Mariko 15:1-47
15 Kane piny chiegni ru, gikanyono jodong-jodolo, gi jodongo, kod jondiko, ma en buch Sanhedrin duto, noriwo paro kanyachiel, kae to ne gitueyo Yesu mi gitere kendo chiwe e lwet Pilato.
2 Pilato nopenje niya: “In e Ruodh Jo-Yahudi, koso?” En nodwoke kama: “In iwuon isewacho.”
3 To jodong-jodolo ne donjone gi weche mang’eny.
4 Koro Pilato nochako penje kendo niya: “Ionge dwoko ma dichiw? Ne ane kaka gidonjoni gi weche mang’eny.”
5 To Yesu ok nomedo dwoke, mi mano nomiyo Pilato owuoro.
6 Koro e kinde sawo ka sawo, nojagonyonegi ng’at achiel motue ma ne gidwaro.
7 Gie kindeno ne nitie ng’at miluongo ni Baraba ma ne ni e jela kanyachiel gi joma nong’anjo ne sirkal kendo ne gineko e timgi mar ng’anjono.
8 Omiyo, oganda nobiro mi gichako kwayo kaka Pilato ne jatimonegi.
9 Nopenjogi niya: “Udwaro ni agonynu Ruodh Jo-Yahudi, koso?”
10 Nimar Pilato nong’eyo ni ich-lit e ma nomiyo jodong-jodolo ochiwo Yesu e lwete.
11 To jodong-jodolo nojiwo oganda ni gikwa mondo ogonynegi Baraba, kar gonyo Yesu.
12 Eka Pilato nopenjogi kendo niya: “Kare ang’o monego atim gi jal muluongo ni Ruodh Jo-Yahudini?”
13 Ne gikok kendo kama: “Gure e yath!”
14 To Pilato nodhi nyime penjogi niya: “Nikech ang’o? En ketho mane mosetimo?” Pod ne gimedo kok matek niya: “Gure e yath!”
15 To nikech Pilato ne dwaro moro oganda, nogonyonegi Baraba; kendo bang’ chiko mondo ochwad Yesu, ne ochiwe mondo ginege e yath.
16 Koro askeche notere e laru mar od gavana kendo ne gichoko kanyachiel kidieny mangima mar askeche.
17 Mi ne girwakone kandho ma rangine rajamna kendo ne giloso osimbo mar kuthe mi gisidhone;
18 Eka ne gichako wachone kama: “Misawa, in Ruodh Jo-Yahudi!”
19 Bende, ne gigoyo wiye gi odundu kendo ne ging’ulo olaw kuome kendo ne gigoyo chongegi piny ka gikulorene.
20 Gikone, kane gisetieko jare, ne gilonyo kuome nanga ma rangine ne rajamnano, mi girwakone lepe ma oko. Kendo ne gitere mondo gigure e yath.
21 Bende, ne gichuno ng’at moro ma ne kalo mondo oting’ yath ma ne idhi negie Yesu, ng’atno ne iluongo ni Simon ma Ja-Kirene ma noa e gweng’ moro kendo ne en wuon Aleksanda kod Rufas.
22 Omiyo, ne gikele kama iluongo ni Golgotha, ma kolok tiende en ni, “Kar Hanga Wich.”
23 Kanyo, ne gitemo miye divai moruw gi manemane to notamore madho.
24 Mi ne gigure e yath kendo ne gipogore lepe ma oko kuom goyo ombulu mondo ging’e gima ng’ato ka ng’ato nonego okaw.
25 Koro sa adek okinyi, e sama ne gigure e yath.
26 Kendo wach ma nodonjnego nondik e yadh-sand kama: “Ruodh Jo-Yahudi.”
27 E wi mano, ne giguro jomecho ariyo e yien kaachiel kode, achiel e bade korachwich to machielo e bade koracham.
28 ——
29 Kendo joma ne kalo ne jare, ka giyiengo wigi kendo ne giwacho kama: “He hee! In ma nidhi goyo hekalu piny kendo gere gi ndalo adek,
30 resri ane iwuon, ilor ia e yadh-sandno.”
31 E yo ma kamano bende, jodong-jodolo gi jondiko ne jare e kindgi giwegi ka giwacho kama: “Noreso jomoko; to en owuon ok onyal resore!
32 Kristo Ruodh Israel mondo olor ane koa e yadh-sandno eka wane mondo wayie kuome.” Kata mana joma ne ogur e yien e bathe koni gi koni ne jare.
33 Ka nochopo sa auchiel odiechieng’, mudho noimo pinyno duto nyaka sa ochiko.
34 Kendo ka nochopo sa ochiko, Yesu ne okok gi dwol maduong’ niya: “Eli, Eli, lama sabakthani?” ma tiende kolok en ni: “Nyasacha, Nyasacha, iseweya nang’o?”
35 Eka bang’ winjo mano, moko kuom joma ne ochung’ machiegni nochako wacho kama: “Neuru! Oluongo Elija.”
36 Kae to ng’at moro noringo monyumo sipanj e divai mawach, mi nokete e odundu kendo nomiye mondo omadh kowacho niya: “We obedne kamano! Wane ane kabe Elija dhi biro mondo olore piny.”
37 Eka Yesu nokok gi dwol maduong’ kae to otho.
38 Kendo pasia mar hekalu nobarore ariyo a malo nyaka piny.
39 Koro ka jatend-askeche* ma ne ochung’ ka ng’iye noneno ni nosetho e yo ma kamano, nowacho kama: “Adier, jali ne en Wuod Nyasaye.”
40 Bende, ne nitie mon moko ma ne ng’icho gi kama bor matin, moko kuomgi ne gin Maria Magdalina,* kaachiel gi Maria min Jakobo Matin gi Jose, kod Salome,
41 ma gin mon ma ne hinyo wuotho kode ka gikonye kane en Galili. Kanyo bende ne nitie mon mamoko mang’eny ma noyudo osebiro kode nyaka Jerusalem.
42 Koro nikech nosechopo odhiambo, to ne en chieng’ Ikruok, tiende ni chieng’ motelo ne Sabato,
43 Josef moa Arimathea, jal ma omi luor ma ne ni e bura mar Sanhedrin, ma bende nosebedo ka rito Pinyruodh Nyasaye, ne obiro. Nobedo gi chir mi nodhi ir Pilato kendo nokwaye ringre Yesu.
44 To Pilato nowuoro kabe nyaka chop sano ne inyalo yud ka osetho, kendo bang’ luongo jatend-askeche, nopenje kabe Yesu nosetho.
45 Ka noseyudo wach gadier kuom jatelono, noyie mondo omi Josef ringreno.
46 Bang’ mano, Josef nong’iewo law kitani maber, kendo ne oloro Yesu piny moboye e law kitani maberno, kendo nokete e liel ma nokuny ei lwanda; eka nong’ielo kidi moro e dho liel.
47 To Maria Magdalina kod Maria min Jose nodhi nyime ng’iyo kama noseketeeno.
Weche Moler Piny
^ Jatelo ma askeche lweny 100 mag Rumi ni e bwoye.
