Mariko 14:1-72
-
Jodolo poro wach mondo gineg Yesu (1, 2)
-
Ool mo ma nigi suya mamit kuom Yesu (3-9)
-
Juda ondhogo Yesu (10, 11)
-
Pasaka mogik (12-21)
-
Chakruok mar Chiemo Modhiambo mar Ruoth (22-26)
-
Ikoro ni Petro ne dhi kwer ni ok ong’eyo Yesu (27-31)
-
Yesu lemo Gethsemane (32-42)
-
Yesu imako (43-52)
-
Iyale e nyim Sanhedrin (53-65)
-
Petro kwer ni ok ong’eyo Yesu (66-72)
14 Koro Pasaka kod Sawo mar Makate Maonge Thowi ne dhi timore odiechienge ariyo bang’e. Kendo jodong-jodolo gi jondiko ne manyo kaka ne ginyalo make ka gitiyo gi wuond mariek, nikech ne gidwaro ginege;
2 nimar ne giwacho kama: “Ok e kinde sawo; dipo ka koko obetie e kind oganda.”
3 To kane en Bethania kochiemo e od Simon jadhoho, dhako moro nobiro ma nigi chupa molos gi kidi mar alabasta moting’o mo ma nigi suya mamit, mor nad madier, ma en mo ma nengone ne tek gilala. Notoyo dho chup alabastano mi nochako olo morno e wi Yesu.
4 Nikech mano, jomoko nowacho e kindgi giwegi ka gin gi mirima niya: “Ang’o momiyo mo ma nigi suya mamitni iketho kama?
5 Nimar dine ous mo ma nigi suya mamitni e nengo mokalo dinari 300 mondo omi joma odhier pesago!” Omiyo, ne gisin kode ahinya.
6 Kata kamano, Yesu nowachonegi niya: “Wereuru kode. Ang’o momiyo utemo chande? Osetimona tim maber.
7 Nimar kinde duto un gi joma odhier, kendo unyalo timonegi maber samoro amora ma udwaro. An to ok unubed koda kinde duto.
8 Osetimo gima onyalo; oseolo mo ma nigi suya mamit e denda mondo oika motelo ne yik.
9 Adier awachonu ni, kamoro amora ma ibiro landie wach maber e piny duto, gima dhakoni osetimoni bende nowach kaka rapar mare.”
10 To Judas Iskariot, ma ne en achiel kuom ji Apar Gariyoka nowuok modhi ir jodong-jodolo mondo ondhog Yesu.
11 Kane giwinjo mano, ne gimor mi gisingo mar miye pesa mar fedha. Omiyo, nochako manyo thuolo mar ndhoge.
12 Koro e odiechieng’ mokwongo mar sawo mar Makate Maonge Thowi, chieng’ ma ne gin gi tim mar chiwo misango mar Pasaka, jopuonjrene nopenje niya: “Idwaro ni wadhi waikni kanye mondo ichamie Pasaka?”
13 Eka nooro jopuonjrene moko ariyo kowachonegi kama: “Donjuru e taon, kendo ng’at moro moting’o aguch lowo mar pi biro romo kodu. Uluwe,
14 kendo ka modhi modonjoe wachuru ne wuon odno ni, ‘Japuonj penjo kama: “Ere od welo kama dachamie Pasaka gi jopuonjrena?”’
15 To obiro nyisou ot mamalo malach moseikie gik moko. Kanyo e ma mondo uiknwa.”
16 Omiyo, jopuonjre nowuok mi gidonjo e taondno kendo ne giyudo mana kaka nosewachonegi, mi ne gitimo ikruok ne Pasaka.
17 Ka nosechopo odhiambo, nobiro gi ji Apar Gariyoka.
18 To sama ne gibet piny e mesa ka gichiemo, Yesu nowacho kama: “Adier awachonu ni, ng’at achiel kuomu, ma chiemo koda, biro ndhoga.”
19 Ne gichako winjo malit mi ng’ato ka ng’ato ne openje niya: “Dobed an, koso?”
20 Nowachonegi kama: “En achiel kuomu un ji Apar Gariyo, jalno ma luto lwete koda e bakul.
21 Nimar Wuod dhano dhi tho mana kaka nondik kuome, to yaye nobed malit ne ng’atno ma Wuod dhano indhogo kokalo kuome! Dine obedo maber moloyo ka dine ok onyuol ng’atno.”
