Tich Joote 15:1-41
15 Koro jomoko ne olor koa Judea mi gichako puonjo owete niya: “Ka ok oteru nyangu ka luwore gi chik Musa, to ok unyal yudo warruok.”
2 To ka jogo nosebedo gi mbaka matek mi giyware ahinya gi Paulo kod Barnaba kuom wachno, ne ochan mondo Paulo gi Barnaba kod jomamoko kuomgi odhi ir joote gi jodongo man Jerusalem mondo olos wachno.
3 Omiyo, bang’ ka kanyakla nosekowogi matin, jogi ne odhi nyime gi wuodhgi ka gikadho e piny Foinike gi Samaria, ka gihulo adimba kaka joma oa e ogendni mamoko ne olokore mi giyie kuom Nyasaye, kendo mano nomiyo owete duto obedo gi mor mogundho.
4 Kane gichopo Jerusalem, kanyakla, gi joote, kod jodongo, norwakogi maber ahinya, kendo Paulo gi Barnaba ne oganonegi gik mang’eny ma Nyasaye nosetimo kokalo kuomgi.
5 To moko kuom joma noserwako yie, ma chon ne ni e kidieny mar dind Jo-Farisai, ne oa malo e kombegi kendo ne giwacho niya: “Owinjore tergi nyangu kendo ochikgi mondo girit Chik Musa.”
6 Kuom mano, joote kaachiel gi jodongo nochokore kanyachiel mondo ginon wachno.
7 Kane gisewuoyo matut e wi wachno, Petro ne oa malo mowachonegi niya: “Owetena, ung’eyo maber ni chakre chon, Nyasaye ne oyiera e kindu mondo ji moa e ogendni mamoko owinj wach maber kendo girwak yie kokalo kuoma.
8 Kendo Nyasaye mong’eyo chuny dhano, nonyiso ni oyie kodgi kuom miyogi roho maler mana kaka wan bende nomiyowa.
9 Bende, Nyasaye ne ok onyiso ni nitie pogruok kata matin e kindwa kodgi, to ne opwodho chunygi nikech yiegi.
10 Kare ang’o momiyo utemo Nyasaye ka uketo kuom jopuonjre ting’ mapek ma kwerewa ne ok nyal ting’o, to kata wan bende ok wanyal?
11 Mopogore gi mano, wan gi yie ni iresowa kokalo kuom ng’wono mogundho mar Ruoth Yesu, mana kaka gin bende itimonegi.”
12 Eka jogo duto ne oling’ thi mi ne gichako winjo Barnaba gi Paulo ka ganonegi kaka Nyasaye nosetimo ne ogendni mamoko ranyisi mang’eny kod tije madongo kokalo kuomgi.
13 Kane gisetieko wuoyo, Jakobo nowacho kama: “Owetena, winjauru.
14 Simion oseluwo adimba kaka Nyasaye koro noparo joma oa e ogendni mamoko mondo okaw kuomgi joma iluongo gi nyinge.
15 Kendo weche Jonabi oyie gi mano, mana kaka ondik niya:
16 ‘Bang’ wechegi, anaduog kendo mondo achung hema mar Daudi ma nosepodho; anager kendo kuonde momukore kuome, mi anaduoke kaka ne en chon,
17 eka mondo joma odong’ omany Jehova gi kinda kaachiel gi joma oa e ogendni duto ma gin joma iluongo gi nyinga, Jehova ma timo gigi osewacho,
18 ma gin gik ma ne oseng’ere chakre chon.’
19 Kuom mano, gima an ang’ado en ni mondo kik chand joma oa e ogendni mamoko ma sani lokore mondo giyie kuom Nyasaye,
20 to mondo ondiknegi giwere gi gik ma sanamu osedwanyo, gi terruok,* gi gik mode, kod remo.
21 Nyaka a chon, ji osegabedo ka yalo weche ma Musa nondiko e taon ka taon, nikech isomo wechego e sunagoke sabato ka sabato.”
22 Eka jootego gi jodongo kaachiel gi kanyakla duto nong’ado mondo gior jomoko moyier e kindgi, mondo jogo odhi Antiokia ka gin gi Paulo kod Barnaba; ne gioro Judas ma ne iluongo ni Barsaba, kod Sila, ma ne gin joma tayo e kind owete.
23 Ne gindiko wechegi mi giorogigo:
“Wan oweteu ma joote gi jodongo, wandikonu un owetewa man Antiokia gi Siria kod Kilikia, un ma ua e ogendni mamoko: Wamosou!
24 Nikech wasewinjo ni jomoko noa kuomwa mi ne gichandou gi weche ma gisewacho ka gitemo lokougo, kata obedo ni ne ok wachikogi ni gitim kamano,
25 wasechopo e paro achiel ni waornu jomoko ma wayiero kanyachiel gi Barnaba gi Paulo, ma gin owetewa ma wahero,
26 gin joma osechiwo ngimagi ahinya nikech nying Ruodhwa Yesu Kristo.
27 Kuom mano, waoronu Judas gi Sila mondo gin bende gihul mana wechego gi dhogi.
28 Nimar wan kanyachiel gi roho maler, waseneno ni onge tiende mondo wamednu ting’ mapek, mak mana gik ma dwaroregi:
29 ni uweru gi gik motimgo misango ne sanamu, gi remo, gi gik mode, kod terruok. Ka uritoru chuth kuom gigo, weche biro dhinu maber. Oritiuru!”
30 Omiyo, ka noseorgi mondo gidhi, ne gilor nyaka Antiokia, kae to ne gichoko jopuonjre duto mi gimiyogi baruano.
31 Bang’ some, ne gimor ahinya gi jip ma ne giyudono.
32 Kendo Judas gi Sila ma bende ne gin jonabi nojiwo owete mi gitegogi kuom golonegi twege mang’eny.
33 Bang’ bet kuno kuom ndalo moko, owetego noweyogi mondo gidog gi kuwe ir joma ne oorogi.
34 ——
35 To Paulo gi Barnaba nodong’ Antiokia, kaachiel gi jomamoko mang’eny, ka gipuonjo kendo ka gilando wach maber mar Jehova.
36 Bang’ ndalo moko, Paulo nowacho ne Barnaba kama: “Chutho chutho, koro wadoguru mondo walim owete e taonde duto ma ne wayaloe wach Jehova mondo wane ane ni to gidhi nade.”
37 Barnaba noramo ni gidhi kanyachiel gi Johana ma bende ne iluongo ni Mariko.
38 Paulo to ne ok dwar ni Mariko odhi kodgi, nikech Mariko nosewuok moweyogi Pamfilia kendo ne ok odhi kodgi e tijgi.
39 Mano nomiyo mirima mager omuoch e kindgi, mi ne gidhi yorgi ng’ato ka ng’ato; omiyo, Barnaba nokawo Mariko mi gidhi kode gi yie ka gichomo Saipras.
40 Paulo to noyiero dhi gi Sila mi ne gidhi kode ka owete noseketo Paulo e lwet Jehova kod ng’wonone mogundho.
41 Ne okalo ei Siria gi Kilikia ka otego kanyakla man kuondego.
Weche Moler Piny
^ Wach molok kae ni “terruok,” e dho Grik en porneia, ma tiende en kit nindruok duto ma ok kare.
