Luka 22:1-71
-
Jodolo chano nego Yesu (1-6)
-
Ikruok ne Pasaka mogik (7-13)
-
Chakruok mar Chiemo Modhiambo mar Ruoth (14-20)
-
“Jandhokna ni koda e mesa” (21-23)
-
Mbaka matek e wi ng’at maduong’ie moloyo (24-27)
-
Singruok ma Yesu notimo e wi pinyruoth (28-30)
-
Okor ni Petro ne dhi kwer ni ok ong’eyo Yesu (31-34)
-
Ikruok dwarore; ligengni ariyo (35-38)
-
Lamo mar Yesu e Got Zeituni (39-46)
-
Imako Yesu (47-53)
-
Petro kwer ni ok ong’eyo Yesu (54-62)
-
Ijaro Yesu (63-65)
-
Iyale e nyim buch Sanhedrin (66-71)
22 Koro Sawo mar Makate Maonge Thowi, ma nong’ere kaka Pasaka, ne okayo machiegni.
2 Kendo jodong-jodolo gi jondiko ne manyo yo maber moloyo ma ne ginyalo negego nikech ne giluoro ji.
3 Eka Satan nodonjo kuom Judas ma bende ne iluongo ni Iskariot, ma ne en achiel kuom ji Apar Gariyoka,
4 kendo nodhi mowuoyo gi jodong-jodolo kod jotend-jorit hekalu kuom kaka nonyalo ndhogo Yesu.
5 Ne gibedo mamor gi wachno kendo ne giyie miye pesa mar fedha.
6 Omiyo, noyie kendo nochako manyo thuolo maber mar ndhoge ka oganda onge machiegni.
7 Odiechieng’ mokwongo mar sawo mar Makate Maonge Thowi koro nochopo, ma ne en chieng’ ma nyaka ne chiwie misango mar Pasaka;
8 omiyo, Yesu nooro Petro gi Johana kowachonegi niya: “Dhiuru uiknwa Pasaka mondo wacham.”
9 Ne gipenje niya: “Idwaro ni wadhi waike kanye?”
10 Nodwokogi kama: “Neuru! Ka udonjo e taon, ng’at moro moting’o aguch lowo mar pi biro romo kodu. Luweuru nyaka e ot modonjoe.
11 Kendo uwach ne wuon odno ni, ‘Japuonj penjo kama: “Ere od welo kama dachamie Pasaka gi jopuonjrena?”’
12 Eka ng’atno biro nyisou ot mamalo malach moseikie gik moko. Kanyo e ma unuikee.”
13 Omiyo, ne gidhi kendo yudo mana kaka nosewachonegi, mi ne gitimo ikruok ne Pasaka.
14 Koro ka sa nochopo, nobet piny e mesa kanyachiel gi jootene.
15 Kendo nowachonegi kama: “Asegombo ahinya chamo Pasakani kodu ka pok ayudo sand;
16 nimar awachonu ni, ok abi chame kendo nyaka weche duto motudore kode ochop e Pinyruodh Nyasaye.”
17 Kendo bang’ kawo okombe, nogoyo erokamano kowacho niya: “Kawuru mae mondo umi ng’ato ka ng’ato kuomu,
18 nimar awachonu ni, chakre sani, ok abi madho divai mar olemb mzabibu kendo, nyaka Pinyruodh Nyasaye bi.”
19 Bende, nokawo makate mogoyo erokamano, kendo nong’ingo, mi nomiyogi, kowacho kama: “Mani ochung’ ne ringra ma idhi chiw nikech un. Sikuru ka utimo ma mondo uparago.”
20 Notimo kamano bende gi okombe bang’ kane gisechamo chiemo modhiambo kowacho niya: “Okombeni ochung’ ne singruok manyien kokalo kuom remba, ma biro chuer nikech un.
21 “To neuru! lwet jandhokna ni koda e mesa.
22 Nimar adier Wuod dhano dhi tho mana kaka oseng’ad; to yaye nobed malit ne ng’at ma indhoge kokalo kuome!”
23 Omiyo, ne gichako penjore e kindgi giwegi ni en ng’a kuomgi ma dibed ni ne chiegni timo gima kamano.
24 Kata kamano, mbaka matek bende ne omuoch e kindgi ni en ng’a kuomgi mikwano ni duong’ moloyo.
25 To nokonegi niya: “Ruodhi mag ogendni timore joloch e wi ji, kendo joma nigi teko e wi ji iluongo ni Jochiw-Kony.
26 Kata kamano, un ok onego ubed kamano. To ng’at maduong’ moloyo e kindu obed matinie moloyo, to ng’at ma telo e kindu mondo obed jatiju.
27 Nimar en ng’a ma duong’ie moloyo? Be en jalo mobet ka chiemo, koso en jal ma tiyone? Donge en jal mobet ka chiemono, koso? To an e dieru kaka jal ma tiyonu.
28 “Kata kamano, un e joma osemakore koda e masichena;
29 omiyo, atimo kodu singruok mana kaka Wuora osetimo koda singruok ne pinyruoth,
30 mondo ubi uchiem kendo umeth e mesana e Pinyruodha, kendo ubed e kombe ruodhi mondo ung’ad bura ne dhoudi 12 mag Israel.
31 “Simon, Simon, ne! Satan osekwayo mondo opiedhu uduto mana ka ngano.
