Mokwongo ne Jo-Korintho 1:1-31
1 An Paulo ma ne oluong mondo obed jaote+ Kristo Yesu kokalo kuom dwaro mar Nyasaye, an gi Sosthene owadwa
2 wandikonu un kanyakla mar Nyasaye man Korintho,+ ma osepwodh e winjruok achiel gi Kristo Yesu,+ kendo ma oseluong mondo obed jo maler, kanyachiel gi ji duto ma luongo nying Ruodhwa Yesu Kristo kuonde duto, ma en Ruodhgi kendo Ruodhwa+ bende:
3 Ng’wono mogundho kod kuwe mar Nyasaye Wuonwa kod Ruodhwa Yesu Kristo mondo obed kodu.
4 Kinde duto agoyo ne Nyasaye erokamano nikech ng’wono mogundho ma Nyasaye osemiyou kuom Kristo Yesu;
5 nimar osemiyo ubedo momewo e gik moko duto, moriwo nyalo mar wuoyo maber kod ng’eyo duto,+
6 mana kaka neno michiwo e wi Kristo+ osegurore motegno e kindu,
7 mondo kik urem e mich moro amora ngang’, ka bende urito gi siso kinde ma Ruodhwa Yesu Kristo biro fwenyoree.+
8 Bende, obiro miyou bedo motegno nyaka giko, mondo kik ubedie gi wach moro amora minyalo donjnugo e chieng’no mar Ruodhwa Yesu Kristo.+
9 Nyasaye ma noluongou mondo ubed e achiel kod Wuode Yesu Kristo Ruodhwa, en Nyasaye migeno.+
10 Owetena, koro asayou kokalo kuom nying Ruodhwa Yesu Kristo ni mondo uduto uwuo ka un gi winjruok achiel, kendo kik ubed gi pogruok e kindu,+ to ubed e achiel chutho, ka un gi paro kod dwaro achiel.+
11 Nimar owetena, jomoko moa e od Kloe osekelona wachu, ni pogruok ni e kindu.
12 Tiend gima awacho en mae, ni ng’ato ka ng’ato kuomu wacho ni: “An mar Paulo,” “An to an mar Apolo,”+ “To an to an mar Kefa,”* “An to an mar Kristo.”
13 Be Kristo opogore? Be Paulo e ma ne ogur e yath nikech un? Koso ne obatisu e nying Paulo?
14 Agoyo ne Nyasaye erokamano ni ne ok abatiso ng’ato e kindu mak mana Krispo+ kod Gayo,+
15 mondo ng’ato kik wach ni ne obatisu e nyinga.
16 Ee, adier ne abatiso jood Stefana+ bende. To kuom jo modong’, ok ang’eyo ka be ne abatiso ng’at moro machielo.
17 Nimar Kristo ne oora mondo aland wach maber,+ to ok ni mondo abatis ji; to ok gi weche jo mariek, mondo kik yadh-sand* mar Kristo obed kayiem nono.
18 Nimar wach yadh-sandno* en fuwo e wang’ jo mochomo kethruok,+ to en yo ma Nyasaye nyisogo tekone ne wan ma iresowa.+
19 Nikech ondik kama: “Anami rieko mar jorieko olal nono kendo abiro tamora rieko mar jo ma osomo.”+
20 Ere ng’at mariek? Ere jandiko?* Ere jatwak molony e pinyni?* Donge Nyasaye osemiyo rieko mar pinyni odoko fuwo?
21 Nikech kokalo kuom rieko mar Nyasaye piny ne ok ong’eyo Nyasaye+ kuom riekone owuon,+ Nyasaye noneno ni ber mondo ores jo ma oyie kokalo kuom wach miyalo ma nenore ka fuwo.+
22 Jo-Yahudi dwaro ranyisi madongo,+ Jo-Grik bende manyo rieko;
23 wan to wayalo Kristo ma ne ogur e yath. Mano kelo ne Jo-Yahudi chwanyruok, to ogendni mamoko to neno mano kaka fuwo.+
24 Kata kamano, kuom jo moluong, bed ni gin Jo-Yahudi kata Jo-Grik, Kristo en yo ma Nyasaye nyisogo tekone gi riekone.+
25 Nikech gima ofuwo mar Nyasaye riek moloyo dhano, kendo gima nyap mar Nyasaye nigi teko moloyo dhano.+
26 Nimar owetena, unyalo neno ni sa ma ne oluongu, ng’enyu ne ok gin jo mariek e yor ringruok,*+ kata joteko, kata mowuok e anyuola ma nigi huma;+
27 to Nyasaye noyiero gik mofuwo mag piny mondo okelgo wich-kuot ne jorieko; kendo Nyasaye noyiero gik ma nyap mag piny mondo okelgo wich-kuot ne gik ma nigi teko;+
28 bende, Nyasaye noyiero gik mocha mag piny kod gik ma ji okawo ka nono, ma gin gik ma onge, mondo omigo gik ma nitie obed ka nono,+
29 mondo ng’ato kik pakre e wang’ Nyasaye.
30 To Nyasaye e ma osemiyo ubedo e winjruok achiel gi Kristo Yesu, jal ma oseelonwa rieko mar Nyasaye, mosemiyo ikwanowa kaka jo makare,+ mosepwodhowa+ kendo gonyowa kokalo kuom nengo ma nochiwo mondo owarwa,+
31 mondo weche obed mana kaka ne ondik niya: “Ng’at ma sungore, osungre kuom Jehova.”*+
Weche Moler Piny
^ Iluonge bende ni Petro.
^ Som Tiend Weche.
^ Som Tiend Weche.
^ Tiende ni, ng’at molony e chike.
^ Kata, “chenro mar ndaloni.” Som Tiend Weche.
^ Kata, “ka luwore gi chike mag dhano.”
^ Som Apendiks A5.
