Mariko 12:1-44
12 Kendo nochako wuoyo kodgi kotiyo gi ngeche niya: “Ng’at moro nopidho puoth mzabibu kendo nogero chiel molwore, mi nokunyo bur mar biyo divai, kendo nogero ot ma rabora mar ng’icho; eka noketo puodhono e lwet jopur ma chule, kae to nodhi wuoth e piny moro mabor.
2 Ka kinde ma olemo nyakie nochopo, nooro misumba moro mondo odhi okel moko kuom olemo mag puoth mzabibuno koa kuom jopurgo.
3 To jopurgo ne omake mi gigoye, kendo ne giriembe gi lwete nono.
4 Nooro kendo misumba machielo irgi, to mano ne gigoyo wiye kendo ne gitimone timbe achaya.
5 Eka nooro misumba machielo, to en ne ginege, kendo nooro mamoko mang’eny, to moko kuomgi ne gigoyo, to moko ne ginego.
6 Pod nodong’ gi ng’at moro achiel ma en wuode mohero. Ne oore irgi mogik kowacho niya, ‘Gibiro miyo wuoda luor.’
7 To jopurgo nowacho e kindgi kama, ‘Mani e jal ma puodhoni biro dong’ne kaka pok. Biuru, wanegeuru mondo eka pokne obed marwa.’
8 Omiyo, ne gimake mi ginege kendo ne giwite oko mar puoth mzabibuno.
9 Ang’o ma wuon puoth mzabibuno biro timo? Enobi mi noneg jopurgo kae to ochiwo puoth mzabibuno ne jomamoko.
10 Ok ne usomo wach manie Ndiko ma wacho ni: ‘Kidi ma jogedo ne otamore, kidino osebedo kidi maduong’ moriwo kor ot.
11 Mani osetimore kokalo kuom Jehova kendo en gima ber miwuoro e wang’wa’?”
12 Nikech mano, ne gidwaro make to ne giluoro oganda nimar ne ging’eyo ni nogoyo ngerono kuomgi. Omiyo, ne giweye mi gidhi.
13 Bang’ mano, ne giorone moko kuom Jo-Farisai kod jolup Herode mondo gimake gi wach moa e dhoge.
14 Ka jogo nochopo, ne giwachone kama: “Japuonj, wang’eyo ni in ja adier kendo ni ok iluoro wang’ ng’ato nimar ok ing’i dhano gi kaka onenore gi oko to ipuonjo yor Nyasaye gadier. Be chulo osuru ne Kaisar en gima owinjore gi chik, koso ok owinjore?
15 Be onego wachul, koso ok onego wachul?” Nikech nong’eyo wuondruokgi, nokonegi niya: “Ang’o momiyo utema? Kelnauru dinari mondo ane.”
16 Ne gikelone dinari achiel mopenjogi kama: “Kido gi ndiko man kuomegi gin mag ng’a?” Ne gidwoke niya: “Gin mag Kaisar.”
17 Eka Yesu nowachonegi kama: “Chuluru Kaisar gige Kaisar, to gige Nyasaye ne Nyasaye.” Mi ne gihum kode.
18 Koro Jo-Sadukai ma wacho ni chier onge nobiro ire mi gipenje niya:
19 “Japuonj, Musa nondikonwa ni ka owadgi ng’ato otho moweyo chiege chien to ok oweyo nyathi, owadgi onego okaw chiegeno mondo onyuolnego nyithindo.
20 Ne nitie owete moko abiriyo. Mokwongo nokendo dhako, to kane otho, ok noweyo nyathi.
21 Kendo mar ariyo ne okende, to ne otho ma ok oweyo nyathi, kendo mar adek bende mana kamano.
22 Mi owete abiriyogo ok noweyo nyathi moro amora. Gikone, dhakono bende ne otho.
23 E chier, dhakono nobed chi ng’a? Nimar nosebedo chi owete abiriyogo.”
24 Yesu nodwokogi niya: “Donge ma e momiyo parou ok ni kare, nimar ok ung’eyo Ndiko kata teko mar Nyasaye?
25 Nikech e kinde ma ginichier a kuom joma otho, chwo ok kend, kendo mon bende ok chiw e kend, to gibedo kaka malaike e polo.
