Tich Joote 17:1-34
17 Eka ne giwuotho ka gikalo ei Amfipoli gi Apolonia mi gichopo Thesalonika, kama sunagogi mar Jo-Yahudi ne nitieree.
2 To ka luwore gi kaka tim Paulo nobet, nodonjo ei sunagogi kama ne gintie, kendo kuom sabato adek, ne otwak kodgi kuom weche manie Ndiko
3 kolero kendo siro puonjgo kotiyo gi weche mosendik ma nyiso ni ne nyaka sand Kristo kendo chiere oa kuom joma otho, kowachonegi niya: “Ma e Kristo, Yesu ma sani ayalonu wachne.”
4 Mano nomiyo moko kuomgi orwako yie mi giriwore gi Paulo kod Sila, kendo oganda mang’ongo moriwo Jo-Grik ma ne lamo Nyasaye kod mon mogwaro ma ne nigi huma, bende notimo kamano.
5 Kata kamano, nyiego nomako Jo-Yahudi kendo ne gichoko jomoko maricho ma ne bayo abaya e chirni, mi oganda ma achachno nochokore kendo ne gikelo koko e taondno. Mi ne gimonjo od Jason ka gidwaro golo Paulo gi Sila oko ir ogandano.
6 To kane ok ginwang’ogi, ne giywayo Jason gi owete moko mi giterogi ir jotend taondno, ka gikok niya: “Joma oseloko piny mangimagi sani koro ni kae bende,
7 kendo Jason oserwakogi maber e ode. Jogi duto kwedo weche ma Kaisar chiko, ka giwacho ni nitie ruoth machielo, ma en Yesu.”
8 Kane giwinjo wechego, ogandano kod jotend taondno ne obwok;
9 to bang’ kawo pesa mar singo ma ne dwarore kuom Jason gi jomamokogo, ne giweyogi mondo gidhi.
10 Mapiyo ka nochopo otieno, owete nochiko Paulo gi Sila mondo gidhi Beroa. Bang’ chopo, ne gidonjo e sunagogi mar Jo-Yahudi.
11 Koro Jo-Yahudi ma ne ni Beroa ne nigi chuny maber moloyo mago ma ne ni Thesalonika nimar ne girwako wach Nyasaye ka gin gi paro moikore moloyo, ka ginono Ndiko adimba pile ka pile mondo gine kabe wechego ne ni kamano adier.
12 Kuom mano, thothgi ne oyie, kendo mon moko mogwaro ma Jo-Grik ma ne nigi huma, kaachiel gi chwo moko noyie.
13 To ka Jo-Yahudi ma ne oa Thesalonika nofwenyo ni Paulo ne yalo wach Nyasaye e Beroa bende, ne gibiro kanyo mondo giketh chuny oganda obed gi mirima.
14 Eka gikanyono owete nochiko Paulo mondo odhi nyaka e nam, to Sila kod Timotheo ne odong’ chien kanyo.
15 Kata kamano, joma ne ni kod Paulo ne otere nyaka Athene, kendo ne gidok bang’ ka Paulo nosechikogi ni Sila kod Timotheo odhi ire mapiyo kaka nyalore.
16 Koro sama Paulo ne ritogi Athene, chunye nochandore bang’ neno ka taondno opong’ gi nyiseche mag sanamu.
17 Omiyo, nochako twak matut e sunagogi gi Jo-Yahudi kod jomamoko ma ne lamo Nyasaye. Bende, nojatimo kamano pile ka pile gi joma ne yudore e chirni.
18 To moko kuom jolup Epikuro kod jolup Stoiko ma ne puonjo riekni mag dhano nochako mino kode wach. Moko ne wacho kama: “En ang’o ma jawach thoreni dwaro wacho?” To jomamoko ne wacho niya: “Ochal ka jayal wach nyiseche ma welo.” Ne giwuoyo kamano nimar ne oyalo wach maber mar Yesu kod mar chier.
19 Omiyo, ne gikawe mi gitaye nyaka e Areopago mi giwachone niya: “Be wanyalo ng’eyo tiend puonj manyienni?
20 Nikech ikelonwa puonj moko ma itwa pok nowinjo, dwaher ng’eyo tiendgi.”
21 Adier, Jo-Athene kod welo ma nodak kanyo ne ohero tiyo gi thuologi mag yueyo mana e goyo mbaka kata e winjo weche manyien.
22 Eka Paulo ne ochung’ e dier Areopago mowacho kama:
“Jo-Athene, aneno ni e gik moko duto, nenore ni umiyo nyiseche luor ahinya moloyo kaka jomamoko timo.
23 Kuom ranyisi, sama nende akalo kendo nono mos gik mulamo, ne anwang’o bende kendo moro mar misango mondik ni, ‘Mar Nyasaye Maok Ong’e.’ Omiyo, ng’at ma ulamo ma ok ung’eyono, e ma sani ayalonu wachne.
24 Ruodh polo gi piny, ma en Nyasaye ma nochueyo piny kod gik moko duto manie iye, ok dag ei hekalu molos gi lwet dhano;
25 en ok konye gi lwet dhano ka gima ochando gimoro, nikech en owuon omiyo ji duto ngima, gi muya, kod gik moko duto.
26 Kendo noloso ogendni duto koa kuom ng’ato achiel, mondo gidag e wang’ piny mangima, mi noketo chon ndalo kod tong’ e wi kuonde ma dhano ne dhi dakie,
27 mondo gidwar Nyasaye ka gimanye koni gi koni mi adier giyude, kata obedo ni kuom adier ok obor gi ng’ato ka ng’ato kuomwa.
28 Nikech kokalo kuome wangima, wawuotho, kendo wantiere, mana kaka moko kuom jou ma jondik-wende osewacho niya, ‘Nikech wan bende wan nyithinde.’
29 “Kuom mano, nikech wan nyithind Nyasaye, ok onego wapar ni Nyasaye chal gi dhahabu, kata fedha, kata kite, kendo ni ochal gi gima opa gi riekni mag dhano.
30 Adier, Nyasaye ok osedewo ndalo kaka mago ma ji ne ok ong’eye; to sani koro olando ne ji duto kamoro amora ni onego gilok chunygi gia e richo.
31 Nikech oseyango odiechieng’ mobiro ng’adoe bura makare ne piny kotiyo gi jal moro moseketo, kendo kuom chiero jalo a kuom joma otho, osechiwo ne ji duto gima nyiso ni mano biro timore.”
32 Koro kane giwinjo wach chiero joma otho, jomoko nochako jaro wachno, to moko nowacho niya: “Wabiro winji ane kendo kuom wachni.”
33 Omiyo, Paulo noweyogi,
34 to jomoko noriwore kode mi girwako yie. Moko kuomgi ne gin Dionisio ma ne en jang’ad-bura e od ng’ado bura ma Areopago, gi dhako moro ma nyinge Damaris, kod jomamoko bende.
