Tich Joote 5:1-42
5 Kata kamano, ng’at moro ma nyinge Anania kod Safira chiege ne ouso puothgi moro.
2 To ne odong’ gi bath yuto moko ling’ling’, to chiege bende nong’eyo mano, mi nokelo mana bathe kendo noketo e tiend joote.
3 To Petro nopenje kama: “Anania, ang’o momiyo iseweyo Satan omiyi chir mondo iriamb ne roho maler, kidong’ ling’ling’ gi bath yuto mar nengo puothi?
4 Donge ne en mari ka pok iuse? To bang’ use, donge pod ne en mari? Ang’o momiyo iseparo tim ma kama ei chunyi? Iseriambo ne Nyasaye, to ok ne dhano.”
5 Bang’ winjo wechego, Anania ne opodho mi ne otho. Kendo luoro maduong’ nomako ji duto ma nowinjo mano.
6 Eka chwo ma rowere noa malo mi ne giboye gi lewni, kae to ne giting’e mi gitere oko kendo yike.
7 Koro bang’ seche adek kama, chiege nobiro kanyo to ok nong’eyo gima ne osetimore.
8 Petro nopenje kama: “Wachna ane, be in gi chwori ne uuso puodho e nengo ma kama?” Nodwoko niya: “Ee, ne wause e nengono.”
9 Eka Petro nowachone kama: “Ang’o momiyo uduto ji ariyo ne uwinjoru mondo utem roho mar Jehova? Ne! Tiende joma oa yiko chwori ni e dhoot, kendo in bende gibiro ting’i mi giteri oko.”
10 Gikanyono, nopodho e tiend Petro mi ne otho. Ka chwo ma rowerego nochopo, ne giyudo kosetho kae to ne giting’e mi gitere oko, kendo ne giyike e bath chwore.
11 Omiyo, luoro mang’ongo nokwako kanyakla mangima kod ji duto ma nowinjo wach gik ma ne otimorego.
12 E wi mano, ranyisi kod tije madongo mang’eny nomedo timore e kind oganda kokalo kuom lwet joote; kendo giduto ne gijoromo kanyachiel e agola* miluongo ni Agoch Solomon.
13 Adier, onge ng’ato kuom jomamokogo ma ne nigi chir mar riwore gi jopuonjre; kata kamano, ji ne pwoyogi ahinya.
14 E wi mano, joma ne keto yie kuom Ruoth ne siko ka medore, kwan-gi ne ng’eny ahinya moriwo chwo kod mon.
15 Ne gikelo kata mana joma tuo e nderni madongo, ka giting’ogi e otendni matindo kod pere, mondo ka Petro ne kalo kanyo, miti tipone ne nyalo lwar kuomgi.
16 Bende, oganda ma nowuok e taonde molworo Jerusalem ne siko ka biro, ka giting’o joma tuo, kod joma jochiende ne chando, kendo ne ochanggi giduto.
17 Eka jadolo maduong’ kod ji duto ma ne ni kode ma ne ni e kidieny mar dind Jo-Sadukai noa malo, kendo ne gipong’ gi nyiego.
18 Omiyo, ne gimako joote, kendo ne giketogi e od tuech.
19 To e seche mag otieno, malaika mar Jehova noyawo dhood jela, mi nogologi oko mowachonegi niya:
20 “Wuoguru mondo udhi e hekalu, kendo udhi nyime lero ne ji weche duto e wi ngima ma biro.”
21 Bang’ winjo mano, sama piny ne oru ne gidonjo e hekalu mi gichako puonjo.
Ka jadolo maduong’ kod joma ne ni kode nochopo, ne giluongo buch Sanhedrin kod chokruok duto mar jodongo mag nyithind Jo-Israel, mi ne gioro wach e jela mondo okel joote e nyimgi.
