Mathayo 10:1-42
10 Eka noluongo jopuonjrene 12 mi omiyogi teko e wi jochiende mondo gigolgi kendo gichang kit tuoche duto kod kit midekre duto.
2 Nying joote 12 e magi: Mokwongo, Simon miluongo ni Petro, gi Andrea owadgi; Jakobo wuod Zebedi gi Johana owadgi;
3 Filipo kod Bathlomeo; Thoma kod Mathayo jasol osuru; Jakobo wuod Alfayo; Thadayo;
4 Simon ma jakinda kod Judas Iskariot ma bang’e ne ondhoge.
5 Yesu nooro joote apar gariyogo kochikogi kama: “Kik udhi e ndara mar ogendni mamoko kendo kik udonj e taon moro amora mar Samaria,
6 to kar mano sikuru ka udhi ir rombe molal mag od Israel.
7 Sama udhi, yaluru ka uwacho niya: ‘Pinyruodh polo osekayo machiegni.’
8 Changuru joma tuo, chieruru joma otho, pwodhuru jodhoho obed maler, goluru jochiende. Nuyudo nono, omiyo chiwuru nono.
9 Kik uting’ dhahabu, kata fedha, kata mula e msibeu mutueyo mag ting’o pesa,
10 kata ofuk chiemo mar wuoth, kata nengni ariyo, kata wuoche, kata luth, nimar jatich owinjore oyud chiembe.
11 “E taon kata e gweng’ moro amora mudonjoe, manyuru ng’at mowinjore e iye kendo ubed kanyo nyaka ua.
12 Sama udonjo e ot, mosuru joodno.
13 Ka odno owinjore, to kuwe maru mondo obed kuome; to ka ok owinjore, to kuwe maru mondo oduognu.
14 Kamoro amora ma ng’ato ok orwakoue kata ok owinjoe wecheu, sama uwuok e odno kata e taondno, teng’uru buch tiendeu.
15 Adier awachonu ni, kum mar piny Sodom gi Gomora nobed ma berberie moloyo mar taondno e Chieng’ Bura.
16 “Neuru! Aorou kaka rombe manie kind ondiegi; omiyo beduru motang’ kaka thuonde to bende ma onge bura kaka akuche.
17 Tang’uru gi ji nikech giniteru e utegi mag ng’ado bura kendo ginichwadu e sunagokegi.
18 Bende, giniteru e nyim joloch gi ruodhi nikech an, mi unuchiwnegi neno kendo ne ogendni mamoko.
19 Kata kamano, ka giterou kik ubed gi parruok kuom kaka ubiro wuoyo kata gima duwach, nimar gima onego uwach ibiro miu gie sano;
20 nikech joma wuoyo ok gin mana un, to en roho mar Wuonu ma wuoyo kokalo kuomu.
21 E wi mano, ng’ato noter owadgi mondo onege, to wuoro nolokre gi nyathine, kendo nyithindo nolokre gi jonyuolgi, kendo ginimi oneggi.
22 Kendo ji duto nosin kodu nikech nyinga, to ng’at monano nyaka giko ibiro res.
23 Ka gisandou e taon moro, ringuru udhi e taon machielo; nimar adier awachonu ni, ok unutiek lworo taonde manie Israel duto ngang’ ka pok Wuod dhano ochopo.
24 “Japuonjre ok duong’ moloyo japuonjne, kata misumba ok duong’ moloyo ruodhe.
25 Japuonjre nyalo bedo kaka japuonjne kendo misumba kaka ruodhe. Ka ji oseluongo wuon pacho ni Belzebub, donge gibiro luongo joode kamano moloyo?
26 Omiyo, kik uluorgi, nimar onge gima oum ma ok noel, kata wach moro amora ma ling’ling’ ma ok bi ng’ere.
27 Gima awachonu e mudho, wacheuru e ler, kendo gima uwinjo ka ikuodho e itu, yaluru ka un e wi tat udi.
28 Bende, kik uluor joma nego ringruok to ok ginyal ketho ngima. Kar mano, luoruru jalo ma nyalo ketho ngima kod ringruok e Gehena.*
29 Donge oyundi* ariyo ing’iewo mana gi nengo matin mar pesa ma mingli, koso? To e ma pod onge achiel kuomgi ma nyalo lwar piny ka Wuonu ok ong’eyo.
30 To un, kata mana yie wiu duto osekwan.
31 Omiyo, kik uluor; un nengou duong’ ahinya moloyo oyundi mang’eny.
32 “Kuom mano, ng’ato ang’ata ma hulo e nyim ji ni oyie kuoma, an bende nahul e nyim Wuora manie polo ni ayie kode.
33 To ng’at ma kwer e nyim ji ni ok ong’eya, an bende nakwer e nyim Wuora manie polo ni ok ang’eye.
34 Kik upar ni ne abiro kelo kuwe e piny; ne abiro kelo ligangla, to ok kuwe.
35 Nimar ne abiro kelo pogruok e kind ng’ato gi wuon-gi, e kind nyako gi min-gi, kendo e kind chi wuowi gi min chwore.
36 Kuom adier, wasik ng’ato nobed joode owuon.
37 Ng’at mohero wuon kata min moloya, ok owinjore koda; to ng’at mohero wuode kata nyare moloya, ok owinjore koda.
38 To ng’at ma ok oyie ting’o yadh-sandne kendo luwa ok owinjore koda.
39 Ng’at ma temo reso ngimane biro lale, to ng’at ma lalo ngimane nikech an, biro nwang’e.
40 “Ng’ato ang’ata ma rwakou, orwaka an bende, to ng’at ma rwakano, orwako bende Jal ma ne oora.
41 Ng’at ma rwako janabi nikech jalo en janabi enoyud pok mar janabi, to ng’at ma rwako ng’at makare nikech jalo en ng’at makare noyud pok mar ng’at makare.
42 Kendo ng’at ma miyo achiel kuom joma tindogi kata mana pi mang’ich kende mondo omodh nikech jalo en japuonjre, adier awachonu ni, ng’atno ok bi lalo pokne ngang’.”
Weche Moler Piny
^ Ne en kar wang’o yugi oko mar Jerusalem. Ne Glosari.
^ E dho Grik, winyono e matinie ahinya.
