Tito 2:1-15
2 Kata kamano, in to sik kiwacho weche ma luwore gi puonj mangima.
2 Chwo ma hikgi ng’eny mondo obed joma ok kal tong’ e timbegi, joma kawo gik moko gi pek kaka dwarore, ma pachgi long’o, motegno e yie, e hera, kod nano.
3 Kamano bende, mon ma hikgi ng’eny mondo obed joma timbegi nyiso luor, ok joma ketho nying jomamoko, kik gibed wasumbni mag divai mang’eny, to gibed jopuonj mag gik mabeyo;
4 eka mondo gipuonj mon matindo oher chwogi, oher nyithindgi,
5 obed joma pachgi long’o, joma ler e timbegi, joma rito pacho e yo maber, joma timo gik mabeyo, joma oyie bolore e bwo chwogi, mondo eka ji kik wuo e yor achaya e wi wach Nyasaye.
6 Kamano bende dhi nyime jiwo chwo matindo mondo gibed joma pachgi long’o,
7 kiketo ranyisi kuom bedo gi timbe mabeyo e yore duto. Puonj gik maler gi pek ma dwarore e weche duto,
8 kitiyo gi weche mangima ma ok nyal ketnie bura, eka mondo jo akwede oyud wich-kuot nimar gionge gi gima rach ma ginyalo wacho kuomwa.
9 Wasumbni mondo oyie bolore e bwo teko mar ruodhi maggi e weche duto kendo gitem morogi. Kik gibed joma dwokore kodgi,
10 kik gikwalgi, to ginyis ni gin joma inyalo gen chuth, mondo e yore duto gibidh puonj mar Jawarwa, ma en Nyasaye.
11 Nimar ng’wono mogundho mar Nyasaye osenenore ayanga kuom kelo warruok ne ji duto mopogore opogore.
12 Ng’wonono puonjowa mondo watamre timbe ma ok nyis luoro Nyasaye kod gombo mag piny, kendo mondo wadag ka wanyiso ni wan gi paro malong’o gi tim makare kod chiwruok chuth ne Nyasaye e ndalo ma sani,
13 sama warito geno ma kelo mor kod fwenyruok maduong’ mar Nyasaye ma nyalo duto kod mar Yesu Kristo Jawarwa,
14 ma nochiwore owuon nikech wan mondo ogonywa a e kit ketho duto kendo mondo opwodhwa owuon wabedne oganda makende, ma nigi kinda ne timbe mabeyo.
15 Sik kiwuoyo kuom wechego, kisayo ji, kikwero ji, kendo itim kamano ka in gi teko duto mar chiko weche. Kik iwe mondo ng’ato ochayi.
