Tich Joote 6:1-15
6 Koro e ndalogo, ka kwan jopuonjre ne medore, Jo-Yahudi ma ne wacho dho Grik nochako ng’ur gi Jo-Yahudi ma ne wacho dho Hibrania nimar mond lietegi ne ijwang’o e wach chiemo ma ne ipogo pile ka pile.
2 Omiyo, ji Apar Gariyoka noluongo oganda mar jopuonjre kanyachiel mi giwachonegi kama: “Ok en gima kare ni wawe wach Nyasaye mondo wapog chiemo e mesni.
3 Kuom mano, owete, manyuru uwegi chwo abiriyo e kindu ma nigi nying maber, mopong’ gi roho maler kod rieko, mondo waketgi e migawo ma dwaroreni;
4 to wan wabiro chiwore chuth ne lamo kod tij puonjo wach.”
5 Gima ne giwachono ne omoro oganda duto, mi ne giyiero Stefano, ng’at ma nopong’ gi yie kod roho maler. Bende, ne giyiero Filipo, gi Prokoro, gi Nikanor, gi Timon, gi Pamena, kod Nikolao moa Antiokia, jal ma ok ne en Ja-Yahudi to nodonjo e din mar Jo-Yahudi.
6 Ne gikelogi ir joote, kendo bang’ lamo, jootego noketo lwetgi kuomgi.
7 Nikech mano, wach Nyasaye nomedo landore, kendo kwan mar jopuonjre ne siko ka medore ahinya e Jerusalem; bende, oganda mang’ongo mar jodolo nochako rwako yie.
8 Koro Stefano ne opong’ gi ng’wono mar Nyasaye kod teko, kendo notimo tije madongo kod ranyisi e kind ji.
9 To jomoko mowuok e kidieny ma nong’ere kaka Sunagogi mar Joma Ogony nobiro kaachiel gi Jo-Kirene, gi Jo-Aleksandria moko, gi joma oa Kilikia kod Asia, mondo gimin wach gi Stefano.
10 To nikech rieko kod roho maler ne taye kowuoyo, jogo ne ok nyal loye gi wach.
11 Eka ne gisemo jomoko ling’ling’ mondo jogo owach niya: “Wasewinjo ka otiyo gi weche ma nyiso ni ochayo Musa gi Nyasaye.”
12 Kendo ne gimiyo oganda, gi jodongo, kod jondiko obedo gi mirima kode, mi jogo ne opoye kendo ne gimake gi thwon mi gitere e buch Sanhedrin.
13 Kae to ne gikelo joneno mag miriambo ma nowacho kama: “Ng’atni otamore weyo wacho weche maricho e wi kama lerni kendo e wi Chik.
14 Kuom ranyisi, wasewinjo kowacho ni Yesu ma Ja-Nazarethni biro goyo kama lerni piny, mi olok timbe kod chike ma Musa nomiyowa.”
15 Eka ji duto ma nobet e buch Sanhedrin nochomo wengegi kuome, mi ne gineno ka lela wang’e chal gi mar malaika.
