Tich Joote 12:1-25
12 Gie kindego bende, ruoth Herode nochako sando moko kuom joma ne ni e kanyakla.
2 Ne onego Jakobo owadgi Johana gi ligangla.
3 Ka noneno ni timno ne omoro Jo-Yahudi, nomako Petro bende. (Mano ne otimore e ndalo sawo mar Makate Maonge Thowi.)
4 Ne omako Petro mi ne orwake e jela, kendo nokete e bwo askeche ang’wen ma ne goyo arita ang’wen ka giwilore, nimar nodwaro chiwe e lwet oganda bang’ Pasaka.
5 Omiyo, Petro nosiko e jela, kata kamano kanyakla ne lamone Nyasaye ahinya.
6 Ka Herode ne chiegni chiwe ne oganda, e otienono Petro ne nindo e kind askeche ariyo kotueye gi nyoroche ariyo; bende, e dhoot ne nitie jorit ma ne rito jela.
7 To ne! malaika mar Jehova nobiro mochung’ kanyo, kendo ler ne orieny e od jelano. Eka nopamo bath Petro mi ne ochiewe kowachone niya: “A malo mapiyo!” Eka nyorochego ne olwar koa e lwetene.
8 Malaikano nowachone niya: “Ikri kendo irwak wuocheni.” Notimo kamano. To gikone nochike kama: “Rwak nangani ma oko kae to iluw bang’a.”
9 Eka nowuok oko mi ne oluwe, to ne ok ong’eyo kabe gima ne timore kokalo kuom malaikano ne en adier. Kuom adier, noparo ni ne oneno mana fweny moro.
10 Bang’ kalo kidieny mar jorit mokwongo gi kidieny mar ariyo, ne gichopo e rangach molos gi chuma ma ji wuokgo e jela ka dhi e taondno, to rangano ne oyaworenegi ayawa kende. Kane gisewuok, ne giridore mwalo e ndara moro, eka gikanyono malaikano ne oweye.
11 To ka pach Petro noseduogo, nowacho niya: “Koro to ang’eyo gadier ni Jehova nende ooro malaikane mondo oresa e lwet Herode, kendo oseresa kuom gik moko duto ma Jo-Yahudi ne geno neno ni otimre.”
12 Ka nosefwenyo mano, nodhi e od Maria min Johana ma bende ne iluongo ni Mariko, kama ji mogwaro noyudo ochokoree kanyachiel kendo ne gilemo.
13 Ka nodwong’o rangach, jatich moro ma nyako ma nyinge Roda nobiro yawone.
14 Ka nofwenyo dwond Petro, ne oil gi ilo maduong’ mi ne ok oyawo rangach, to ne oringo modok iye kendo notero ne ji wach ni Petro ne ni e rangach.
15 To jogo nowachone niya: “In neko osemaki.” Kata kamano, noramo ni onyisogi adier. Eka ne gichako wacho kama: “Kare mano malaikane.”
16 To Petro ne odong’ kanyo ka pod odwong’o. Bang’ yawo rangach, ne ginene mi gihum nono.
17 En to noting’onegi lwete mondo giling’ thi, eka noganonegi adimba kaka Jehova ne ogole e jela, kendo nokonegi niya: “Teruru wachni ne Jakobo kod owete.” Bang’ mano ne oa kanyo mi nodhi kama chielo.
18 Koro kane piny oru, ne nitie chochni mang’eny e kind askeche ka giwuoro gima ne otimore ne Petro.
19 Herode ne omanye gi kinda ahinya, to ka ok ne onwang’e, nonono wachne kuom jorit, kae to nochiko ni otergi e kum; eka ne olor oa Judea mi nodhi nyaka Kaisaria motieko ndalo moko mogwaro kuno.
20 Koro Herode ne dwaro ahinya kedo gi Jo-Tiro kod Jo-Sidon. Omiyo, jogo nobiro ire ka gin e achiel kendo bang’ semo Blasto, jal ma ne ochung’ ne weche mag od ruoth, ne gikwayo mondo kuwe obedie, nimar pinygi ne yudo chiemo koa e piny ruodhno.
21 E odiechieng’ moro moyang, Herode ne orwakore gi nangane mar ruoth mi nobet piny e kom-bura, kae to nochako golo twak e nyim ji duto.
22 Eka joma ne ochokorego nochako kok niya: “Mani en dwond nyasaye, to ok mar dhano!”
23 To malaika mar Jehova ne ogoye gikanyono, nimar ne ok omiyo Nyasaye duong’, kendo kute ne ochame motho.
24 Eka wach Jehova nomedo dongo kendo landore.
25 To bang’ ka Barnaba gi Saulo nosetieko chuth tij chiwo kony ne owete e Jerusalem, ne giduogo ka gin kanyachiel gi Johana, ma bende ne iluongo ni Mariko.
