Mathayo 3:1-17
3 E ndalogo, Johana Jabatiso nobiro koyalo e thim mar Judea
2 kowacho niya: “Lokuru chunyu ua e richo nimar Pinyruodh polo osekayo machiegni.”
3 Adier, ma e jal ma janabi Isaya nowuoyo kuome niya: “Nitie dwol ma kok e thim kama: ‘Ikuru ne Jehova yo! Miuru ndechene obed moriere tir.’”
4 Koro Johana ne rwakore gi nanga mar yie ngamia kendo notueyo msip mar pien e nungone. Gik ma nochamo ne gin det-bonyo kod mor-kich manie bungu.
5 Kendo jo Jerusalem gi jo Judea duto kod ji moa e pinje duto mokiewo gi Jordan ne dhi ire,
6 mi nobatisogi e Aora Jordan kendo ne gihulo richogi ayanga.
7 Ka noneno Jo-Farisai gi Jo-Sadukai mang’eny ka biro kama ne obatisoe ji, nowachonegi niya: “Un koth thuonde, ng’ano ma osenyisou mondo uring mirima ma biro?
8 Kuom mano, nyaguru olemo ma nyiso ni useloko chunyu ua e richo.
9 Kik uwach e chunyu ni, ‘Wan gi wuonwa ma en Ibrahim.’ Nimar awachonu ni Nyasaye nyalo loso ne Ibrahim nyithindo koa kuom kitegi.
10 Oseket le e tie yien. Omiyo, yien duto ma ok nyag olemo mabeyo ibiro tong’ mi witgi e mach.
11 An to abatisou gi pi nikech useloko chunyu ua e richo, kata kamano jal ma biro bang’a nigi teko moloya, kendo ok awinjora lonyo wuochene. Jalo biro batisou gi roho maler kendo gi mach.
12 Rapiedh cham ni e lwete kendo obiro yweyo ka modinoe cham ma dong’ maler chuth, kae to obiro choko ngano mi okan-gi e dero, to mihudhi obiro wang’o gi mach ma ok nyal neg.”
13 Eka Yesu noa Galili modhi e Jordan ir Johana mondo Johana obatise.
14 To Johana notemo tame niya: “An e ma dwarore ni ibatisa to kendo in e mibiro ira?”
15 Yesu nodwoke kama: “Yie mondo mano otimre sani nimar ber mondo wachop weche duto makare e yo ma kamano.” Mi Johana noweyo tame.
16 Bang’ ka nosebatise, gikanyono Yesu noa e pi; to ne! polo noyawore kendo noneno roho mar Nyasaye ka biro kuome e kit akuru.
17 Kendo ne! Dwol moro bende noa e polo ka wacho niya: “Ma en Wuoda ma ahero kendo ma aseyiego.”
