Tich Joote 1:1-26
1 A Theofilo, e buk mokwongo ma ne andikoni, ne andiko gik moko duto ma Yesu notimo kendo ma nopuonjo a e chak tichne
2 nyaka chieng’ ma notere malo bang’ ka roho maler ne osetaye e weche ma ne ochikogo joote ma noseyiero.
3 Bang’ yudo sand nyaka e thone, nonyisore owuon ka ongima ne jogo kokalo kuom yore mang’eny ma ne siro ratiro ni ongima. Ne ginene kuom ndalo 40 ka oyalonegi wach Pinyruodh Nyasaye.
4 Sama ne en kodgi, nochikogi kama: “Kik ua Jerusalem, to sikuru ka urito gima Wuora osesingo, ka luwore gi wach ma ne uwinjo koa kuoma;
5 adier, nikech Johana ne batiso ji gi pi, un to ibiro batisu gi roho maler bang’ ndalo manok chakre sani.”
6 Omiyo, kane gisechokore, ne gipenje niya: “Ruoth, be ma e kinde ma idwaro duokoe pinyruoth ne Israel?”
7 Nodwokogi kama: “Ok en ting’ maru mondo ung’e kinde kata ndalo ma Wuora owuon e ma nie gi ratiro.
8 To ubiro yudo teko ka roho maler obiro kuomu, mi unubed jonenona e Jerusalem, kod Judea duto, gi Samaria, kendo nyaka kuonde maboyo mogik e tung’ piny.”
9 Ka nosewacho wechego, kendo kane pod ging’icho, ne oting’e malo mi bor polo ne oime, ma koro ne ok ginyal nene.
10 To sama ne ging’iyo malo e polo koidho, ji ariyo morwakore gi lewni ma rochere ne ochung’ apoya e bathgi,
11 kendo ne gipenjogi kama: “Un Jo-Galili, ang’o momiyo uchung’ ka ung’iyo polo? Yesuni ma oseidho malo koa kuomu, obiro duogo mana e yo ma chal gi kaka useneno koidho e polo.”
12 Eka ne gidok Jerusalem ka gia e got miluongo ni Got Zeituni man machiegni gi Jerusalem, en wuoth ma borne ne oyie ne ng’ato wuothoe chieng’ sabato.
13 Kane gichopo, ne giidho malo e ot manie gorofa kama ne oyudo gibworoe. Kanyo ne nitie Petro kaachiel gi Johana, gi Jakobo, gi Andrea, gi Filipo, gi Thoma, gi Bathlomeo, gi Mathayo, gi Jakobo wuod Alfayo, gi Simon jakinda, kod Judas wuod Jakobo.
14 Giduto ne gin e achiel ka gisiko e lamo kaachiel gi mon moko kod Maria min Yesu gi owete Yesu.
15 E kinde mag odiechiengego, Petro ne ochung’ e dier owete, (kwan mar ji ne gin 120 kama) mi nowacho niya:
16 “Owetena, ne dwarore mondo wach manie Ndiko ochop ma roho maler nokoro kokalo kuom Daudi e wi Judas ma notayo joma nomako Yesu.
17 Nikech ne osekwane kanyachiel kodwa, kendo en bende ne en gi kare e tijni.
18 (Kuom mano, ng’ato onogono nong’iewo puodho moro kotiyo gi chudo mar tim ma ok kare, kendo nopodho gi ka wiye mi iye nobarore kendo muoch matek, mi nyimbiyene duto ne okere oko.
19 Wachno nolandore ne ji duto ma nodak e Jerusalem, kendo mano nomiyo oluong puodhono e dhogi ni, Akeldama, tiende ni, “Puoth Remo.”)
20 Nimar ondik e bug Zaburi ni, ‘Kar dak mare mondo obed gunda, kendo kik ng’at moro amora odag e iye,’ kendo ni, ‘Ng’at machielo mondo okaw migawo mare mar tayo.’
21 Omiyo, en gima owinjore ni e kind joma ne wuotho kodwa kuom ndalo duto ma Ruoth Yesu ne timo tijene e kindwa,
22 kochakore gi kane Johana obatise nyaka chieng’ ma ne otere malo koa kuomwa, achiel kuom jogi onego obed janeno kanyachiel kodwa e wi chierne.”
23 Kuom mano, ne gichiwo nyinge ji ariyo. Achiel ne en Josef miluongo ni Barsaba ma bende ne iluongo ni Jastas, to machielo ne en Mathia.
24 Eka ne gilemo ka giwacho niya: “A Jehova, in e ma ing’eyo chuny ji duto, yangnwae ni en ng’a kuom ji ariyogi miseyiero
25 mondo okaw tijni kod migawo mar tij joote, ma Judas noweyo mi odhi yore owuon.”
26 Omiyo, ne gigoyo ombulu e wi ji ariyogo, mi ombulu ne olwar kuom Mathia, kendo ne okwane kanyachiel gi joote 11 mamokogo.
