Tich Joote 7:1-60
7 To jadolo maduong’ nopenje kama: “Be wechegi gin adier?”
2 Stefano nodwoko niya: “Owetena gi wuonega, winjuru. Nyasach duong’ nofwenyore ne kwarwa Ibrahim kane en Mesopotamia, e kinde ma pok nodhi dak Haran,
3 mi nochike ni, ‘Wuog ia e pinyu kendo ia kuom wedeni mondo idhi e piny ma abiro nyisi.’
4 Eka nowuok e piny Jo-Kaldea mi nodhi dak e Haran. To bang’ tho wuon-gi, Nyasaye nomiyo oa kanyo mi nobiro dak e piny ma koro udakie sanini.
5 To e ma ne ok omiye pok moro amora kuno, kata mana lowo ma ne nyalo rome ketoe tiende; to ne osingo ni ne odhi miye pinyno obed mare kendo bang’e ne kothe, kata obedo ni gie kindeno ne pod oonge nyathi.
6 E wi mano, Nyasaye nowachone ni kothe ne dhi bedo jodak ma welo e piny ma ok margi, kendo ni ji ne dhi timogi wasumbni kisandogi kuom higni 400.
7 Nyasaye nowacho kama, ‘To anang’ad bura ne oganda ma ginibednegi wasumbni, kendo bang’ mano giniwuog e pinyno mondo gilama kar kae.’
8 “Bende, notimo kode singruok mar nyangu, mi nonyuolo Isaka motero Isaka nyangu e odiechieng’ mar aboro, kendo Isaka nonyuolo Jakobo, to Jakobo nonyuolo jodong dhoudi 12.
9 To jodong dhoudigo nobedo gi nyiego gi Josef mi ne giuse Misri. Kata kamano, Nyasaye ne ni kode,
10 kendo ne orese kogole e masiche duto mi nomiyo obedo ng’at mariek kendo ma Farao ruodh Misri ne oyiego. Eka Farao nokete mondo obed gi loch e wi Misri kod od Farao duto.
11 To kech moro nosieko e Misri duto kod Kanaan, ee, ne en masira maduong’, kendo kwerewa machon ne ok nyal yudo chiemo.
12 Kata kamano, Jakobo nowinjo ni piny Misri ne nigi chiemo, mi nooro kwerewa machon e wuodhgi mokwongo.
13 Ka noorogi mar ariyo, Josef nofwenyore ne owetene, kendo Farao nong’eyo joodgi Josef.
14 Omiyo, Josef nooro wach mondo oluong Jakobo wuon mare kod wedene duto ma ne ni kuno, kendo kwan-gi giduto ne gin ji 75.
15 Eka Jakobo ne olor kodhi Misri mi bang’e ne otho kuno, kendo kwerewa machon bende ne otho.
16 Ne oter ringregi Shekem, kendo ne opielgi e liel kama Ibrahim nong’iewo gi pes fedha kuom yawuot Hamor e Shekem.
17 “Ka kinde nokayo mondo singruok ma Nyasaye nolando ne Ibrahim ochop, ji nosemedore mi ginya e Misri,
18 nyaka nochopo kinde ma ruoth mopogore e ma nokawo loch e Misri, ruoth ma ne ok ong’eyo Josef.
19 Ruodhno notiyo gi wuond mariek kuom ogandawa, kendo notimo e yo ma ok kare ka nochuno wuone mondo ojwang’ nyithindgi mayom, ni eka kik gitony mi gibed mangima.
20 Mano e kinde ma ne onyuolie Musa, kendo ne ojaber ahinya kata mana e wang’ Nyasaye. Mi ne opidhe kuom dweche adek e od wuon mare.
21 To ka nojwang’e, nyar Farao nokawe mopidhe kaka wuode owuon.
22 Omiyo, Musa noyudo tiegruok e wi rieko duto mag Jo-Misri. To adier, wechene kod gik ma notimo ne nigi teko ahinya.
23 “Koro, ka nobedo jahigni 40, nong’ado e chunye mondo odhi olim owetene ma ne gin nyithind Israel.
24 Ka noneno ka itimo ne achiel kuomgi e yo ma ok kare, ne okonye kuom nego Ja-Misri, mi nochulo kuor e lo nyawadgi ma ne itimone marachno.
25 Noparo ni owetene ne dhi fwenyo ni Nyasaye ne tiyo kode e miyogi warruok, to ne ok gifwenyo mano.
26 Kinyne ka noyudogi ka gidhawo, notemo thegogi mondo gibed gi kuwe, kowacho niya: ‘Yawa, un owete. Ang’o momiyo uhinyoru uwegi?’
27 To ng’at ma ne timo ne nyawadgi e yo ma ok kareno nodhiro Musa chien mopenje kama: ‘En ng’a moketi jatelo kendo jang’ad-bura e wiwa?
28 An bende idwaro nega kaka nyoro inego Ja-Misricha, koso?’
29 Ka Musa nowinjo mano, noringo mi nobedo jadak ma wendo e piny Midian, kama ne onyuoloe yawuowi ariyo.
30 “Bang’ ka higni 40 nosekalo, malaika moro nofwenyorene e thim mar Got Sinai e mach ma ne liel e bungu mar kuthe.