22 To sama ne gidhi nyime gi chiemo, nokawo makate, noguedho, nong’ingo, mi nomiyogi kowacho niya: “Kawuru; mani ochung’ ne ringra.”
23 Eka bang’ kawo okombe, nogoyo erokamano, mi nomiyogi, kendo giduto ne gimethoe.
24 Mi nokonegi niya: “Mani ochung’ ne ‘remba mar singruok,’ ma biro chuer nikech ji mang’eny.
25 Adier awachonu ni, ok anachak amadh divai mar olemb mzabibuni kendo nyaka chop chieng’no ma abiro madhee manyien e Pinyruodh Nyasaye.”
26 Gikone, bang’ wero wende mag pako Nyasaye, ne giwuok mi gidhi e Got Zeituni.
27 Eka Yesu nowachonegi niya: “Uduto ubiro chwanyoru nimar ondik kama: ‘Abiro goyo jakwath kendo rombe biro ke.’
28 To ka osechiera, abiro dhi Galili motelonu.”
29 To Petro nodwoke niya: “Kata kapo ni jomamokogo duto ochwanyore, an to ok abi timo kamano.”
30 Nikech mano, Yesu nowachone kama: “Adier awachoni ni, kawuono, ee, e otieno ma kawuononi, ka pok thwon-gweno okok nyadiriyo ibiro kwer nyadidek ni ok ing’eya.”
31 To nomedo ramo kowacho niya: “Kata kochuno ni atho kodi, ok abi kwer ngang’ ni ok ang’eyi.” Bende jomamokogo duto nochako wacho mana kamano.
32 Eka ne gichopo kama iluongo ni Gethsemane, mi nowacho ne jopuonjrene niya: “Beduru piny kae sama alemo.”
33 Kendo nokawo Petro gi Jakobo kod Johana modhi kodgi, mi nochako bedo gi kuyo kendo chunye ne chandore ahinya.
34 Nowachonegi niya: “Chunya nigi kuyo maduong’ ma datho kata. Beduru kae kendo sikuru ka uneno.”
35 Kendo ka nosedhi mabor matin, nopodho piny mochako lemo ni ka nyalore to sano okal kik bine.
36 Eka nowacho niya: “Aba, Wuora, gik moko duto nyaloreni; gol okombeni oa kuoma. Kata kamano, ok gima adwaro to gima idwaro.”
37 Noduogo monwang’ogi ka ginindo mi nopenjo Petro kama: “Simon, inindo? Ionge gi teko mar neno ka irito kata mana kuom sa achiel?
38 Sikuru ka uneno kendo ka ulemo kinde duto mondo kik udonj e tem. En adier ni chuny dwaro to ringruok e ma nyap.”
39 Mi nodok mondo olem kendo, kowacho mana wecheka.
40 Kendo noduogo moyudogi ka ginindo nimar nindo nohewogi, omiyo ne ok ging’eyo gima ne ginyalo dwoke.
41 Mi noduogo mar adek mowachonegi niya: “E sa ma kama unindo kendo uyueyo! Oromo! Sa osechopo! Neuru! Indhogo Wuod dhano e lwet joricho.
42 Auru malo, wadhiuru. Neuru! Jandhokna osekayo machiegni.”
43 Eka gikanyono ka pod nowuoyo, Judas, ma ne en achiel kuom ji Apar Gariyoka nochopo, kendo ne en gi oganda moting’o ligengni gi arunge ka oorgi gi jodong-jodolo gi jondiko kod jodongo.
44 Koro noyudo jandhokne osemiyogi ranyisi ma ne giwinjoree kowacho kama: “Ng’at ma abiro nyodho, mano e en; makeuru kendo utere ka en e bwo arita maber.”
45 Mi nobiro ire tir mowacho ni, “Rabi!” kae to ne onyodhe gi mor.”
46 Omiyo, ne gimake mondo gidhi kode.
47 Kata kamano, achiel kuom joma ne ochung’ kanyo nowuodho liganglane mi nochadhogo misumba mar jadolo maduong’ kendo nong’ado ite oko.
