Tich Joote 11:1-30
11 Koro joote kod owete ma ne ni Judea nowinjo ni joma oa e ogendni mamoko bende noserwako wach Nyasaye.
2 Omiyo, ka Petro nobiro nyaka Jerusalem, joma ne riwo lwedo wach tero nyangu nochako donjone niya:
3 “Wawinjo ni ne idhi od joma ok oter nyangu mi ichiemo kodgi.”
4 Eka Petro nochako leronegi wachno adimba niya:
5 “Ne an e taon mar Jopa ka alemo to fweny moro ne obirona mi ne aneno gimoro ma chal gi nanga maduong’ ka lor koa e polo, kendo ne omake gi tungene ang’wen, mi nochopo nyaka kama ne antiere.
6 Ka nanone adimba, ne aneno le mag piny ma nigi tiende ang’wen, gi le mag bungu, gi le mamol, kod winy mag polo.
7 Bende, ne awinjo dwol moro ka wachona niya: ‘Petro, a malo, yang’gi kendo icham!’
8 To ne adwoke kama: ‘Ruoth, ooyo ngang’, gimoro amora mochido kata ma ok ler pok ne odonjoga e dhoga ngang’.’
9 Dwolno ne oa e polo mar ariyo kendo ka owacho niya: ‘We luongo gik ma Nyasaye osepwodho ni gik ma ok ler.’
10 Dwolno ne owinjorena mar adek kendo, kae to gigo duto ne oywa modok e polo.
11 Gikanyono, ne aneno bende ji adek ma noor ira koa Kaisaria ka gichung’ e ot ma ne wantiereno.
12 Eka roho maler nowachona ni mondo adhi kodgi ma ok ariw gi kiawa kata matin. To owete auchielgi bende ne odhi koda mi wadonjo e od ng’atno.
13 “Ne onyisowa kaka ne oneno malaika moro kochung’ e ode ka wachone niya: ‘Or ji Jopa mondo giluong Simon ma bende iluongo ni Petro,
14 kendo obiro wachoni gik monego utim mondo oresi kanyachiel gi joodi duto.’
15 To kane achako wuoyo, roho maler nobiro kuomgi mana kaka rohono notimonwa e kar chakruok.
16 Mano nomiyo aparo wach Ruoth kaka nojawacho niya: ‘Johana ne batiso ji gi pi, to un ibiro batisu gi roho maler.’
17 Kuom mano, ka Nyasaye nochiwonegi mana mich achielno mochiwo nono, mana kaka wan bende ma waseyie kuom Ruoth Yesu Kristo ne omiyowa, an to ne anyalo bedo ng’at manade ma dageng’ Nyasaye?”
18 Kane gisewinjo wechego, ne giweyo kwedogi kendo ne gimiyo Nyasaye duong’ ka giwacho kama: “Kare ero Nyasaye osemiyo ji moa e ogendni mamoko bende thuolo mar loko chunygi gia e richo mondo giyud ngima.”
19 Koro joma noyudo osekere nikech masira ma nobiro kuom Stefano, ne odhi nyaka Foinike, gi Saipras, kod Antiokia, to ne giyalo wach mana ne Jo-Yahudi kende.
20 Kata kamano, moko kuom joma noa Saipras gi Kirene nobiro Antiokia, mi ne gichako wuoyo gi joma ne wacho dho Grik, ka gilandonegi wach maber mar Ruoth Yesu.
21 E wi mano, lwet Jehova ne ni kodgi, kendo kwan mang’ongo mar ji ne oyie mi ne gilokore ir Ruoth.
22 Wachgino nochopo e it kanyakla ma ne ni Jerusalem, omiyo ne gioro Barnaba mondo odhi nyaka Antiokia.
23 Ka nochopo moneno ng’wono mogundho mar Nyasaye kuomgi, ne omor mi nochako jiwogi giduto mondo gidhi nyime siko e Ruoth gi chuny motegno;
24 nimar Barnaba ne en ng’at maber kendo mopong’ gi roho maler kod yie. Kendo ji mogwaro ne oyie kuom Ruoth.
25 Eka nowuok modhi Tarso mondo omany Saulo adimba.
26 Bang’ nwang’e, ne okele Antiokia. Kendo kuom higa mangima ne gijochokore kanyachiel kodgi e kanyakla, to ne gipuonjo oganda mogwaro. Bende, e Antiokia kanyo e kama ne okwong luongie jopuonjre gi nying mar Jokristo, ka luwore gi dwach Nyasaye.
27 E ndalogo, jonabi moko ne olor ka gia Jerusalem nyaka Antiokia.
28 Achiel kuomgi ma nyinge Agabo ne ochung’ malo, kendo kokalo kuom roho maler, nokoro ni kech maduong’ ne chiegni biro e wi piny mangima, to kuom adier, mano notimore e ndalo Klaudio.
29 Omiyo, ka luwore gi kaka nyalo mar ng’ato ka ng’ato ne obet, jopuonjre nong’ado mar oro kony ne owete modak Judea;
30 kendo ne gitimo mano, mi ne gioro konygo ne jodongo kokalo e lwet Barnaba gi Saulo.
