Mariko 10:1-52
10 Noa kanyo mochopo e gwenge mokiewo gi Judea loka Jordan, mi oganda nochokore kendo ka ma ne entie. To kaka nojatimo, nochako puonjogi kendo.
2 Kae to Jo-Farisai nobiro ire ka gidwaro teme, mi ne gipenje kabe chik oyie mondo ng’ato oketh kend gi chiege chuth.
3 Nodwokogi kama: “Musa nochikou nade?”
4 Ne giwacho niya: “Musa noyie ni ng’ato nyalo ndiko barua mar riembo chiege kendo ketho kend kode chuth.”
5 To Yesu nodwokogi niya: “Nondikonu chikno nikech chunyu matek.
6 Kata kamano, nyaka a chakruok mar chuech, ‘Nochueyogi dichwo gi dhako.
7 Nikech mano, dichwo nowe wuon mare gi min mare,
8 kendo ji ariyogo nobed ringruok achiel,’ omiyo koro ok gin ji ariyo kendo, to gin ringruok achiel.
9 Kuom mano, gima Nyasaye oseriwo, dhano moro amora kik opog.”
10 Kane gin e ot kendo, jopuonjre nochako penje e wi wachno.
11 Nowachonegi kama: “Ng’ato ang’ata ma ketho kend gi chiege chuth, mi okendo machielo, ochodo,* kendo otimone richo,
12 to kapo ni bang’ ketho kend chuth gi chwore, dhako okendore gi ng’at machielo, dhakono ochodo.”
13 Ji koro nochako kelone nyithindo matindo mondo omulgi, to jopuonjrene nokwerogi.
14 Ka Yesu noneno mano, nobedo gi mirima mi nokonegi niya: “Weuru nyithindo matindogi obi ira; kik utem geng’ogi nimar Pinyruodh Nyasaye en mar joma kamago.
15 Adier awachonu ni, ng’ato ang’ata ma ok rwak Pinyruodh Nyasaye kaka nyathi matin, ok nodonjie ngang’.”
16 Mi nokawo nyithindogo e bedene, mochako guedhogi koketo lwetene kuomgi.
17 Sama nowuok, ng’at moro noringo ire mogoyo chonge piny e nyime kendo penje niya: “Japuonj Maber, ang’o ma nyaka atim eka ayud ngima mochwere?”
18 Yesu nodwoke kama: “Ang’o momiyo iluonga ni ng’at maber? Onge ng’at maber mak mana ng’at achiel, ma en Nyasaye.
19 Ing’eyo chike: ‘Kik inek, kik ichod, kik ikwel, kik ichiw neno mar miriambo, kik iti gi wuond e mayo jowadu, mi wuoru gi meru luor.’”
20 Ng’atno nowachone kama: “Japuonj, mago duto aserito a e tinna nyaka sani.”
21 Yesu nong’iye mi nohere mowachone ni, “Gimoro achiel oremi: Dhi ius gik ma in-go kendo imigi joma odhier eka inibed gi mwandu e polo; kae to ibi ibed jalupna.”
22 To nowinjo lit nikech dwokono, mi nodhi ka okuyo nikech ne en gi mwandu mang’eny.
23 Bang’ ng’iyo koni gi koni, Yesu nowacho ne jopuonjrene niya: “Mano kaka donjo e Pinyruodh Nyasaye nobed matek ne joma nigi pesa!”
24 To jopuonjrene nohum gi wechenego. Mi Yesu nokonegi kama: “Nyithindo, mano kaka donjo e Pinyruodh Nyasaye nobed matek!
25 Yot mondo ngamia okal e wang’ sandan moloyo jamwandu donjo e Pinyruodh Nyasaye.”
26 To e ma pod ne gimedo wuoro ka giwacho niya: “Ka en kamano, kare adier inyalo res ng’a?”
27 Kong’iyogi tir, Yesu nokonegi kama: “Kuom dhano ok nyalre, to ok en kamano kuom Nyasaye, nimar gik moko duto nyalore kuom Nyasaye.”
