Tich Joote 16:1-40
16 Koro nochopo Darbe kod Listra bende. To kanyo ne nitie japuonjre moro ma nyinge Timotheo, wuod nya Jo-Yahudi moro ma ne ni e yie, to wuon mare ne en Ja-Grik,
2 kendo owete man Listra gi Ikonio ne wuoyo maber kuome.
3 Paulo ne dwaro ni Timotheo odhi kode, omiyo ne okawe motere nyangu nikech Jo-Yahudi ma ne ni kuondego, nimar giduto ne ging’eyo ni wuon Timotheo ne en Ja-Grik.
4 Kane giwuotho ka gikalo e taonde, ne ginyiso joma ne ni kuondego weche ma joote kod jodongo ma ne ni Jerusalem nosechiko ni gimak.
5 To kuom adier, kanyakla man kuondego nomedo gurore e yie kendo kwan-gi ne medore pile ka pile.
6 Bende, ne giwuotho ka gikalo Frugia kod piny Galatia, nikech roho maler nokwerogi ni kik giyal wach Nyasaye e alwora mar Asia.
7 To kaka ne gimedo lor ka gidhi Misia, ne gitemo ahinya mondo gidonj e Bithinia, to roho mar Yesu ne ok oyienegi.
8 Omiyo, ne gikalo Misia mi gilor mwalo nyaka Troa.
9 To gotieno, fweny moro nobiro ne Paulo—mi noneno Ja-Makedonia moro kochung’ kanyo kendo ka saye niya: “Bi ane Makedonia koni mondo ikonywa.”
10 Mapiyo bang’ fweny ma ne osenenono, ne watemo dhi Makedonia ka wang’ado ni kuno e ma Nyasaye noseluongowa mondo wadhi wayalnegie wach maber.
11 Omiyo, ne waidho yie kowuok Troa mi wadhi moriere nyaka e Samothras, to kinyne ne wadhi Neapoli.
12 Bang’ wuok kanyo, ne wadhi Filipi manie bwo loch Rumi, kendo en e taon maduong’ e alwora mar Makedonia. Ne wabet Filipi kuom ndalo moko.
13 Chieng’ Sabato, ne wawuok oko mar rangach nyaka e bath aora moro kama ne waparo ni ne nitie kar lamo, mi ne wabet piny kendo ne wachako wuoyo gi mon ma ne ochokore kanyo.
14 Eka dhako moro ma nyinge Lidia ma a e taon mar Thiatira ma ne uso lewni ma rangigi rajamna, kendo ma ne lamo Nyasaye, ne winjowa, kendo Jehova noyawo chunye ahinya mondo ochik ite malong’o ne gik ma Paulo ne wacho.
15 Koro ka nosebatis Lidia kod joode, nokwayowa kama: “Ka ukwana ni an ng’at moluoro Jehova, to biuru mondo ubed e oda.” Kendo nosayowa ahinya mi ne wadhi.
16 Koro kane wadhi kar lemo, jatich moro ma nyako ma ne nigi jachien ma ne miyo okoro wach, noromo kodwa. Joma nyakono ne tiyonegi ne yudoga ohala mang’eny nikech tichne mar koro wach.
17 Nyakono ne siko ka luwowa gi Paulo kendo nokok kowacho kama: “Jogi ma sani yalonu wach warruokni, gin wasumbni mag Nyasaye Mamalo Chutho.”
18 Ne osiko kotimo kamano kuom ndalo mang’eny. Gikone, Paulo ne ool gi wachno mi nolokore mowacho ne jachiendno niya: “Achiki e nying Yesu Kristo ni wuog ia kuome.” Mi jachiendno nowuok gie sano.
19 Kuom mano, ka joma nyakono ne tiyonegi noneno ni koro genogi mar yudo ohala ne oselal, ne gimako Paulo gi Sila kendo ne giywayogi nyaka e chiro ir jotelo.
20 Bang’ terogi nyaka ir jotelo mag taon mar Filipi, ne giwacho kama: “Jogi chando taondwani ahinya. Gin Jo-Yahudi,
21 kendo giyalo timbe ma ok owinjore watim ka luwore gi kitwa, nimar wan Jo-Rumi.”
22 Eka ogandano ne oa malo kanyachiel ka gin gi mirima mager kodgi, kendo bang’ ka jotelogo noseyiecho lepgi, ne gichiko mondo ochwadgi gi del.
23 Kane gisechwadogi del mang’eny, ne giwitogi e jela kendo ne gichiko jarit jela mondo oritgi kik giring.
24 Nikech ne ochike kamano, nowitogi e od jela ma iye mi notueyo tiendegi e lodi mag yien.*
25 To e dier otieno, Paulo gi Sila ne lemo ka gipako Nyasaye gi wer, kendo mabuse ne winjogi.
26 Apoya nono yiengni maduong’ mar piny ne otimore, kendo mise mag jelano ne oyiengni. E wi mano, dhoudi duto ne oyawore gikanyono, kendo rateke mag ng’ato ka ng’ato ne ogonyore.
27 To ka jarit ne ochiew moneno ni dhoudi mag jela oyawore, nowuodho liganglane kendo ne ochiegni negore koparo ni mabuse oseringo.
28 To Paulo nokok gi dwol maduong’ niya: “Kik ihinyri nimar waduto wan kae!”
29 Omiyo, nokwayo teyni mi nodonjo ei od jela mapiyo, kendo luoro ne omake ahinya mi nopodho piny e tiend Paulo gi Sila.
30 Nogologi oko mopenjogi niya: “Ruodhina, en ang’o ma nyaka atim mondo oresa?”
31 Ne gidwoke kama: “Yie kuom Ruoth Yesu to ibiro resi, in kaachiel gi joodi.”
32 Eka ne giyalone wach Jehova kanyachiel gi jogo duto manie ode.
33 Kendo nokawogi e sa nogo gotienono mi ne olwokonegi kuonde mohinyore. Kae to en kaachiel gi joode duto ne obatisgi gikanyono.
34 Norwakogi ei ode moikonegi chiemo e mesa, kendo nobedo gi mor maduong’ kod joode duto nikech koro ne giseyie kuom Nyasaye.
35 Ka piny noseru, jotelogo nooro askeche mondo giwach niya: “Gonyuru jogo.”
36 Jarit jelano nonyiso Paulo wechegigo kama: “Jotelo oseoro jomoko kae gi wach ni mondo ogonyu karu ji ariyo. Omiyo, koro wuoguru kendo udhi gi kuwe.”
37 To Paulo nodwoko kama: “Nyoro gichwadowa e lela ka pok giyalowa mi oyud ketho kuomwa, kae to giwitowa e jela to wan Jo-Rumi. Sani koro gidwaro golowa oko ling’ling’? Ooyo ngang’! Gibi mondo gin giwegi gikowwa oko.”
38 Askechego notero wechego ne jotelo. Jotelogo nobedo maluor bang’ fwenyo ni jogo ne gin Jo-Rumi.
39 Omiyo, ne gibiro mi gisayogi, kae to bang’ kowogi oko, ne gikwayogi mondo giwuog gia e taondno.
40 Eka ne giwuok e jela mi gidhi nyaka e od Lidia; kendo bang’ neno owete, ne gijiwogi kae to ne giwuok mi gidhi.
Weche Moler Piny
^ Ne Glosari.
