Luka 20:1-47
20 Chieng’ moro e ndalogo, sama nopuonjo ji e hekalu kendo nolando wach maber, jodong-jodolo gi jondiko kod jodongo nobiro ire
2 mi ne gipenje niya: “Wachnwae, itimo gigi gi ratiro mane? Kata en ng’a momiyi ratiro mar timo gigi?”
3 En nodwokogi kama: “An bende abiro penjou penjo achiel, kendo udwoka:
4 Batiso ma Johana ne timo, ne en moa e polo koso kuom dhano?”
5 Eka ne gichako wacho e kindgi giwegi niya: “Ka wadwoke ni, ‘Ne en moa e polo,’ obiro penjowa ni, ‘Kare ang’o momiyo ne ok uyie kuome?’
6 To ka wadwoke ni, ‘Ne en moa kuom dhano,’ oganda duto biro chielowa gi kite nimar giyie ni Johana en janabi.”
7 Omiyo, ne gidwoke ni ne ok ging’eyo kama ne batisono oaye.
8 Yesu nowachonegi niya: “An bende ok abi wachonu ni atimo gigi gi ratiro mane.”
9 Eka nochako goyo ne ji ngero niya: “Ng’at moro nopidho puoth mzabibu mi noketo puodhono e lwet jopur ma chule, kae to nodhi wuoth e piny moro mabor kuom ndalo mogwaro.
10 Ka kinde ma olemo nyakie nochopo, nooro misumba moro ir jopurgo mondo gimiye moko kuom olemo mag puoth mzabibuno. Kata kamano, jopurgo noriembe gi lwete nono bang’ goye.
11 To nochako ooro misumba machielo. Mano bende ne gigoyo mi gitimone timbe achaya, kendo ne giriembe gi lwete nono.
12 Kendo nochako ooro mar adek; mano bende ne gihinyo mi giwito oko.
13 Omiyo, wuon puoth mzabibuno nowacho ni, ‘En ang’o monego atim? Abiro oro wuoda ma ahero. Dipo ka gimiye luor.’
14 Ka jopurgo noneno wuodeno, ne giwacho e kindgi kama, ‘Mani e jal ma puodhoni biro dong’ne kaka pok mare. Wanegeuru mondo puodhoni obed marwa.’
15 Mi ne giwite oko mar puoth mzabibu kendo ne ginege. Omiyo, en ang’o ma wuon puoth mzabibuno biro timonegi?
16 Enobi mi noneg jopurgo kae to ochiwo puoth mzabibuno ne jomamoko.”
Bang’ winjo mano, ne giwacho kama: “Mano kik timre ngang’!”
17 To nong’iyogi tir mowacho niya: “Kare ere tiend wach mondik niya: ‘Kidi ma jogedo ne otamore, kidino osebedo kidi maduong’ moriwo kor ot’?
18 Ng’ato ang’ata ma lwar e kidino, ng’atno biro tur ma tindotindo. To ng’at ma kidino olwar kuome, kidino biro rege ka buru.”
19 Eka jondiko gi jodong-jodolo nomanyo kaka ne ginyalo make e sa nogono nimar ne ging’eyo ni nogoyo ngerono kuomgi, kata kamano ne giluoro ji.
20 Kendo bang’ nono ahinya gik ma notimo, ne gioro jomoko ma ne gisechulo ling’ling’ mondo gidhi giwuondre ka joma kare, eka gimake gi wach moa e dhoge kae to gikete e lwet joloch kendo e bwo teko mar gavana.
21 Eka jogo nopenje kama: “Japuonj, wang’eyo ni iwuoyo kendo ipuonjo kare, bende ok iluoro wang’ ng’ato, to ipuonjo yor Nyasaye ka luwore gi adiera:
22 Be chulo osuru ne Kaisar en gima owinjore gi chik, koso ok owinjore?”
23 Kata kamano, nofwenyo wuondruokgi mowachonegi kama:
24 “Nyisauru dinari. Kido gi ndiko man kuomegi gin mag ng’a?” Ne gidwoke niya: “Gin mag Kaisar.”
25 Nowachonegi kama: “Kare chuluru Kaisar gige Kaisar, to gige Nyasaye ne Nyasaye.”
26 Omiyo, ne ok ginyal make gi wach moro moa e dhoge e nyim ji, to ne gihum nono gi dwokone mi giling’ thi.
27 To moko kuom Jo-Sadukai ma gin joma wacho ni chier onge nobiro ire mi gipenje kama:
28 “Japuonj, Musa nondikonwa niya: ‘Ka owadgi ng’ato otho kendo oweyo chiege, to ne ok onyuolo nyathi, owadgi onego okaw chiegeno mondo onyuolnego nyithindo.’
29 Koro ne nitie owete moko abiriyo. Mokwongo nokendo dhako kae to ne otho ma onge nyathi.
30 Mar ariyo
31 gi mar adek bende nokendo dhakono. Ne obet kamano nyaka e mar abiriyo; ne githo ma ok giweyo nyithindo chien.
32 Gikone, dhakono bende ne otho.
33 Nikech mano, e chier, dhakono nobed chi ng’a kuomgi? Nimar nosebedo chi owete abiriyogo.”
34 Yesu nodwokogi niya: “Nyithind ndaloni kendo, bende ichiwogi e kend,
35 to joma osekwan ni owinjore donjo e ndalo ma biro kod chier a kuom joma otho, ok kend, bende ok chiwgi e kend.
36 Kuom adier, bende ok ginyal tho kendo, nimar gichal kaka malaike, kendo gin nyithind Nyasaye kuom bedo nyithind chier.
37 To kuom wach chiero joma otho, kata mana Musa noelo wachno e sigand bungu mar kuthe, ka noluongo Jehova ni, ‘Nyasach Ibrahim, Nyasach Isaka, kendo Nyasach Jakobo.’
38 En Nyasach joma ngima to ok Nyasach joma otho, nimar e wang’e jogo duto ngima.”
39 Jondiko moko nodwoke niya: “Japuonj, iwacho kare.”
40 Nikech koro ne gionge gi chir mar penje kata wach achiel.
41 Eka nopenjogi niya: “Obet nade ni ji wacho ni Kristo en Wuod Daudi?
42 Nimar Daudi owuon wacho e bug Zaburi ni, ‘Jehova nowacho ne Ruodha niya: “Bed e bada korachwich
43 nyaka chop aket wasiki obed kaka raten mar tiendi.”’
44 Kuom mano, Daudi luonge ni Ruodha; omiyo ere kaka onyalo bedo wuode?”
45 Eka sama ji duto ne winjo, nowacho ne jopuonjrene kama:
46 “Tang’uru gi jondiko mohero wuotho koni gi koni ka girwako kandho kendo mohero ni ji omosgi ka dhialogi e chirni kendo mohero kombe ma nyime e sunagoke kod kuonde moyiedh mogik e nyasi,
47 kendo giyako ute mond liete, kendo gilamo lamo maboyo mana ni mondo ji onegi. Jogi noyud kum magerie moloyo.”