28 Petro nochako wachone niya: “Ne! Waseweyo gik moko duto mi waluwi.”
29 Yesu nowachonegi kama: “Adier awachonu ni, onge ng’at moseweyo ode, kata owetene, kata nyiminene, kata min-gi, kata wuon-gi, kata nyithinde, kata puothene, nikech an kendo nikech wach maber,
30 ma ok bi yudo nyadi 100 momedore gie ndalogi—ute gi owete gi nyimine gi mine gi nyithindo kod puothe kaachiel gi sand—kendo e ndalo ma biro, ngima mochwere.
31 To thoth joma okwongo nobed ma achien, to joma achien nobed mokwongo.”
32 Koro kane gin e ndara ka giidho gidhi Jerusalem, Yesu ne wuotho kotelo e nyimgi mi ne giwuoro, to joma ne luwogi nochako luor. Nokawo kendo ji Apar Gariyoka moterogi tenge, mi nochako wachonegi gik ma ne chiegni timorene niya:
33 “Neuru! Waidho nyaka Jerusalem, kendo Wuod dhano ibiro chiw e lwet jodong-jodolo gi jondiko. Gining’adne buch tho kendo ginichiwe e lwet ji moa e ogendni mamoko,
34 kendo jogo biro jare, kendo gining’ul olaw kuome, ginichwade, kendo gininege, to obiro chier bang’ ndalo adek.”
35 Jakobo gi Johana, ma gin yawuot Zebedi, nobiro ire mi giwachone kama: “Japuonj, dwaher ni itimnwa gimoro ma wadwaro kwayi.”
36 Nopenjogi niya: “Ang’o ma udwaro ni atimnu?”
37 Ne gidwoke niya: “Yienwa wabi wabed kodi ka iyudo duong’. Ng’at achiel obed e badi korachwich, to machielo e badi koracham.”
38 To Yesu nowachonegi kama: “Ok ung’eyo gima ukwayo. Be unyalo madho okombe ma amadhoni, to be inyalo batisu gi batiso kaka ma ibatisagoni?”
39 Ne gidwoke niya: “Nyalorenwa.” Eka Yesu nowachonegi niya: “Okombe ma amadhoni ubiro madho, kendo batiso ma ibatisagoni ibiro batisougo.
40 Kata kamano, an ok ema ami ji thuolo mar bet e bada korachwich kata koracham, to thuolono en mar jogo moseiknegi.”
41 Ka jopuonjre apar mamokogo nowinjo wachno, mirima nomakogi gi Jakobo kod Johana.
42 To Yesu noluongogi ire mowachonegi niya: “Ung’eyo ni joma nenore ni locho e wi ogendni timore ruodhi e wigi kendo joma nigi duong’ tiyo gi teko e wigi.
43 Mano ok e kaka onego obed e kindu; to ng’at ma dwaro bedo maduong’ e kindu nyaka bed jatiju,
44 kendo ng’at ma dwaro bedo mokwongo e kindu nyaka bed misumba jomamoko duto.
45 Nikech kata mana Wuod dhano nobiro, ok ni mondo ji otine, to mondo oti ne ji kendo mondo ochiw ngimane obed rawar ne ji mang’eny.”
46 Eka ne gidonjo Jeriko. To sama ne giwuok Jeriko ka en gi jopuonjrene kod oganda moro buora, Batimeo (wuod Timeo) ma ne en jakuecho ma muofu, nonwang’o obet e bath ndara.
47 Ka nowinjo ni mano ne en Yesu Ja-Nazareth, nochako kok niya: “Yesu, Wuod Daudi, kecha!”
48 Eka ji mang’eny nochako kwere matek ka giwachone ni oling’, to eka nomedo kok matek niya: “Wuod Daudi, kecha!”
49 Omiyo, Yesu ne ochung’ mowacho niya: “Luongeuru obi ira.” Mi ne giluongo muofuno ka giwachone niya: “Bed gi chir! Chung’; echa oluongi.”
50 Bang’ wito nangane ma oko, nochikore mochung’ gi tiendene kendo nodhi ir Yesu.
51 Koro Yesu nopenje kama: “Ang’o midwaro ni atimni?” Muofuno nodwoke niya: “Raboni, yaw wang’a onen kendo.”
52 Mi Yesu nowachone kama: “Dhiyo. Yieni osechangi.” Eka gikanyono wengene noyawore, kendo nochako luwo Yesu e ndara.
Weche Moler Piny
^ E dho Grik, wach molok kae ni “ochodo,” en sama dichwo kata dhako manie kend oterore oko mar kend.
