Mariko 13:1-37
13 E sama nowuok e hekalu, achiel kuom jopuonjrene nowachone niya: “Japuonj, ne ane! kitego kod utego beyo miwuoro!”
2 Kata kamano, Yesu nokone kama: “Ineno ute madongogi? Onge kidi ma biro dong’ e wi kidi wadgi ma ok nowit piny.”
3 Sama nobet piny e Got Zeituni kama hekalu ne nyalo nenoree, Petro gi Jakobo gi Johana kod Andrea nopenje kar kendgi niya:
4 “Wachnwae, karang’o ma gigi biro timoree, to en ranyisi mane ma biro nyiso kinde ma gigi duto nochop e giko?”
5 Omiyo, Yesu nochako wachonegi kama: “Tang’uru mondo kik ng’ato mi ulal.
6 Ji mang’eny nobi ka gitiyo gi nyinga ka giwacho kama, ‘An e en,’ kendo ginimi ji mang’eny lal.
7 E wi mano, ka uwinjo wach lwenje kod humb lwenje, kik uluor; gigi nyaka timre, kata kamano giko to nobed ni pod.
8 “Nikech oganda noked gi oganda kendo pinyruoth noked gi pinyruoth; yiengni mag piny nobedie kamoro bang’ machielo; chiemo bende nobed manok. Magi gin chakruok mag muoch ma kecho.
9 “To un, beduru motang’. Ji noteru e utegi mag ng’ado bura kendo ibiro gou e sunagoke kendo ji nomi uchung’ e nyim joloch gi ruodhi nikech an, mi unuchiwnegi neno.
10 Bende, ei ogendni duto, wach maber nyaka kwong yal.
11 Ka gikawou mondo giteru e utego ng’ado burago, kik ubed gi parruok motelo kuom gima duwach; to gima ibiro miu e sano, wachuru mano, nimar ok en un ma uwuoyo to en roho maler.
12 E wi mano, owadgi ng’ato notere mondo onege, to wuoro nolokre gi nyathine, kendo nyithindo nolokre gi jonyuolgi kendo ginimi neggi.
13 Kendo ji duto nosin kodu nikech nyinga. To ng’at ma onano nyaka giko ibiro res.
14 “Kata kamano, ka uneno gima odwanyore ma kelo kethruok kochung’ e kama ok onego obedie (jasomo mondo oti gi rieko), eka joma ni Judea mondo ochak ringo ka gidhi e gode.
15 Ng’at man e wi tat ot kik olor piny kata donjo ei ode mondo okaw gimoro amora;
16 kendo ng’at man e puodho kik dog pacho e gik moweyo chien mondo okaw nangane ma oko.
17 Yaye, nobed malit ne mon ma yach kod mago ma dhodho nyithindo e ndalono!
18 Sikuru ka ulamo mondo mano kik timre e ndalo koyo;
19 nikech kindeno nobed kinde masira ma pok ne otimore a chakruok mar chuech Nyasaye nyaka chop sani, to ok nochak otimre kendo.
20 Kuom adier, dine bed ni Jehova ok ong’ado ndalogo machuok, onge ng’ato ma dores. To nikech joma oyier ma osewalo, oseng’ado ndalogo machuok.
21 “Eka bende ka ng’ato wachonu ni, ‘Neuru! Eri Kristo ni ka,’ kata ni, ‘Neuru! En kacha!’ kik uyie mano.
22 Nimar Kristo mag miriambo gi jonabi mag miriambo nosiek kendo ginitim ranyisi madongo gi gik miwuoro mondo gimi ji orweny, ma ka nyalore, to gimi kata mana jogo moyier olal.
23 E momiyo un to beduru motang’. Asewachonu gigi duto motelo.
24 “To e ndalogo, bang’ masirano, ibiro lok wang’-chieng’ obed mudho kendo dwe ok nochiw ler mare
25 kendo sulwe nobed ka lwar koa e polo kendo ibiro yieng teko manie polo.
26 Eka ginine Wuod dhano ka biro e boche polo ka en gi teko mang’ongo kod duong’.
27 Kendo eka obiro oro malaikene mi ginichok joge moyier kanyachiel ka giwuok e tunge* ang’wen mag piny, a e tung’ piny nyaka e tung’ polo.
28 “Koro puonjreuru kuom ranyisi mar yadh ng’owo: Mapiyo bang’ ka bedene osedongo moloth mayom kendo kosegolo obokene, ung’eyo ni kinde oro chiegni.
29 Kamano bende, sama uneno gigi ka timore, ng’euru ni Wuod dhano chiegni e dhoot.
30 Adier awachonu ni, tieng’ni ok bi kalo ngang’ nyaka chop gigi duto timre.
31 Polo gi piny biro kalo, to wechena ok nokal ngang’.
32 “Kuom wach chieng’no kata sano, onge ng’at mong’eyo, kata malaike manie polo, kata Wuod Nyasaye, to mana Wuora.
33 Sikuru ka utang’, sikuru ka uneno, nimar ok ung’eyo ni kinde moket en karang’o.
34 En kaka ng’at moro ma nodhi wuoth e piny mabor, moweyo ode, kendo nomiyo wasumbnine teko, moro ka moro gi tichne, kendo nochiko jarit-dhoot mondo orit ka oneno.
35 Kuom mano, sikuru ka uneno nikech ok ung’eyo ni wuon ot biro karang’o, kabe obiro godhiambo kata e dier otieno kata kogwen kata gokinyi ahinya,
36 mondo ka obiro apoya kik oyud kunindo.
37 To gima awachonu awacho ne ji duto niya: Sikuru ka uneno.”
Weche Moler Piny
^ Tiende sie en, “yembe ang’wen.”
