Tich Joote 14:1-28
14 Koro e Ikonio ne gidonjo kanyachiel e sunagogi mar Jo-Yahudi gi Jo-Grik, kendo ne giyalo e yo molony ahinya mi mano nomiyo oganda mang’ongo moriwo Jo-Yahudi gi Jo-Grik orwako yie.
2 To Jo-Yahudi ma ne ok oyie ne othuwo wach, kendo ne gimiyo chuny joma oa e ogendni mamoko osin gi owete.
3 Omiyo, ne gitiyo gi kinde mogwaro ka giyalo gi chir kokalo kuom teko mar Jehova, ma nochiwo neno e wi wach ng’wonone mogundho kokalo kuom ranyisi kod tije madongo ma ne gitimo.
4 Kata kamano, oganda mang’ongo manie taondno ne opogore; moko kuomgi ne riwo Jo-Yahudi lwedo to moko ne odok ne joote.
5 Kane joma oa e ogendni gi Jo-Yahudi kod jotendgi notemo monjogi mondo gitimnegi timbe achaya kendo chielogi gi kite,
6 ne onyisgi wachno mi ne giringo gidhi e taonde mag Likonia, gi Listra, gi Darbe, kod gwenge mag alworago.
7 Ne gimedo lando wach maber kuondego.
8 Koro e Listra, ne nitie ng’at moro ma nobet piny ma tiendene ne ong’ol. Nosebedo puth nyaka a e nyuolne kendo ne pok owuotho ngang’.
9 Ng’atno ne winjo Paulo ka wuoyo. Ka Paulo ne ong’iye tir moneno ni ne en gi yie ni nonyalo chango,
10 Paulo nokok gi dwol maduong’ niya: “A malo ichung’ gi tiendeni.” Mi ng’atno ne ochikore malo mochako wuotho.
11 Ka oganda noneno gima Paulo noa timono, ne gikok e dho Likonia kama: “Ero nyiseche oselokore mobedo kaka dhano kendo giselor irwa!”
12 Mi ne gichako luongo Barnaba ni Zeu, to Paulo ni Hames, nimar en e ma ne otayo e twak.
13 To jadolo mar Zeu ma hekalune ne ni e dho ranga taon mar Listra nokelo ruedhi kod osimbo mag maua e dho rangeye mondo ochiw misengni kanyachiel gi oganda.
14 Kata kamano, ka joote ma gin Barnaba gi Paulo nowinjo mano, ne giyiecho lepgi kendo ne gidonjo mapiyo ei ogandano ka gikok niya:
15 “Yaye, ang’o momiyo utimo gigi? Wan bende wan mana dhano ma nigi nyawo kaka un. To sani walandonu wach maber mondo ua kuom gik manonogi, kendo ulokru mondo uyie kuom Nyasaye ma nochueyo polo, gi piny, gi nam, kod gik moko duto manie igi.
16 Kuom tienge mosekalo, noweyo ogendni duto mondo giluw yoregi giwegi,
17 kendo kata obedo ni ne ok oweyo ma ok omiyou gik ma chiwo neno kuome, notimo maber kuom miyou koth koa e polo kod kinde mag nyak mogundho, ka oyieng’ou gi chiemo kendo ka opong’o chunyu gi mor.”
18 To e ma pod kata bang’ wacho wechegi, ne ok ginyal geng’o oganda mondo kik chiwnegi misango.
19 To Jo-Yahudi nochopo ka gia Antiokia kod Ikonio mi ne gisemo oganda, kae to ogandano ne ochielo Paulo gi kite kendo ne giywaye mi gitere oko mar Listra, ka gigalo ni nosetho.
20 Kata kamano, ka jopuonjre ne ochung’ kolwore, ne oa malo mi nodonjo e taondno. Kinyne nowuok gi Barnaba mondo gidhi Darbe.
21 Bang’ yalo wach maber e taondno kendo loko ji mogwaro obedo jopuonjre, ne gidok Listra, gi Ikonio, kod Antiokia.
22 Ka gin kuonde ma ne gidhiyego, ne gitego chuny jopuonjre kendo ne gijiwogi mondo gisik e yie ka giwachonegi niya: “Nyaka wakal e sand mang’eny eka wadonj e Pinyruodh Nyasaye.”
23 E wi mano, ne giketonegi jodongo e kanyakla ka kanyakla, kendo bang’ lamo kod tueyo chiemo, ne gichiwogi e lwet Jehova ma ne giseyie kuome.
24 Eka ne gidhi ka gikalo ei Pisidia mi gichopo Pamfilia,
25 kendo bang’ yalo wach Nyasaye e Paga, ne gilor mi gidhi Atalia.
26 Ne gia kanyo mi giidho yie mondo gidhi Antiokia kama ne osenyisgie ng’wono mogundho mar Nyasaye mondo gitim migawo ma koro ne gisetiekono.
27 Kane gisechopo mi gichoko jo kanyakla kanyachiel, ne giganonegi gik mang’eny ma Nyasaye nosetimo kokalo kuomgi, kendo kaka Nyasaye noseyawo dhoot ne ogendni mamoko mondo girwak yie.
28 Omiyo, ne gibet kuno kuom kinde mogwaro gi jopuonjre.
