Mathayo 20:1-34
20 “Nimar Pinyruodh polo chal gi wuon pacho ma nowuok gokinyi mang’ich mondo ondik jotich ma ditine e puothe mar mzabibu.
2 Ka nosewinjore gi jotich ni obiro chulogi dinari* achiel e odiechieng’ achiel, noorogi e puothe mar mzabibuno.
3 Bang’e, ka nowuok kar sa adek okinyi, noneno jomoko ma ne pok ondik tich kochung’ e chiro;
4 kendo nowacho ne jogo ni, ‘Un bende dhiuru e puotha mar mzabibu, to anamiu gima owinjore.’
5 Omiyo, ne gidhi. Kendo wuon pacho nowuok motimo kamano kar sa auchiel kod kar sa ochiko bende.
6 Gikone, kar sa 11 odhiambo, nowuok moyudo jomoko kochung’ kanyo, mi nopenjogi ni, ‘Ang’o momiyo usechung’ kae kuom odiechieng’ mangima ma ok ondiku tich?’
7 Ne gidwoke kama, ‘En nikech onge ng’at mosendikowa.’ Nokonegi ni, ‘Un bende dhiuru e puoth mzabibu.’
8 “Ka nochopo odhiambo, wuon puoth mzabibuno nowacho ne ng’at ma noseketo e wi jotich kama, ‘Luong jotich mondo ichulgi, kichako gi ma nende obiro achien eka itiek gi mokwongo.’
9 Ka jotich mag sa 11 nobiro, ng’ato ka ng’ato kuomgi noyudo dinari achiel.
10 Omiyo, ka joma nokwongoka nobiro, ne giparo ni gibiro yudo mang’eny, to gin bende ne ochulgi mana dinari achiel.
11 Kane osechulgi, ne gichako ng’ur ne wuon pacho
12 mi giwacho ni, ‘Joma achien-gi notiyo kuom sa achiel; to pod itimonegi ma romre kodwa wan joma osetiyo matek e odiechieng’ mangima e bwo chieng’ mager!’
13 To nodwoko achiel kuomgi ni, ‘Omera, onge gima rach ma asetimoni. Donge ne wawinjore ni dinari achiel e ma abiro chuli, koso?
14 Kaw mari mondo idhi. Adwaro miyo jal mogikni bende ma romre gi mari.
15 Donge an gi ratiro mar timo kaka adwaro gi giga awuon? Koso in gi ich-lit* nikech an ng’at maber?’
16 E yo ma kamano, joma achien nobed mokwongo, to joma okwongo nobed ma achien.”
17 Sama Yesu noidho kodhi Jerusalem, nokawo jopuonjrene 12 mi nodhi kodgi kar kendgi, kendo kane gin e ndara, nowachonegi niya:
18 “Neuru! Koro waidho nyaka Jerusalem, kendo Wuod dhano ibiro chiw e lwet jodong-jodolo gi jondiko. Gining’adne buch tho
19 kendo ginichiwe e lwet ji moa e ogendni mamoko mondo gijare, gichwade, kendo ginege e yath; to e odiechieng’ mar adek ibiro chiere.”
20 Eka min yawuot Zebedi nobiro ire ka en gi yawuote, mi nokulorene ka omiye luor mokwaye wach moro.
21 Yesu nopenje niya: “Ang’o midwaro?” Nodwoke kama: “Gol chik mondo yawuota ariyogi obed e Pinyruodhi, ng’at achiel e badi korachwich to machielo e badi koracham.”
22 Yesu nodwoko niya: “Ok ung’eyo gima ukwayo. Be unyalo madho okombe ma achiegni madhoni?” Ne giwachone kama: “Wanyalo.”
23 Nokonegi niya: “Adier ubiro madho okombena, kata kamano an ok ema ami ji thuolo mar bet e bada korachwich kata koracham, to Wuora e ma miyo joma oseikonegi.”
24 Ka jopuonjre apar mamokogo nowinjo wachno, mirima nomakogi gi owete ariyogo.
25 To Yesu noluongogi ire mowachonegi niya: “Ung’eyo ni joloch mag ogendni timore ruodhi e wigi kendo joma nigi duong’ tiyo gi teko e wigi.
26 Mano ok e kaka onego obed e kindu; to ng’at ma dwaro bedo maduong’ e kindu nyaka bed jatiju,
27 kendo ng’at ma dwaro bedo mokwongo e kindu nyaka bed misumbau.
28 Mana kaka Wuod dhano nobiro, ok ni mondo ji otine, to mondo oti ne ji kendo mondo ochiw ngimane obed rawar ne ji mang’eny.”
29 Sama ne giwuok Jeriko, oganda mang’ongo noluwe.
30 To ne! ji ariyo ma muofni ma nobet e bath ndara nowinjo ka Yesu kalo, mi ne gikok matek niya: “Ruoth, Wuod Daudi, kechwa!”
31 To oganda nokwerogi matek ni giling’; eka koro ne gimedo kok matek niya: “Ruoth, Wuod Daudi, kechwa!”
32 Omiyo, Yesu ne ochung’, moluongogi kendo nopenjogi niya: “Ang’o ma udwaro ni atimnu?”
33 Ne gidwoke kama: “Ruoth, wadwaro ni wengewa mondo oyawre.”
34 Yesu nokechogi, kendo nomulo wengegi mi gikanyono ne gichako neno, kendo ne giluwe.
