar tere nyangu, ne ochake ni Yesu, ma en nying ma malaika nomiye ka pok nomak ichne.
22 Bende, ka kinde nochopo mar pwodhe ka luwore gi Chik Musa, ne gitere nyaka Jerusalem mondo gichiwe ne Jehova
23 mana kaka ondik e Chik Jehova niya: “Nyathi ka nyathi ma wuowi kendo makayo nyaka luong ni maler mar Jehova.”
24 Kendo ne gichiwo misango ka luwore gi gima iwacho e Chik Jehova niya: “Akuche ariyo kata nyithi akuche ariyo.”
25 Kendo ne! ne nitie ng’at moro e Jerusalem ma nyinge Simeon, ma ne en ng’at makare kendo moluoro Nyasaye, to norito kinde hoch mar Israel, kendo roho maler ne ni kuome.
26 E wi mano, Nyasaye noseelone kokalo kuom roho maler ni ok nodhi tho ka pok oneno Kristo mar Jehova.
27 Koro nobiro ei hekalu e bwo teko mar roho kendo ka jonyuolgo nokelo Yesu ma pod ne tinno ei hekalu mondo gitimne kaka ne itimoga ka luwore gi Chik,
28 nokawo nyathino e bade mi nopako Nyasaye kowacho niya:
29 “Ruoth Mamalo Chutho, eri koro iseyie mondo misumbani odhi gi kuwe ka luwore gi kaka ne isewacho,
30 nimar wang’a oseneno yori mar kelo warruok
31 ma iseiko e wang’ ji duto,
32 ler mar golo gima geng’o wang’ ogendni, kendo ma kelo duong’ ne jogi Israel.”
33 Kendo wuon nyathino gi min mare nomedo wuoro gik ma niwacho kuome.
34 Bende, Simeon noguedhogi kendo nowacho ne Maria min nyathino kama: “Ne! Nyathini oseket mondo omi ji mang’eny e Israel olwar kendo ochung’, kendo mondo obed ranyisi ma ibiro wuo kuome marach
35 (ee, nitie ligangla moro mabor mibiro chwoyigo), mondo mi paro manie chuny ji mang’eny oelre.”
36 Koro ne nitie janabi moro ma nyinge Ana, ma nyar Fanuel ma dhood Asher. Dhakoni hike noseniang’ kendo noyudo osedak gi chwore kuom higni abiriyo bang’ kend margi,
37 to ne en chi liel ma koro ne jahigni 84. Ne ok obarega e hekalu kotiyo tij Nyasaye odiechieng’ gi otieno, kotueyo chiemo, kendo lemo kosayo.
38 E sa nogono, nobiro machiegni mochako goyo erokamano ne Nyasaye kendo nowuoyo e wi nyathino gi ji duto ma ne kiyo resruok mar Jerusalem.
39 Omiyo, kane gisetimo gigo duto ka luwore gi Chik Jehova, ne gidok Galili e taondgi mar Nazareth.
40 Kendo nyathi matinno nodhi nyime dongo kendo nobedo motegno ka ipong’e gi rieko, kendo ne odhi nyime bedo ng’at ma Nyasaye oyiego.
41 Koro higa ka higa jonyuolne ne nigi tim mar dhi Jerusalem e sawo mar Pasaka.
42 To ka noromo jahigni 12, ne gidhi Jerusalem mana kaka tim sawono nobet.
43 Ka ndalo mag sawono norumo kendo koro ne giduogo, rawera ma Yesu nodong’ chien Jerusalem to jonyuolne ok nofwenyo.
44 Ka giparo ni ne en kanyachiel gi joma ne giwuothogo, ne gitieko wuodh odiechieng’ achiel, eka ne gichako manye e kind wedegi kod joma ne ging’eyo.
45 To kane ok giyude, ne gidok Jerusalem kendo ne gimanye gi kinda ahinya.
46 Eka bang’ ndalo adek ne giyude ei hekalu kobet e dier jopuonj, kowinjogi kendo kopenjogi penjo.
47 To jogo duto ma ne winje ne siko ka wuoro riekone mar ng’eyo tiend weche kod kaka ne odwoko.
48 Koro ka jonyuolne nonene, ne gihum, kendo min mare nopenje niya: “Nyathina, isetimonwa kama nang’o? An kod wuoru wasechandore ahinya ka wamanyi.”
49 To nodwokogi niya: “Ang’o momiyo ne umanya? Ne ok ung’eyo ni nyaka abed e od Wuora?”
50 Kata kamano, ne ok giwinjo tiend gima nowachonegi.
51 Eka ne olor kodgi mi gidok Nazareth, kendo nodhi nyime luwo kaka ne gichike. Bende, min-gi nokano wechego duto e chunye.
52 Kendo Yesu ne dongo ka riekone medore kendo Nyasaye kod ji ne omedo bedo mamor kode.