32 Kata kamano, asesayonu mondo yieu kik tho; to in, bang’ kiseduogo, iteg oweteni.”
33 Eka Petro nowachone niya: “Ruoth, aikora mar dhi kodi e jela kendo e tho.”
34 To en nodwoke kama: “Petro, awachoni ni, thwon-gweno ok bi kok kawuono nyaka chop ikwer nyadidek ni ok ing’eya.”
35 Bende, nowachonegi niya: “Ka naorou mondo udhi ma ok uting’o ofuk pesa, kod ofuk chiemo, gi wuoche, be nuchando gimoro amora?” Ne gidwoke niya: “Ooyo!”
36 Eka nowachonegi kama: “To koro ng’at ma nigi ofuk pesa mondo oting’e, bende otim kamano gi ofuk chiemo, kendo ng’at ma onge gi ligangla ous nangane ma oko mondo ong’iewgo ligangla.
37 Nikech awachonu ni, wachni nyaka timre ma ne ondik kuoma niya, ‘Ne okwane gi joma ketho chik.’ Nimar gigo chopo kuoma.”
38 Eka ne giwacho kama: “Ruoth, ne! ligengni ariyo ni ka.” Nowachonegi niya: “Oromo.”
39 Ka nowuok, nodhi e Got Zeituni kaka timne nobet kendo jopuonjre bende noluwe.
40 To ka nochopo kanyo, nowachonegi niya: “Sikuru ka ulamo mondo kik udonj e tem.”
41 Eka nochwalore matin kama borne dirom diroe kidi, mi nogoyo chonge piny mochako lemo
42 kowacho niya: “Wuora, kidwaro to gol okombeni oa kuoma. Kata kamano, dwacha kik e ma timre, to mari e ma mondo otimre.”
43 Eka malaika moro moa e polo nofwenyorene kendo nomiye teko.
44 To chunye nochandore malit ahinya mi nodhi nyime lemo gi kinda; kendo luche nobedo kaka remo maton piny.
45 Ka noa malo bang’ lemo modhi ir jopuonjre, noyudo ka nindo oterogi nikech chunygi nokuyo.
46 Nopenjogi niya: “Ang’o momiyo unindo? Auru malo kendo udhi nyime gi lamo mondo kik udonj e tem.”
47 Ka pod nowuoyo, ero ne! oganda moro nosieko ka ng’at miluongo ni Judas, ma ne en achiel kuom ji Apar Gariyoka otelonegi, mi nodhi ir Yesu mondo onyodhe.
48 To Yesu nopenje niya: “Judas, indhogo Wuod dhano gi nyoth?”
49 Ka joma ne ni kode noneno gima ne chiegni timore, ne gipenje kama: “Ruoth, wachadhgi gi ligangla?”
50 To bende achiel kuomgi ne ochadho misumba mar jadolo maduong’ mi nong’ado ite ma korachwich oko.
51 To Yesu nodwoko kama: “Mano oromo.” Kendo nomulo it misumbano mi nochange.
52 Kae to Yesu nopenjo jodong-jodolo gi jotend-jorit hekalu kod jodongo ma nobiro make niya: “Ere gimomiyo ubirona ka uting’o ligengni gi arunge ka joma dhi mako jamecho?
53 Kane an kodu e hekalu pile ka pile, ne ok umaka. Kata kamano, ma e sau kendo en loch mar joma ni e mudho.”
54 Eka ne gimake mi gidhi kode kendo ne gitere nyaka e od jadolo maduong’; to Petro ne luwogi gi kama bor matin.
55 Kane gimoko mach e dier laru kendo bet piny kanyachiel, Petro nobedo kodgi.
56 To jatich moro ma nyako nonene e ler mar majno, mi nong’iye mowacho niya: “Ng’atni bende a ni kode.”
57 To nokwer kowacho niya: “Nyarwa, ok ang’eye.”
58 Bang’ kinde manok, ng’at machielo nonene mowacho kama: “In bende in achiel kuomgi.” To Petro nodwoko niya: “Omera, ok an.”
59 Kendo bang’ ka sa achiel kama nosekalo, ng’at machielo nochako ramo matek niya: “Kuom adier, jali bende a ni kode, nimar adier en Ja-Galili!”
60 To Petro nowacho kama: “Omera, ok ang’eyo gima iwachono.” Eka gikanyono ka pod nowuoyo, thwon-gweno nokok.
61 Mi Ruoth nolokore mochomo wang’e tir kong’iyo Petro, eka Petro noparo wach ma Ruoth nosewachone kama: “Ka pok thwon-gweno okok kawuono, ibiro kwer nyadidek ni ok ing’eya.”
62 Kendo nowuok oko mi noywak malit ahinya.
63 Koro joma nomako Yesu nochako jare kendo goye;
64 eka bang’ umo wang’e, ne gisiko ka gipenje niya: “Kor ane wach! En ng’a mogoyi?”
65 Kendo ne giwacho weche mamoko mang’eny ma gijarego.
66 To kane piny oru, buch jodong-oganda gi jodong-jodolo kod jondiko nochokore kanyachiel, kendo ne gitere nyaka e od romo margi mar buch Sanhedrin ka giwacho niya:
67 “Ka in e Kristo, wachnwa.” To nodwokogi kama: “Kata kapo ni awachonu, ok ubi yie mano kata matin.
68 Bende, ka apenjou, ok ubi dwoka.
69 Kata kamano, chakre sani ka dhi nyime, Wuod dhano biro bet e bad Nyasaye korachwich ma nigi teko.”
70 Nikech mano, giduto ne gipenje kama: “Kuom mano, in e Wuod Nyasaye, koso?” Nodwokogi niya: “Un uwegi usewacho ni an e en.”
71 Ne giwacho kama: “Ere tiende medo luongo joneno? Nimar wan wawegi wasewinjo koa e dhoge owuon.”