31 Ka Musa noneno mano, ne owuoro. To sama nosudo mondo onon, nowinjo dwond Jehova ka wachone kama:
32 ‘An e Nyasach kwereu, Nyasach Ibrahim, gi Isaka, kod Jakobo.’ Musa nochako tetni kendo ne ok omedo nono bunguno.
33 Jehova nowachone niya: ‘Lony wuoche e tiendi, nimar ka michung’ieno en kama ler.
34 Adier, aseneno sand ma joga manie Misri yudo, kendo asewinjo ywakgi, omiyo aselor mondo aresgi. Koro bi mondo aori Misri.’
35 Musa achielni, ma ne gisekwer ni ok ging’eyo ka gipenje niya: ‘En ng’a moketi jatelo kendo jang’ad-bura?’ en e jalno ma Nyasaye nooro mondo obed jatelo kendo jares kokalo kuom malaika ma nofwenyorene e bungu mar kuthe.
36 Ng’atni ne ogologi kotayogi bang’ timo tije madongo gi ranyisi e Misri, gi Nam Makwar, kod thim, kuom higni 40.
37 “Jali e Musa ma nowacho ne nyithind Israel niya: ‘Nyasaye biro ketonu janabi ma chal koda koa kuom oweteu.’
38 Musano e ma ne nigi oganda e thim kod malaika ma nowuoyo kode e Got Sinai kanyachiel gi kwerewa, kendo ne oyudo weche mangima mag Nyasaye mondo omiu.
39 Kwerewa notamore winje, to ne gikwede, kendo gie chunygi ne gidok Misri,
40 mi giwacho ne Arun kama: ‘Losnwa nyiseche mamoko mondo otel e nyimwa. Nikech ok wang’eyo gima osetimore ne Musa ma notayowa ka wawuok e piny Misri.’
41 Omiyo, gie kindeno ne giloso nyaroya mi gitero misango ne sanamuno kendo ne gichako bedo gi nyasi mar mor nikech tich mar lwetgino.
42 Kuom mano, Nyasaye ne oa kuomgi moweyogi mondo gilam wang’-chieng’, gi dwe, kod sulwe mag polo, mana kaka ondik e bug Jonabi niya: ‘Un od Israel, an ok e ma ne ukelona chiwo kod misengni kuom higni 40 ma ne un-go e thim, donge en kamano, koso?
43 To hema mar Molok kod sulwe mar nyasaye ma Refan e ma ne ujoting’o, mago e sanamu ma ne uloso mondo ulam. Omiyo, abiro darou mi ukal Babilon.’
44 “E thim, kwerewa ne nigi hema ma ne nyiso ni Nyasaye ne ni kodgi, mana kaka nochiko Musa mondo olose ka luwore gi kido ma noseneno.
45 Kendo ne omi kwerewa machon hemano, mi ne gibiro kode kanyachiel gi Joshua nyaka e piny ogendni ma Nyasaye noriembo mondo oa e nyim kwerewa. Hemano nosiko kanyo nyaka e ndalo Daudi.
46 Nyasaye ne mor gi Daudi, kendo nokwayo mondo omiye thuolo makende mar gero kar dak ne Nyasach Jakobo.
47 To Solomon e ma nogerone ot.
48 Kata kamano, Ng’at Mamalo Chutho ok dag e ute molos gi lwedo, mana kaka janabi nokoro niya:
49 ‘Jehova owacho ni, polo e kom-lochna, to piny en raten tienda. En ot machal nade ma ubiro gerona? Kata kar yueyona dibed kanye?
50 Donge an e ma lweta noloso gik moko duto, koso?’
51 “Un joma wigi tek kendo ma ok oter nyangu e chunygi kod itgi, kinde duto usebedo kukwedo roho maler; utimo mana kaka kwereu bende notimo.
52 Be nitie janabi moro amora ma kwereu ne ok osando? Adier, ne ginego joma nolando motelo wach biro mar jal makare, kendo un usebedo jondhokne gi jonekne,
53 un ma nomiu Chik koa kuom malaike to ok usemake.”
54 Eka bang’ winjo wechego, ne gibedo gi mirima mager e chunygi, mi ne gichako muodo lekegi nikech en.
55 To en, kopong’ gi roho maler, nochomo wang’e e polo mi noneno duong’ mar Nyasaye kod mar Yesu kochung’ e bad Nyasaye korachwich,
56 kendo nowacho kama: “Neuru! Aneno polo koyawore kendo Wuod dhano kochung’ e bad Nyasaye korachwich.”
57 Mano nomiyo gikok gi dwol maduong’ kendo ne gidino itgi gi lwetegi mi ne gimuomore kuome giduto kanyachiel.
58 Bang’ wite oko mar taon, ne gichako chiele gi kite. Joma ne chiwo neno mag miriambo noketo lepgi ma oko e tiend ng’at moro ma rawera miluongo ni Saulo.
59 Sama ne gichielo Stefano gi kite, nosayo kama: “Ruoth Yesu, aketo much ngimana e lweti.”
60 Eka bang’ goyo chonge piny, nokok gi dwol maduong’ niya: “Jehova, kik ikwan richoni kuomgi.” Bang’ wacho wechego, ne onindo e tho.
