Mariko 8:1-38
8 E kindeno, ne nitie oganda mang’ongo kendo, to ne gionge gi gima ne ginyalo chamo. Omiyo, noluongo jopuonjrene mowachonegi kama:
2 “Akecho ogandani nimar koro gisebedo koda ka kuom odiechienge adek to gionge gima ginyalo chamo.
3 Kapo ni agonyogi gi kech mondo gidog e miechgi, gibiro podho e ndara, to moko kuomgi oa mabor.”
4 To jopuonjrene nodwoke niya: “Kae wan kama bor gi kama ji odakie, ere kama ng’ato biro yudoe makate ma yieng’o ogandani?”
5 Omiyo nopenjogi niya: “Un gi makate adi?” Ne gidwoke ni: “Abiriyo.”
6 Mi nochiko oganda mondo obed piny. Kae to nokawo makate abiriyogo kendo nogoyo erokamano, mi nong’ingogi, mochako miyogi jopuonjrene mondo gimi ji, mi ne gimiyogi oganda.
7 Bende, ne gin gi rech manok matindo kendo bang’ guedho rechgo, nokonegi mondo gimi oganda rechgo bende.
8 Omiyo, ne gichiemo mi giyieng’ kendo ne gichoko ng’injo ma ne odong’ mi gipong’o okepni madongo abiriyo.
9 Ne nitie chwo ma dirom 4,000. Kae to nogonyogi mi gidhi.
10 Gikanyono, noidho yie gi jopuonjrene modonjo e alwora mar Dalmanutha.*
11 Kanyo Jo-Farisai nobiro mi gichako mino kode wach ka gidwaro ahinya ni omigi ranyisi moa e polo mondo gitemego.
12 Omiyo, nogamo muya matek e chunye mowacho niya: “Ang’o momiyo tieng’ni manyo ranyisi? Adier awachonu ni, onge ranyisi ma nomi tieng’ni.”
13 Eka noweyogi mi noidho yie kendo, kae to nodhi e wath ma loka nam.
14 Kata kamano, wigi nowil ma ok giting’o makate, to ne gionge gi gimoro e yie mak mana makate achiel.
15 Mi nosiemogi matek niya: “Yawuru wang’u; tang’uru gi thowi mar Jo-Farisai kod thowi mar Herode.”
16 Omiyo, ne gichako bedo gi mbaka matek e kindgi nikech ne gionge makate.
17 Ka nofwenyo mano, nopenjogi kama: “Ang’o momiyo ubedo gi mbaka matek nikech uonge makate? Pok ufwenyo wachno kendo ng’eyo tiende maber? Pod chunyu odinore kuom ng’eyo tiend weche, koso?
18 ‘Kata obedo ni un gi wang’, be uneno; kendo kata obedo ni un gi it, be uwinjo?’ Bende, ok unyal paro
19 ni kane ang’ingo makate abich ne chwo 5,000, ne uchoko okepni adi ma ne opong’ gi ng’injo?” Ne gidwoke niya: “Apar gariyo.”
20 Nomedo penjogi kama: “Kane ang’ingo makate abiriyoka ne chwo 4,000, ne uchoko okepni adi madongo ma ne opong’ gi ng’injo?” Mi ne gidwoke niya: “Abiriyo.”
21 Eka nokonegi kama: “Pod ok ung’eyo tiend wachni?”
22 Koro ne gigowo e Bethsaida. Kanyo ji nokelone ng’at moro ma muofu, kendo ne gisaye mondo omule.
23 Mi nomako lwet muofuno kendo nogole oko mar gweng’no. To ka noseng’ulo olaw e wang’e, noketo lwetene kuome mopenje niya: “Be ineno gimoro amora?”
24 Ng’atno nong’iyo malo mowacho kama: “Aneno ji to gichal gi yien ma wuotho koni gi koni.”
25 Mi noketo lwetene kendo e wang’ ng’atno kendo jalo noneno maler. Wang’e nochango kendo koro nonyalo neno gik moko duto kaka kitgi obet adier.
26 Omiyo, nogonye mondo odhi pacho kowachone kama: “Kik idonj ei gweng’no.”
27 Yesu kod jopuonjrene koro noa kanyo mondo gidhi e gwenge mag Kaisaria Filipi, to kane gin e yo, nochako penjo jopuonjrene niya: “Ji wacho ni an ng’a?”
28 Ne gidwoke kama: “Johana Jabatiso, to moko ni Elija, to pod moko wacho ni in achiel kuom jonabi.”
29 Mi nopenjogi niya: “Un to uwacho ni an ng’a?” Petro nodwoke kama: “In e Kristo.”
30 Eka nochikogi matek ni kik gihul ne ng’ato ang’ata ni en ng’a.
31 Bende, nochako puonjogi kowacho ni Wuod dhano nyaka kal e sand mang’eny, kendo jodongo, gi jodong-jodolo, kod jondiko biro kwede, kendo ibiro nege, kae to obiro chier bang’ ndalo adek.
32 Kuom adier, nowacho wechego ayanga. To Petro notere tenge mochako kwere.
33 Mi nolokore mong’iyo jopuonjrene kendo nokwero Petro niya: “Dhi chien ka ng’eya Satan! nikech ok in gi paro mag Nyasaye, to mag dhano.”
34 Koro noluongo oganda ire gi jopuonjrene mowachonegi kama: “Ka ng’ato ang’ata dwaro luwa, to mondo okwerre owuon kendo oting’ yadh-sandne, kae to odhi nyime luwa.
35 Nimar ng’at ma dwaro reso ngimane nolal ngimane, to ng’at molalo ngimane nikech an kendo nikech wach maber, biro reso ngimane.
36 Kuom adier, en ohala mane ma ng’ato yudo konwang’o piny duto to ngimane to olalne?
37 Kata ere gima ng’ato nyalo chiwo mondo okaw kar ngimane?
38 Nimar ng’at ma neno wich-kuot nikech an kendo nikech wechena ei tieng’ ma terore* kendo marachni, Wuod dhano bende none wich-kuot kode e kinde ma nobi e duong’ mar Wuon mare ka en gi malaike maler.”
Weche Moler Piny
^ Nyalo bedo ni mani en nying machielo mar Magadan, kata nonyalo bedo gweng’ moro man machiegni (ne weche moler piny e Mat 15:39).
^ Tiende ni, joma ok omakore motegno gi Nyasaye.
