Tich Joote 18:1-28
18 Bang’ mano, Paulo nowuok Athene mi ne odhi Korintho.
2 Kanyo noyudoe Ja-Yahudi moro ma nyinge Akwila, ma en jal ma ne onyuol Ponto, to ne oyudo eka oa biro koa Italia ka en gi Prisila chiege, nimar Klaudio nosegolo chik ni mondo Jo-Yahudi duto owuog Rumi. Omiyo, Paulo nolimogi,
3 to nikech tijgi ne chalre, nodak e dalagi kendo notiyo kodgi nimar ne gin jotwang’ hema.
4 E sabato ka sabato, ne ojagolo twak e sunagogi kotiyo gi lony e loko pach Jo-Yahudi gi Jo-Grik mondo girwak yie.
5 Koro ka Sila gi Timotheo noselor ka gia Makedonia, Paulo nochako bedo modich ahinya gi yalo wach Nyasaye, kochiwo neno ne Jo-Yahudi kendo kosiro gadier ni Yesu e Kristo.
6 To kane gisiko gikwede kendo wuoyone ka ginyise achaya, noteng’o lepe mowachonegi kama: “Rembu mondo obed e wiu uwegi. An to aler. Chakre sani ka dhi nyime, abiro dhi ir joma oa e ogendni mamoko.”
7 Omiyo, ne oa kanyo modhi e od ng’at moro ma nyinge Titio Jastas, ma ne en ng’at moluoro Nyasaye, ma ode ne omakore gi sunagogi.
8 To Krispo ma ne en jatelo ma tayo e sunagogi ne oyie kuom Ruoth kaachiel gi joode duto. Eka thoth Jo-Korintho ma nowinjo wach nochako rwako yie mi ne obatisgi.
9 E wi mano, gotieno Ruoth nowacho ne Paulo e fweny niya: “Kik iluor, to dhi mana nyime gi yalo kendo kik iling’,
10 nimar an kodi kendo onge ng’at ma biro monji mondo ohinyi; nikech an gi ji mang’eny e taondni.”
11 Omiyo, nobedo kanyo kuom higa gi dweche auchiel kopuonjo wach Nyasaye e diergi.
12 E kinde ma Galio ne en jatelo mar Akaya, Jo-Yahudi noriwore e monjo Paulo kendo ne gitere e kom-bura
13 ka giwacho niya: “Ng’atni semo ji mondo gilam Nyasaye e yo mopogore gi chik.”
14 To sama Paulo ne chiegni chako wuoyo, Galio nowacho ne Jo-Yahudi kama: “Yaye, un Jo-Yahudi, ka da bed ni adier ng’atni otimo gimoro ma ok kare, kata oketho gi ketho moro maduong’, dikoro asehora mos mondo awinju.
15 To ka en nikech uywaru e wi weche, kod nying ji, kendo e wi chiku uwegi, un uwegi e ma nyaka ung’ad wachno. Ok daher bet jang’ad-bura e wi wechego.”
16 Eka noriembogi gia e nyim kom-bura.
17 Omiyo, ne gimako Sosthene ma ne en jatelo ma tayo e sunagogi mi gichako goye e nyim kom-bura. To Galio ne ok odonjre gi gik ma ne gitimogo kata matin.
18 Kata kamano, bang’ bedo kuno kuom ndalo moko momedore, Paulo nogoyo oriti ne owete mi noidho yie kochomo Siria, ka en gi Prisila kod Akwila. Noselielo yie wiye mobedo machieko ka en Kenkrea, nikech noyudo osetimo singruok.
19 Eka ne gichopo Efeso mi noweyogi kuno; to en nodonjo ei sunagogi kendo nochako twak gi Jo-Yahudi.
20 Kata obedo ni ne gikwaye ni odong’ kodgi kuom kinde momedore, ne ok oyie,
21 kar mano, ne ogoyonegi oriti kowachonegi niya: “Abiro duogo iru kendo ka Jehova oyie.” Mi noidho yie koa Efeso
22 molor nyaka Kaisaria. Eka noidho malo Jerusalem kendo nomoso kanyakla, kae to ne olor nyaka Antiokia.
23 Ka nosetieko ndalo moko kanyo, nowuok modhi koni gi koni kokalo e piny Galatia kod Frigia, kotego jopuonjre duto.
24 Koro Ja-Yahudi moro ma nyinge Apolo ma ne onyuol Aleksandria nochopo Efeso; ne en ng’at mong’eyo twak e yo mong’ith kendo ne olony ahinya gi weche manie Ndiko.
25 Ng’atni ne osepuonj yor Jehova, kendo nikech ne en gi ilo kokalo kuom roho mar Nyasaye, ne oyalo kendo ne opuonjo weche motudore gi Yesu e yo makare, en mana ni ne olony gi batiso mar Johana kende.
26 Nochako yalo gi chir e sunagogi, to ka Prisila gi Akwila ne owinje, ne gikawe mi gilerone yor Nyasaye e yo malong’o moloyo.
27 Bende, nikech nodwaro dhi nyaka loka Akaya, owete nondiko ne jopuonjre ma kuno ka gikwayogi mondo girwake e yo maber. Omiyo, ka nochopo kuno, nokonyo ahinya joma noserwako yie kokalo kuom ng’wono mogundho mar Nyasaye;
28 nimar ne onyiso e lela kendo e yo malong’o ka en gi ilo maduong’, ni Jo-Yahudi ne ok ni kare, kotiyo gi Ndiko e nyiso ni Yesu e Kristo.
