Mathayo 18:1-35
18 E sano, jopuonjre nosudo ir Yesu mi gipenje niya: “En ng’ano ma kuom adier duong’ie moloyo e Pinyruodh polo?”
2 Omiyo, noluongo nyathi moro matin ire, mochunge e diergi
3 kendo nowacho kama: “Adier awachonu ni, ka ok ulokoru mubedo kaka nyithindo matindo, ok unudonj ngang’ e Pinyruodh polo.
4 Kuom mano, ng’ato ang’ata ma bolore kaka nyathi matinni e ng’at maduong’ moloyo e Pinyruodh polo;
5 to ng’ato ang’ata ma rwako nyathi matin kaka mae nikech nyinga, orwaka an bende.
6 To ng’ato ang’ata ma chwanyo achiel kuom joma tindo ma keto yie kuomagi, dibed maber moloyo ka otue e ng’ute kidi mar pong’, kaka mirundo gi punda, mondo onyumego e nam.
7 “Yaye nobed malit ne piny nikech gik ma kelo chwanyruok! En adier ni ochuno ni gik ma kelo chwanyruok nobi, to yaye nobed malit ne ng’at ma gima kelo chwanyruok oa kuome!
8 Omiyo, ka lweti kata tiendi miyo ichwanyori, ng’ade oko kendo iwite oa kuomi. Ber mondo idonj e ngima ka irang’ol kata ka in puth moloyo owiti e mach ma nyaka chieng’ ka in gi lweteni ariyo kata ka in gi tiendeni ni ariyo.
9 Bende, ka wang’i miyo ichwanyori, gole oko kendo iwite oa kuomi. Ber mondo idonj e ngima ka in gi wang’ achiel moloyo owiti e mach mar Gehena* ka in gi wengeni ariyo.
10 Kik ucha achiel kuom joma tindogi, nimar awachonu ni, malaike mekgi e polo neno wang’ Wuora manie polo kinde duto.
11 ——
12 “Uneno nade? Ka ng’ato nigi rombe 100 kae to achiel kuomgi orwenyo, donge obiro weyo rombe 99 mamoko e got mondo odhi omany achiel morwenyono?
13 To ka oyude, adier awachonu ni, obedo mamor kuome moloyo 99 ma ne ok orwenyogo.
14 Kamano bende, ok en gima long’o ne Wuora manie polo mondo kata mana achiel kuom joma tindogi olal.
15 “E wi mano, ka owadu otimo richo, dhi iel kethone e kindi kode kar kendu. Ka owinji, to iseyudo owadu.
16 To ka ok owinji, dhi ire gi ng’at achiel kata jomoko ariyo mondo kuom neno ma joneno ariyo kata adek chiwo, tiend wach moro amora mondo ong’ere malong’o.
17 Ka ok owinjogi, to wuo gi kanyakla. To ka ok owinjo kata mana kanyakla, we mondo owaduno obedni mana kaka ng’at moa e ogendni mamoko kendo kaka jasol osuru.
18 “Adier awachonu ni, gimoro amora mutueyo e piny nobed gima osetue e polo, kendo gimoro amora ma ugonyo e piny nobed gima osegony e polo.
19 Kendo adier anyisou ni ka ji ariyo kuomu owinjore e piny kuom gimoro amora maduong’ monego gikwa, gino biro timorenegi nikech Wuora manie polo.
20 Nimar kama ji ariyo kata adek ochokoree e nyinga, kanyo antie e diergi.”
21 Eka Petro nodhi ire mopenje niya: “Ruoth, owadwa onego otimna richo nyadidi to aweyone aweya? Nyadibiriyo, koso?”
22 Yesu nodwoke kama: “Awachoni ni, ok nyadibiriyo, to nyadi 77.
23 “Mano e momiyo Pinyruodh polo inyalo pim gi ruoth moro ma ne dwaro nono kwan pesa gi wasumbnine.
24 Ka nochako nono kwan pesago, ne okelne ng’at moro ma ne nigi gope mar talanta 10,000.*
25 To nikech jalo ne onge gi nyalo mar chulo gowino, ruodhe nochiko mondo ng’atno gi chiege gi nyithinde kod gik moko duto ma ne en-go ous eka mondo ochulgo gowino.
26 Omiyo, misumbano nopodho piny mokulorene ka omiye luor kendo wachone niya, ‘Hori ahoya koda, abiro chuli duto.’
27 Nikech mano, ruodh misumbano ne okeche mi nogonye kendo norucho gopeno.
28 Kata kamano, misumbano ka noa kanyo, noyudo achiel kuom wasumbni wetene ma ne nigi gope mar dinari 100, kendo nomake mochako deye kowachone ni, ‘Chula gopa duto.’
29 Omiyo, misumba wadgino nopodho piny mochako saye niya, ‘Hori ahoya koda, abiro chuli.’
30 Kata kamano, en ne ok odwar weyone, kendo nodhi mi omiyo owite e jela nyaka chop ochul gowi ma ne en-go.
31 Ka wasumbni wetene noneno gik ma nosetimore, ne litnegi ahinya, omiyo ne gidhi mi gihulo ne ruodhgi weche duto ma nosetimore.
32 Eka ruodhe noluonge mowachone niya: ‘In misumba marach, ne aruchoni gowi duto kane isesaya.
33 Donge in bende nonego ikech misumba wadu kaka ne akechi?’
34 Nikech mano, ruodhe nobedo gi mirima mi nochiwe e lwet jojela nyaka chop ochul gowi duto ma ne en-go.
35 Kamano e kaka Wuora manie polo bende biro timonu ka ng’ato ka ng’ato kuomu ok we ne owadgi richo koa e chunye.”