22 To ka askeche nochopo e jela, ne ok giyudogi. Omiyo, ne giduogo mi gikelo wach
23 niya: “A wayudo jela ka olor kendo orinde maber, kendo ka jorit ochung’ e dhoot, to bang’ yawe mi wadonjo, ne ok wayudo ng’ato e iye.”
24 Koro ka jatend-jorit mar hekalu kod jodong-jodolo nowinjo wechego, dhogi nomoko ma ok ging’eyo gima ne dhi timore bang’ mano.
25 To ng’at moro nobiro mowachonegi kama: “Neuru! Joma ne uketo e jelaka ni e hekalu. Gichung’ kuno kendo gipuonjo ji.”
26 Eka jatend-jorit nowuok kanyachiel gi askechene mi ne gidhi, kendo ne gikelogi, to ne ok gitiyo gi thwon, nimar ne giluor ni oganda ne nyalo chielogi gi kite.
27 Omiyo, ne gikelo joote mi gichungogi e nyim Sanhedrin. Eka jadolo maduong’ ne ononogi,
28 mowachonegi niya: “Ne wakwerou matek ni kik udhi nyime puonjo kutiyo gi nyingno, to e ma pod neuru! usepong’o Jerusalem gi puonju kendo uramo mar keto remb ng’atni e wiwa.”
29 Petro kod joote mamokogo nodwoko kama: “Nyasaye e ma nyaka wawinj nikech en e jalochwa, kar winjo dhano.
30 Nyasach kwerewa nochiero Yesu ma ne unego ma ung’awo e yath.
31 Kane Nyasaye okete e bade korachwich, ne oting’e malo mondo obed Jatelo Maduong’ moseket, kendo mondo obed Jawar, eka omi Jo-Israel olok chunygi gia e richo kendo weyonegi richogi.
32 Kendo wan joneno mag wechego, kaachiel gi roho maler ma Nyasaye osechiwo ne joma winje kaka jaloch.”
33 Kane giwinjo mano, mirima mager nomakogi, kendo ne gidwaro nego jootego.
34 To Ja-Farisai moro miluongo ni Gamaliel, ne ochung’ e buch Sanhedrin; ne en ng’at ma puonjo Chik ma ji duto ne omiyo luor, kendo nochiko mondo ogol jogo oko matin.
35 Kae to nowachonegi kama: “Un Jo-Israel, tang’uru gi gima uchano timo ne jogi.
36 Kuom ranyisi, ka ndalowagi ne pok ochopo, Theuda nosieko kowacho ni en owuon ne en gimoro, kendo chwo ma dirom 400 noriwore kode. To ne onege kendo jogo duto ma ne luwe ne oke mi kargi ne olal nono.
37 Bang’ Theuda, Judas ma Ja-Galili bende nosieko e kinde mag kwano ji kane indiko nyingegi, kendo noywayo ji moluwo bang’e. En bende ne otho, kendo jogo duto ma ne luwe ne oke.
38 Omiyo, ka luwore gi gima timore sani, awachonu ni kik udonjru gi jogi, to wereuru kodgi. Nikech ka chenroni kata tijni oa kuom dhano, ibiro loye;
39 to ka oa kuom Nyasaye, ok ubi loyogi. Ka ok kamano, dipo ka ubedo mana joma kedo gi Nyasaye owuon.”
40 Nikech mano, ne girwako paro ma ne ochiwonegi, eka ne giluongo joote mi gichwadogi, kendo ne gichikogi mondo giwe wuoyo ka gitiyo gi nying Yesu, kae to ne gigonyogi mi gidhi.
41 Omiyo, ne giwuok e nyim buch Sanhedrin ka gimor nikech ne osekwan-gi kaka joma ichayo nikech nying Yesu.
42 To pile ka pile e hekalu kendo e ot ka ot, ne gidhi nyime puonjo kendo lando wach maber e wi Kristo Yesu ma ok giwe.
Weche Moler Piny
^ Magi gin kuonde miluwo ma nigi sirni molworogi kod tado e wigi.
