Tich Joote 26:1-32
26 Agripa nowacho ne Paulo niya: “Oyieni mondo iwuo e loyi iwuon.” Eka Paulo norieyo bade mochako chiwo dwoko e wi weche ma ne odonjnego kama:
2 “Ruoth Agripa, amor ndi nikech an e nyimi kawuononi mondo achiw dwoko e wi weche duto ma Jo-Yahudi odonjonago,
3 to moloyo, nikech in ng’at molony ahinya e tim kod weche duto ma keloga ywaruok e kind Jo-Yahudi. Omiyo, asayi ni iwinja mos.
4 “Kuom adier, kit ngima ma asedakie chakre kane an rawera nyaka abedo ng’at maduong’ e kind ogandawa kendo e Jerusalem, en gima Jo-Yahudi duto ong’eyo malong’o,
5 ne ging’eya chon kaka Ja-Farisai ma nomakore chuth gi chike mag kidieny mar kit lamowa, kendo en wach ma ginyalo chiwoe neno ka gidwaro.
6 To sani iyala e bura nikech geno mar gima Nyasaye nosingo ne kwerewa;
7 mano e singo ma dhoudi 12 mag ogandawa rito neno ka chopo ka gitiyo ne Nyasaye gi kinda ahinya odiechieng’ gotieno. A Ruoth, genono e momiyo Jo-Yahudi osedonjona.
8 “Ang’o momiyo un ok uyie ni Nyasaye chiero joma otho?
9 An awuon ne an gadier ni ne onego atim gik mang’eny mondo akwedgo nying Yesu Ja-Nazareth.
10 To adier, mago e gik ma ne atimo e Jerusalem, kendo ng’eny joma ler ne atueyo e jela, nimar jodong-jodolo nosemiya teko mar timo kamano; to kane ji dwaro nego joma lergo, ne ayie e yor goyo ombulu.
11 Kendo sama ne asandogi nyading’eny e sunagoke duto, ne atemo chunogi mondo gikwed yiegi; to nikech ne ager kodgi ahinya, nachako sandogi e taonde mamoko bende.
12 “Sama ne atimo gigi ka an e wuoth adhi Damaski bang’ yudo teko kod chik moa kuom jodong-jodolo,
13 A Ruoth, e dier odiechieng’ tir kane an e ndara, ler moro moa e polo ne olwora gi joma ne an-go e wuoth, to ler ma ne rienyno nohingo mar wang’-chieng’.
14 Kendo ka waduto ne wasepodho piny, ne awinjo dwol moro ka wachona gi dho Hibrania kama: ‘Saulo, Saulo, isanda nang’o? Isiko ka igweyo riwi,* to timo kamano medo mana hinyi.’
15 Eka ne apenje kama: ‘In ng’a, Ruoth?’ To Ruoth nodwoka niya: ‘An Yesu, ma isando.
16 Kata kamano, a malo mondo ichung’ gi tiendi. Gimomiyo asefwenyorani en ni mondo ayieri ibed jatichna kendo ichiw neno kuom weche ma iseneno kod mago ma abiro nyisi.
17 Kendo anaresi kuom ogandani kod kuom ogendni mamoko ma aori irgi
18 mondo iyaw wengegi, igolgi e mudho kiterogi e ler, kendo igolgi e teko mar Satan kikelogi ir Nyasaye, mondo owenegi richogi kendo giyud pok kanyachiel gi joma osepwodh mobedo maler nikech yie ma gin-go kuoma.’
19 “Kuom mano, Ruoth Agripa, ne ok atamora winjo fweny ma nowuok e polono,
20 to ne adhi mondo ayal wach, kendo ne akwongo gi joma ne ni Damaski, kae to ne joma ne ni Jerusalem gi piny Judea mangima kod ogendni mamoko bende, ka anyisogi ni onego gilok chunygi gia e richo kendo gidog ir Nyasaye kuom timo gik ma nyiso ni giloko chunygi gia e richo.
21 Mano e momiyo Jo-Yahudi ne omaka e hekalu mi gitemo nega.
22 Kata kamano, nikech aseyudo kony moa kuom Nyasaye, amedo dhi nyime chiwo neno ne joma tindo kod joma dongo nyaka kawuononi. Bende, ok ayalnegi wach machielo mak mana weche ma Jonabi kod Musa nokoro ni ne dhi timore—
23 ni Kristo ne nyaka sand, kendo nikech en e ma ne okwong chiere a kuom joma otho, ne odhi kelo ler ne ogandawani kod ogendni mamoko.”
24 Koro sama Paulo pod ne wuoyo kokwero weche ma ne odonjnego, Festo nowacho gi dwol maduong’ kama: “Paulo, wiyi osebiro marach! Somo misesomo mang’eny miyo wiyi biro marach!”
25 To Paulo nodwoke kama: “Yaye Festo, in moluor moloyo, wiya ok rach, to weche ma awacho gin adier kendo ginyiso paro malong’o.
26 Kuom adier, ruoth ma koro awuoyogo sani ka an thuoloni, ong’eyo maber wechegi; nikech an gadier chuth ni onge kata achiel kuom wechegi ma okia, nimar onge moro amora ma ne otim kama opondo.
27 In Ruoth Agripa, be iyie kuom weche Jonabi? Ang’eyo ni iyie kuomgi.”
28 To Agripa nowacho ne Paulo kama: “Kuom kinde machuokni, mit diloka mi abed Jakristo.”
29 Eka Paulo nowachone niya: “Kata bed ni en kuom kinde machuok kata malach, gima daher kwayo Nyasaye en ni, in kod ji duto ma winja kae kawuono ubed kaka an, to ok gi nyorochegi.”
30 Eka ruoth Agripa noa malo mi gavana Festo gi Banis bende notimo kamano kanyachiel gi joma ne obet kodgi.
31 To sama ne giwuok, ne gichako wuoyo e kindgi kama: “Onge gima ng’atni osetimo mowinjore gi tho kata tuech e jela.”
32 Eka Agripa nowacho ne Festo niya: “Dikoro ne osegony ng’atni ka da bed ni ne ok okwayo ni oyale e nyim Kaisar.”
Weche Moler Piny
^ Tiende ni, luth ma dhoge bith ma ne itiyogo e tayo le kata chikogi.
