Tich Joote 20:1-38
20 Ka kokono nosedok chien, Paulo noluongo jopuonjre ire, kendo bang’ jiwogi, ne ogoyonegi oriti kae to nochako wuodhe mar dhi Makedonia.
2 Bang’ wuotho e alworago kendo tiyo gi weche mang’eny kojiwogo joma ne ni kuondego, nochopo Grik.
3 Ne obet kuno kuom dweche adek, to nikech Jo-Yahudi ne chano mar nege kane ochiegni idho meli mondo odhi Siria, nong’ado mar dok chien koluwo Makedonia.
4 Joma ne ni kode ne gin: Sopata wuod Piro moa Beroa, gi Aristako kod Sekunda ma gin Jo-Thesalonika, gi Gayo ma a Darbe, gi Timotheo, gi Tikiko kod Trofimo ma ne gin joma oa e alwora mar Asia.
5 Jogo notelonwa kendo noyudo giritowa e Troa;
6 to wan ne waidho meli ka wawuok Filipi bang’ kinde sawo mar Makate Maonge Thowi, mi ne wachopo irgi e Troa bang’ ndalo abich, kendo ne wabedo kuno kuom ndalo abiriyo.
7 E odiechieng’ mokwongo mar juma kane oyudo wachokore mondo wachiem, Paulo nochako golonegi twak nimar ne odhi wuok kanyo kinyne; kendo twageno ne oyware ahinya nyaka e dier otieno.
8 To ne nitie teyni mang’eny e ot ma malo kama noyudo wachokoree kanyachiel.
9 Eka rawera moro ma nyinge Yutiko ma nobet e dho dirisa ne nindo otero matut sama Paulo ne golo twak, to nikech nindo ne ohewe, ne olwar piny koa e gorofa mar adek mi ne giyude kosetho.
10 To Paulo ne olor piny mi nokulore kuome, kendo ne okwake kowacho niya: “Weuru kelo koko, nikech ongima.”
11 Eka Paulo ne odok malo, kendo bang’ ng’ingo makate nochako chiemo. Kae to nomedo yalo kuom kinde nyaka piny ne oru, eka bang’ mano, ne owuok mi odhi.
12 Kuom mano, ne gigolo wuowino kanyo ka ongima kendo mano ne ohoyo chunygi ahinya.
13 Koro ne watelo e meli mi wachomo Asos ma e kama Paulo nochikowa ni mondo waromie kode, nimar en nochano dhi kuno kowuotho gi tiende.
14 Omiyo, ka noyudowa Asos, noriwore kodwa e meli mi wadhi Mitilene.
15 Eka e odiechieng’ ma noluwo, ne wawuok kanyo gi meli mi wachopo kama omanyore gi loka Kios, to kinyne ne wagowo e Samos, kae to ne wadhi mi wachopo Mileto e odiechieng’ ma noluwo.
16 Paulo nong’ado mar dhi gi meli ma ok odonjo Efeso mondo kik obed e alwora mar Asia kata mana kuom kinde matin, nikech notimo piyo mondo ka nyalore to chieng’ Sawo mar Pentekost oyude Jerusalem.
17 Kata kamano, kane en Mileto nooro wach Efeso mondo oluongne jodong-kanyakla.
18 Kane gisechopo ire, nowachonegi kama: “Ung’eyo maber kaka timna ne obet kane an e kindu, chakre e odiechieng’ mokwongo ma ne adonjo e alwora mar Asia,
19 kaka ne atiyo ne Ruoth gi chuny mobolore ahinya kendo gi pi wang’, kendo ung’eyo masiche ma ne oyuda nikech gik maricho ma Jo-Yahudi ne chano,
20 kod kaka ne ok aweyo yalonu weche duto ma ne nyalo konyou, bende ne ok aweyo puonjou e lela kendo e ot ka ot.
21 To nachiwo neno e okang’ malong’o chuth ne Jo-Yahudi kod Jo-Grik, e wi wach loko chuny a e richo mondo giduog ir Nyasaye kendo giket yie kuom Ruodhwa Yesu.
22 Koro neuru! roho maler chika ni mondo adhi Jerusalem, kata obedo ni ok ang’eyo gik ma dhi timorena kuno,
23 mak mana ni e dala ka dala ma adhiye, roho maler siko ka siema ni tuech kod masiche orita.
24 Kata kamano, ok akwan ngimana ka gimoro maduong’ ahinya, to adwaro mana ni atiek ng’weya kod tich ma Ruoth Yesu ne omiya, ni mondo achiw neno e okang’ malong’o chuth e wi wach maber mar ng’wono mogundho mar Nyasaye.
25 “To koro neuru! Ang’eyo ni onge ng’ato kuomu, un joma ne ayalonu wach Pinyruoth, ma biro neno wang’a kendo ngang’.
26 Omiyo, aseluongou odiechiengni mondo une ni aler kuom remb ji duto,
27 nikech pok aweyo ma ok ahulonu uduto dwaro mar Nyasaye.
28 Nonreuru ahinya uwegi kod kueth duto bende ma roho maler oseketoue kaka jorit, mondo ubed jokwadh kanyakla mar Nyasaye ma nong’iewo gi remb Wuode owuon.
29 Ang’eyo ni bang’ ka aseweyou to ondiegi mager biro donjo e dieru, kendo ok gibi timo ne kueth e yo mang’won,
30 bende, nitie joma biro wuok e kindu uwegi ka giwacho weche ma gwenyo adiera mondo giywago jopuonjre bang’gi giwegi.
31 “Kuom mano, beduru ka utang’, kendo paruru kaka kuom higni adek, odiechieng’ gi otieno, ne ok aweyo siemou ng’ato ka ng’ato ka pi wang’a chuer.
32 To koro aweyou e lwet Nyasaye kendo e bwo wach mar ng’wonone mogundho, ma en wach ma nyalo gerou kendo miyo uyud pok ma Nyasaye miyo joma ler duto moseyier.
33 Pok ne agombo fedha mar ng’ato, kata dhahabu, kata lep ng’ato.
34 Un uwegi ung’eyo ni asebedo ka atiyo gi lwetenagi e yudo gik ma ne achando kod mag joma ne ni koda.
35 Asenyisou e weche duto ni kuom tiyo matek kamano, nyaka ukony joma yomyom, kendo nyaka usik ka uparo weche Ruoth Yesu owuon ma nowacho kama: ‘Chiwo kelo mor mogundho moloyo kawo.’”
36 Ka nosewacho wechego, nogoyo chonge piny kodgi giduto, mi nolemo.
37 Kuom adier, giduto ne gimuoch gi ywak ahinya, mi ne gikwako Paulo kendo nyodhe gi mor,
38 nimar gima ne litnegi moloyo en wach ma nowachonegi ni ok ne gidhi nene kendo ngang’. Kae to ne gikowe nyaka e meli.