26 To kuom wach chiero joma otho, donge usesomo e bug Musa e sigand bungu mar kuthe, ni Nyasaye nowachone ni: ‘An e Nyasach Ibrahim, Nyasach Isaka, kendo Nyasach Jakobo’?
27 En Nyasach joma ngima, to ok Nyasach joma otho. Parou ok ni kare chuth.”
28 Achiel kuom jondiko ma noyudo osebiro kendo ma nowinjo ka gimino wach kode, nong’eyo ni nosedwokogi e yo maber, mi nopenjo Yesu niya: “En chik mane mokwongo ne mamoko duto?”
29 Yesu nodwoko kama: “Mokwongo en ni, ‘Winjuru, A Israel, Jehova Nyasachwa en Jehova achiel,
30 kendo nyaka iher Jehova Nyasachi gi chunyi duto, gi ngimani duto, gi pachi duto, kendo gi tekoni duto.’
31 Mar ariyo e ma, ‘Nyaka iher wadu kaka iherori iwuon.’ Onge chik machielo maduong’ moloyo ariyogi.”
32 Jandikono nowachone niya: “Japuonj, iwacho kare ka luwore gi adiera, ‘En Achiel, kendo onge machielo mak mana en’;
33 kendo wacho ni ng’ato ohere gi chunye duto, gi ng’eyone duto, kod gi tekone duto, kendo wacho ni ng’ato oher wadgi kaka oherore owuon, en gima duong’ moloyo chiwo duto miwang’o pep kaka ogolgino kod misengni duto.”
34 Eka Yesu ka noseng’eyo ni jalo nodwoko e yo mariek, nokone kama: “Ok ibor gi Pinyruodh Nyasaye.” To onge ng’at ma ne nigi chir mar penje kendo.
35 Kata kamano, sama Yesu ne dhi nyime gi puonjo e hekalu nowacho niya: “Obet nade ni jondiko wacho ni Kristo en wuod Daudi?
36 Kokalo kuom roho maler, Daudi owuon noluwo kama, ‘Jehova nowacho ne Ruodha niya: “Bed e bada korachwich nyaka chop aket wasiki e bwo tiendi.”’
37 Ka Daudi owuon luonge ni Ruodha, ere kaka onyalo bedo wuode?”
Kendo oganda mang’ongo ne winje gi ilo.
38 Eka nodhi nyime puonjo kowacho niya: “Tang’uru gi jondiko ma dwaro wuotho koni gi koni ka girwako kandho kendo ma dwaro ni ji omosgi ka dhialogi e chirni,
39 kendo ma dwaro kombe ma nyime e sunagoke kod kuonde moyiedh mogik e nyasi.
40 Giyako ute mond liete, kendo gilamo lamo maboyo mana ni mondo ji onegi. Jogi noyud kum magerie moloyo.”
41 Eka nobet piny kama nonyalo nenoe sanduge mag keno, mi nochako ng’iyo kaka oganda ne luto pesa e sanduge mag kenogo, to jomwandu mang’eny ne luto pesa mang’eny ma mingli.
42 Koro chi liel moro modhier nobiro kendo noluto pesa ma mingli ariyo ma nigi nengo matin ahinya.
43 Omiyo, noluongo jopuonjrene ire mowachonegi niya: “Adier awachonu ni, chi liel modhierni oseluto moloyo jogi duto ma a oluto pesa e sanduge mag kenogo.
44 Nikech giduto giluto koa kuom gigegi momedore, to en, kata obedo ni odhier, oseluto duto ma dokonyrego e ngimane.”