48 To Yesu nopenjogi kama: “Ere gimomiyo ubirona kuting’o ligengni gi arunge ka joma dhi mako jamecho?
49 Pile ka pile ne an kodu e hekalu ka apuonjo to ok ne umaka. Kata kamano, mani en ni mondo Ndiko ochop.”
50 Eka giduto ne gijwang’e mi giringo.
51 To ng’at moro ma rawera ma ne ni duk ma norwakore mana gi law kitani moro maber, nochako luwe machiegni to ne gitemo mondo gimake,
52 kata kamano noweyo nanga mar kitanino mi noringo duk.*
53 Koro ne gitero Yesu ir jadolo maduong’ kendo jodong-jodolo gi jodongo kod jondiko duto nochokore.
54 To Petro noluwe ka en mabor matin nyaka e laru mar jadolo maduong’; kendo nobet kanyachiel gi jotich mag ot ka ooyo mach ma ne liel karieny.
55 Koro jodong-jodolo gi buch Sanhedrin duto ne manyo wach moro ma ne ginyalo donjonego Yesu mondo ginege, to ne ok giyudo wach moro amora.
56 Adier ji mang’eny ne chiwo neno mar miriambo e wiye, to neno ma ne gichiwogo ne kwedore.
57 Bende, nitie jomoko ma ne chung’ to gichiwo neno ma miriambo e wiye ka giwacho kama:
58 “Ne wawinjo kowacho ni, ‘Abiro goyo hekalu ma nolos gi lwedoni piny, kendo abiro gero machielo ma ok olos gi lwedo, mana gi ndalo adek.’”
59 To kata mana e wechego, neno ma ne gichiwo ne kwedore.
60 Eka jadolo maduong’ ne ochung’ e diergi mopenjo Yesu niya: “Ionge wach ma inyalo dwoko? En wach mane ma jogi donjonigo?”
61 To ne oling’ aling’a ma ok odwoko wach moro amora. Eka jadolo maduong’ nochako penje kendo niya: “Be in e Kristo Wuod Ng’at Moguedh?”
62 Yesu nodwoko kama: “Ee, e an; kendo ubiro neno Wuod dhano kobet e bat korachwich ma nigi teko kendo kobiro gi boche polo.”
63 Mi jadolo maduong’ noyiecho lepe kowacho niya: “Ere tiende medo luongo joneno?
64 Usewinjo kaka ochayo Nyasaye. Ung’ado nang’o?” Giduto ne ging’ado ni, owinjore otho.
65 Kendo jomoko nochako ng’ulo olaw kuome, kendo ne giumo wang’e mi gigoye adhong’ ka giwachone kama: “Kor ane wach!” Eka ne githalo wang’e, kae to jorit mag od bura nokawe.
66 Koro sama Petro ne ni mwalo oko e laru, achiel kuom jotich ma nyiri mag jadolo maduong’ nobiro.
67 Ka noneno Petro ka oyo mach, nong’iye tir mowachone kama: “In bende a in gi Yesu ma Ja-Nazarethno.”
68 To ne okwer kowacho niya: “Ok ang’eye, to bende ok awinj tiend gima itemo wacho,” eka nodhi kochomo yo rangach.
69 Kanyo, jatich ma nyako nonene mi nochako wacho ne joma ne ochung’ kanyo kama: “Ng’atni en achiel kuomgi.”
70 Petro ne okwer kendo. To bang’ kinde machuok, joma ne ochung’ kanyo nochako wacho ne Petro kama: “Kuom adier, in achiel kuomgi nimar adier in Ja-Galili.”
71 Kata kamano, nochako kuong’ore koramo niya: “Ok ang’eyo ng’at ma uwuoyo kuomeni!”
72 Gikanyono, thwon-gweno ne okok mar ariyo kae to Petro noparo wach ma Yesu nosewachone kama: “Ka pok thwon-gweno okok nyadiriyo, ibiro kwer nyadidek ni ok ing’eya.” Eka nowinjo malit mi nochako ywak.
Weche Moler Piny
^ Tiende ni, ne “odong’ ka orwakore gi lewni ma iye kende.”
