Tich Joote 22:1-30
22 “Owetena gi wuonega, winjauru mondo alernu ma kora e wi wachni.”
2 To kane giwinjo kowuoyo kodgi gi dho Hibrania, ne gimedo ling’ thi, kae to nowacho niya:
3 “An Ja-Yahudi monyuol e taon mar Tarso man Kilikia, to Jerusalem kae e ma ne asomee e tiend Gamaliel, kendo ne otiega mondo amakra chuth gi Chik kwerewa, kendo an gi kinda e tij Nyasaye mana kaka un uduto bende kawuononi.
4 Ne asando jo Yorni* nyaka e tho, ka atueyo mon gi chwo kendo ne achiwogi mondo otuegi e jela,
5 mana kaka jadolo maduong’ kod bura duto mar jodongo nyalo chiwoe neno. Kuomgi bende e ma ne ayudoe barupe ma ne adhigo ir owete ma Damaski, kendo ne an e yo ka adhi mondo akel joma ne ni kuno ka atueyogi nyaka Jerusalem mondo okumgi.
6 “To sama ne awuotho ka achiegni chopo Damaski, e kar odiechieng’ tir, apoya nono ler maduong’ moa e polo ne orieny molwora,
7 mi ne apodho piny kendo ne awinjo dwol moro ka wachona niya: ‘Saulo, Saulo, isanda nang’o?’
8 Ne apenje kama: ‘In ng’a, Ruoth?’ To ne odwoka niya: ‘An Yesu Ja-Nazareth, ma isando.’
9 Eka joma ne ni koda noneno lerno to ne ok giwinjo dwond jal ma ne wuoyo koda.
10 Mi ne apenje kama: ‘Ruoth, en ang’o monego atim?’ Ruoth nodwoka niya: ‘A malo mondo idonj Damaski, kendo kuno ibiro nyisie weche duto moseketni mondo itim.’
11 To nikech ler maduong’no ne omiyo ne ok anyal neno gimoro, joma ne ni koda e ma ne omako lweta ka gitayago nyaka ne achopo Damaski.
12 “Eka ng’at ma nyinge Anania, ma noluoro Nyasaye kaka Chik ne dwaro kendo ma Jo-Yahudi duto modak kuno ne wuoyo kuome maber,
13 nobiro ira. Ne ochung’ e batha mowachona kama: ‘Saulo owadwa, wengeni mondo ochak onen kendo!’ To gikanyono, ne arango malo mi ne anene.
14 Nowachona niya: ‘Nyasach kwerewa oseyieri mondo ing’e dwache, mondo ine jal makareno, kendo mondo iwinj dwol moa e dhoge,
15 nimar onego ibed janeno mare ne ji duto e wi gik miseneno kendo misewinjo.
16 To koro ang’o momiyo pod ideko? A malo mondo obatisi, kae to ilwok richoni kuom luongo nyinge.’
17 “To ka nasedok Jerusalem kendo ka noyudo alemo ei hekalu, fweny moro nobirona
18 kendo ne anene kowachona niya: ‘Ret ia Jerusalem mapiyo, nikech ok gibi yie gi neno mibiro chiwo kuoma.’
19 Eka nawacho niya: ‘Ruoth, gin giwegi ging’eyo maber kaka ne ajawuotho ka adhi e sunagogi ka sunagogi mondo atue joma oyie kuomi e jela kendo goyogi;
20 kendo sama ne ichuero remb Stefano ma en janenoni, an bende ne achung’ bathe kanyo ka ayie gi nekne, bende ne arito lewni ma oko mag joma ne nege.’
21 To e ma nowachonae kama: ‘Wuog mondo idhi nimar abiro ori ir ogendni man kuonde maboyo.’”
22 Ne giwinje nyaka nowacho wachno. Kae to ne giting’o dwondgi malo ka giwacho niya: “Goluru ng’at ma kamae oa e piny, nimar ok owinjore bedo mangima!”
23 Nikech ne gikok ka giwito lepgi ma oko koni gi koni kendo ne gikiro buru e kor yamo,
24 jatend-jolweny* nochiko mondo orwak Paulo kama askeche ne odakie, kendo nowacho ni onone kichwade mondo eka ong’e chutho gimomiyo ji ne kok ne Paulo kamano.
25 To kane gisetueye mondo gichwade, Paulo nopenjo jal ma ne ochung’ kanyo ma jatend-askeche* kama: “Be en gima owinjore gi chik ni uchwad ng’at ma en Ja-Rumi kendo ma pok oyal mi oyud gi ketho?”
26 Omiyo, ka jatend-askecheno* nowinjo mano, notero wach ne jatend-jolwenyno* niya: “Ang’o ma ibiro timo? Nikech jali en Ja-Rumi.”
27 Kuom mano, jatend-jolwenyno* nodhi ir Paulo mi nopenje kama: “Nyisa ane, be en adier ni in Ja-Rumi?” Nodwoke ni: “Ee.”
28 Jatend-jolwenyno* nowachone kama: “An ne atiyo gi pesa mang’eny ahinya e ng’iewo ratiro mar bedo Ja-Rumi.” Paulo to nowachone kama: “An to an gi ratirogo nikech ne onyuola Ja-Rumi.”
29 Eka gikanyono, joma ne dwaro none ka sande ne oweye; kendo luoro nomako jatend-jolwenyno* bang’ fwenyo ni Paulo ne en Ja-Rumi kendo ni nosemiyo otueye gi nyoroche.
30 Koro kinyne, nikech jatend-jolwenyno* ne dwaro ng’eyo chuth gimomiyo Jo-Yahudi ne odonjone, nogonyo nyoroche kuome, mi nochiko ni jodong-jodolo kod buch Sanhedrin duto orom. Eka ne oloro Paulo mwalo mi ne ochunge e diergi.
Weche Moler Piny
^ Tiende ni, kit ngima mar Jokristo kod puonj ma giluwo.
^ Jatelo achiel ne bedo gi askeche lweny 1,000 e bwoye.
^ Jatelo ma askeche lweny 100 mag Rumi ni e bwoye.
^ Jatelo ma askeche lweny 100 mag Rumi ni e bwoye.
^ Jatelo achiel ne bedo gi askeche lweny 1,000 e bwoye.
^ Jatelo achiel ne bedo gi askeche lweny 1,000 e bwoye.
^ Jatelo achiel ne bedo gi askeche lweny 1,000 e bwoye.
^ Jatelo achiel ne bedo gi askeche lweny 1,000 e bwoye.
^ Jatelo achiel ne bedo gi askeche lweny 1,000 e bwoye.
